ԽՈՐՀՐԴԱՐԱՆԸ ՊԻՏԻ ԼՍԷ ՀԱՆՐԱՊԵՏՈՒԹԵԱՆ ՆԱԽԱԳԱՀԻՆ ՆԱՄԱԿԸ

0
217

Լիբանանեան խորհրդարանը այսօր պիտի   ունկնդրէ   հանրապետութեան նախագահ Միշէլ Սըլէյմանի յատուկ յղած նամակը: Առայժմ ոչ ոք ծանօթ է  նամակին բովանդակութեան, սակայն ըստ երեւոյթին նամակը կ’արծարծէ   նախագահական ընտրութիւններու գոծընթացը, ինչպէս նաեւ անցնող վեց տարիներուն ընթացքին Լիբանանի քաղաքական կեանքին կարեւոր հանգրուաններուն վերլուծումները: Հաւանական է, որ Սըլէյման՝ երեսփոխաններուն դիմելով պահանջէ, չզլանալ իրենց ազգային պարտաւորութիւններուն մէջ եւ   պոյքոթի չենթարկել   նախագահական ընտրութիւնները, որովհետեւ   նախագահական դիրքին վրայ գոյանալիք բացը ծանր հարուած պիտի հասցնէ երկրին եւ պիտի ունենայ իր   հետեւանքները: Քաղաքական կարգ մը հոսանքներ, որնց գլխաւորը՝ Հըզպալլա, կրնան բացակայիլ խորհրդարանի այսօրուան նիստէն:

Վերադառնալով նախագահական ընտրոթիւններու գործընթացին: Մուսթաքպալ Հոսանքի անդամ,երեսփոխան Մուհամմէտ Հաժժար յայտնեց, թէ արգելք մը չունի Միշէլ Աունի ընտրութեան դէմ, պայմանով որ վերջինս համոզիչ երաշխիքներ տայ Մուսթաքպալ Հոսանքի քրիստոնեայ ղեկավարներուն: Հաժժար ըսաւ, թէ Մարտ 14-ի ուժերը պիտի շարունակեն զօրակցիլ Սամիր Ժաաժայի թեկնածութեան: Այսուհանդերձ, ան նշեց, թէ վեթոյի տրամադրութիւն գոյութիւն չունի, ոեւէ թեկնածուի դէմ:

Երեսփոխան Աթէֆ Մաժտալանի դիտել տուաւ, թէ Միշէլ Աունի հետ   Սաատ Հարիրիի փոխյարաբերութիւնները կը բխին ընտրական գործընթացը սահմանադրականօրէն նշուած ժամանակամիջին իրականացնելու մտահոգութենէն: Մաժտալանի   ընդգծեց, թէ առանց Սամիր Ժաաժայի հաւանութեան պիտի չորդեգրուի այլ թեկնածութիւն: Երեսփոխան Ահմէտ Ֆաթֆաթ   նշեց, թէ   վեթօ գոյութիւն չունի ոեւէ թեկնածուի անուան դէմ, պայմանով որ ենթական համախոհութեան մթնոլորտ ստեղծէ բոլորին հետ: Ֆաթֆաթ ըսաւ, թէ Սամիր Ժաաժա կը մնայ Մարտ 14-ի ուժերուն թեկնածուն:

Մուսթաքպալ Հոսանքը վերահաստատեց Սամիր Ժաաժայի թեկնածութեան զօրակցելու իր կեցուածքը եւ պահանջեց որ Մարտ 8-ի ուժերը յստակացնեն իրենց թեկնածուին անունը: Երեսփոխան Խըտր Հապիպ յայտնեց, թէ պատրաստ է քուէարկելու Միշէլ Աունին, եթէ վերջինս   որդեգրէ Մարտ 14-ի ուժերուն ծրագիրը:

Սէուտական Արաբիոյ մէջ լոյս տեսնող օրաթերթեր կը գրեն, թէ իշխան Սէուտ Ֆայսալ կտրականապէս կը մերժէ Միշէլ Աունը տեսնել նախագահական աթոռին վրայ: Այսուհանդերձ, օրաթերթերուն համար անորոշ կը մնայ, եթէ իշխան Ֆայսալի տեսակէտը կարելի է ընդունիլ իբրեւ Սէուտական Արաբիոյ պաշտօնական կեցուածք: Աունի մօտիկ աղբիւրներ կը յայտնեն, թէ Հինգշաբթի օրուան խորհրդարանի նիստը տարբեր պիտի ըլալյ նախորդներէն, որուն համար Միշէլ Աուն յառաջիկայ ժամերուն հաւանաբար պաշտօնապէս յայտարարէ իր թեկնածութիւնը:

Լիբանանեան Ուժեր Կուսակցութեան գործադիր խորհուրդի պետ Սամիր Ժաաժա յայտարարեց, թէ Մարտ 14-ի ուժերը ծունկի պիտի չգան՝Աուն կամ պարապութիւն դրոյթին առջեւ: Ժաաժա ցաւ յայտնեց, որ   լիբանանցիները   չօգտագործեցին «լիբանանեան կառոյց»ով նախագահ ունենալու ընտրանքը:

Դեմոկրատական Հանդիպում խորհրդարանական խմբաւորումը   հանդիպում մը ունեցաւ, երեսփոխան Հանրի Հելուի բնակարանին մէջ եւ   վերահաստատեց վերջինս թեկնածութիւնը պաշտպանելու իր   դիրքորոշումը:

Վարչապետ Թամամ Սալամ, Ռիատի մէջ յայտարարեց, թէ նախագահական ընտրութիւնը ներքին իրագործում մը   ըլլալով, կը մաղթէ որ նոր նախագահը ունենայ տեղական կառոյց:

Ընտրական այս   անորոշութեան մէջ, մարոնիներու Պշարա Ռայի գարտինալը կը փորձէ համոզել, որ լաւագոյն   լուծումը պիտի ըլլայ նախագահ Սըլէյմանի պաշտօնավարութեան երկարաձգումը:

Հանրապետութեան նախագահ Միշէլ Սըլէյման Պաապտայի պալատին մէջ ընդունեց Լիբանանի մօտ Իրանի դեսպան Ղատանֆար Ռըքն Ապատին, երեսփոխաններ Պահիա Հարիրին, Նատիմ Ճեմայէլը, Ֆետի Քարամը, Խալէտ Զահրման եւ այլ անձնաւորութիւններ:

LEAVE A REPLY

Please enter your comment!
Please enter your name here