Ուաշինկթըն Մարդկային Իրաւունքները Յարգելու Կոչ Կ՛ընէ Պաքուի

0
116

 Ատրպէյճանական «Քոնթաքթ» կայքը կը հաղորդէ, որ ԵԱՀԿի մնայուն խորհուրդին մէջ Միացեալ Նահանգներու ներկայացուցիչ Քրիսթոֆըր Ռապինսըն յայտնած է, թէ Ուաշինկթըն Ատրպէյճանին դարձեալ կոչ ուղղած է կատարելու իր պարտաւորութիւնները մարդկային իրաւունքներու մարզին մէջ, յատկապէս՝ նկատի առնելով այն իրողութիւնը, որ Պաքու ստանձնած է Եւրոխորհուրդի նախարարներու խորհուրդի նախագահութիւնը:
«Մենք ուշադրութեամբ կը հետեւէինք Պաքուի կողմէ Եւրոպական Միութեան տրուած պատասխաններուն՝ քաղաքացիական գործիչներու ձերբակալութեան, հետապնդումներուն եւ դատավճիռներուն կապակցութեամբ: Մենք հիասթափուած ենք Պաքուի պատասխաններէն: Մենք կը շարունակենք ականատես ըլլալ քաղաքացիական հանրութեան եւ լրագրողներու նկատմամբ ճն-շումներուն», ըսուած է Ռապինսընի յայտարարութեան մէջ:
Ամերիկացի դիւանագէտը իր մտահոգութիւնը յայտնած է նաեւ յայտնի լրագրող Ռաուֆ Միրքատիրովի ձերբակալութեան առթիւ, ինչպէս նաեւ իրաւապաշտպաններ Լէյլա եւ Արիֆ Եունուսներու ձերբակալութեան եւ հարցաքննութեան փաստին առնչութեամբ:
«Անոնք բոլորը աշխուժօրէն կ՛աջակցէին ղարաբաղեան տագնապի լուծման նպատակով տարուող երկխօսութեան: Միացեալ Նահանգները կողմերուն կոչ կ՛ուղղէ աջակցելու երկխօսութեան հաստատման ու հայերուն եւ ատրպէյճանցիներուն միջեւ վստահութեան ստեղծման ուղղուած ջանքերուն: Ուաշինկթըն նաեւ խորապէս հիասթափուած է ընդդիմադիր երիտասարդական ՆԻՏԱ շարժումի գործիչներուն դէմ արձակուած դատավճիռներէն: Երիտասարդներու բաւական երկար ժամանակով ազատազրկումը կը նկատուի քաղաքական դրդապատճառներով առնուած որոշում, եւ անոնց դէմ ներկայացուած մեղադրանքները դատարանին մէջ փաստերով չեն ապացուցուած», ըսուած է յայտարարութեան մէջ:
Ատրպէյճան Եւրոխորհուրդի նախարարներու խորհուրդի նախագահութիւնը ստանձնած էր Մայիս 14ին՝ վեցամսեայ ժամկէտով:

LEAVE A REPLY

Please enter your comment!
Please enter your name here