Ատրպէյճանի Դասագիրքերուն Մէջ Օտարատեացութիւնը Կը Դատապարտուի

0
106

ԵՐԵՒԱՆ, «Փանորամա».- «Ռեքս» լրատուական գործակալութեան հետ հարցազրոյցի մը ընթացքին, ատրպէյճանցի իրաւապաշտպան Լէյլա Եունուս քննադատած է իշխող կուսակցութեան կողմէ զինք իբրեւ քրիստոնեայ, հայրենիքի դաւաճան կամ Հայաստանի լրտես ներկայացնելու փորձերը՝ զանոնք իր եւ ամուսնոյն դէմ բռնութեան հրաւիրող համազօր քայլեր նկատելով:
Ան միաժամանակ խստօրէն քննադատած է Ատրպէյճանի պատմութեան դասագիրքերու հեղինակները, որովհետեւ անոնք երեխաներուն մօտ կը սերմանեն այն սխալ համոզումը, թէ Ատրպէյճանի ժողովուրդին թշնամիները քրիստոնեաներն են, իսկ հայերը՝ «անհաւատներ» են, անտրաբանական նկատելով շիի եւ սիւննի իսլամներուն միջեւ առկայ տարաձայնութիւններու մեղաւորները քրիստոնեաները նկատելու Պաքուի ջանքերը:
Ի պատասխան այն հարցումին, թէ Ատրպէյճանի ղեկավարութիւնը արդեօք ինչո՞ւ խոչընդոտներ կը դնէ «ժողովրդային դիւանագիտութեան» զարգացման վրայ՝ իրաւապաշտպանը նշած է, որ մենատիրական վարչակարգերուն համար միշտ հարկաւոր են արտաքին թշնամիներ, ուշադրութիւնը ներքին հարցերու վրայէն շեղելու նպատակով:
«Մենք փաստօրէն վերադարձած ենք 30ական թուականներու խորհրդային անցեալ, ուր ի զօրու էր «Ով մեզի հետ չէ, մեր դէմն է» մտայնութիւնը: Վարչակարգին նպատակն է իր հակակշիռին տակ պահել ամէն ինչ, ներառեալ՝ «ժողովրդային դիւանագիտութիւնը»», ըսած է Եունուս:
Յիշեցնենք, որ Ապրիլ 28ին, Պաքուի օդակայանին մէջ ձերբակալուած էին Լէյլա Եունուսն ու անոր ամուսինը՝ Արիֆը, որոնք պիտի մասնակցէին Եւրոմիութեան հրաւէրով միջազգային համաժողովի մը: Ինը ժամ հարցաքննուելէ ետք, անոնք ազատ արձակուած էին, սակայն անոնց անցագիրները գրաւուած էին, որպէսզի չկարենան երկրէն դուրս գալ:
Ուաշինկթըն, Եւրոխորհուրդը եւ մարդկային իրաւանց պաշտպան միջազգային կազմակերպութիւններ քննադատած էին այս քայլերը: Աւելի կանուխ, Պաքուի մէջ ձերբակալուած էր նաեւ լրագրող Ռաուֆ Միրքատիրովը, որ ամբաստանուած է Հայաստանի ի նպաստ լրտեսութիւն կատարելու յանցանքով:

 

LEAVE A REPLY

Please enter your comment!
Please enter your name here