(Հայերեն) Թէքէեանը նշեց Շարլ Ազնաւուրի 90-ամեակը

0
165

«Մի անշուք տան մէջ ինձ տրուեց այս կեանքը

Փարիզում, Մսիէօ Լը Փրենս փողոցում,

Որտեղ հնչում էր մի´շտ երգն ու նուագը.

Հրաշք մարդկանց, ում նոյն ցաւն էր միացնում,

Յուշերն անցեալի եւ խօսքն ու կատակը,

Ռուսերէն լեզուն, լեզուն ՀԱՅԵՐԷՆ» 

Շարլ Ազնաւուր 

Միացեալ Նահանգներու տարածքին, հաւանաբար, Թէքէեան Մշակութային Միութիւնը եղաւ միա´կ կազմակերպութիւնը, որ նշեց ֆրանսահայ մեծ շանսոնիէ-ի ծննդեան 90-րդ տարեդարձը։  Մեր հայրենիքը պետական մակարդակով եւ Ազնաւուրի սիրած երկու երկիրներու` Հայաստանի եւ Ֆրանսայի Հանրապետութեանց զոյգ նախագահներու մասնակցութեամբ եւ մեծ շուքով նշեց իր նորօրեայ մեծագոյն զաւակներէն Շարլի տարեդարձը։

Հակառակ Նիւ Եորքի  բազմազբաղ ազգային կեանքին՝ վարչութիւնը որոշեց անպայմանօրէն Մայիսին նշել այս տարեդարձը։  Ան ծնած է Մայիս 22-ին։  Արդարեւ, Մայիս 30, 2014, Ուրբաթ օր երեկոյեան Նիւ Ճըրզիի Ս. Թովմաս եկեղեցւոյ սրահը լեցուցած էին Ազնաւուրի արուեստին սիրահարները։  Վերջապէս անոնք, որոնք հասակ առած էին Ազնաւուրի երգերով. այդ ներկաները կու գային Պէյրութէն, Պոլսէն, Գահիրէէն, Հալէպէն … ու դեռ Երեւանէն։  Անոնք բոլորն ալ հրապուրուած անոր երգերէն՝ հպարտօրէն կը պահէին այդ յիշատակները իրենց հետ։ Ուր որ գացին՝ մնացին հաւատարիմ այդ երգերուն։

Միութեան անունով բարի գալուստ մաղթեց Տոքթ. Վաղինակ Դարբինեան։  Բեմ հրաւիրուեցաւ Ազնաւուրի երգերուն լաւագոյն մեկնաբանը՝ Պերճ Թիւրապեան, որ կատարած է երգերէն թարգմանական փունջ մը հեղինակէն։  Նախ քան անոր հրապարակումը, ան ցոյց տուած է Ազնաւուրին եւ ստացած ամբողջական հաւանութիւնը շանսոնիէ-ին։  Յաջորդաբար երգեց «Տեսնում եմ արդէն», «Ինքնակենսագրութիւն», «Դեռ երէկ» … վերջապէս առաջին բաժինը աւարտեց «Մեր բոհեմը» երգով, որուն կը միանային ներկաները … անոնք եւս մէկական բոհեմները մեր արուեստին։  Երջանկութիւն էր տեսնել, թէ մեր ժողովուրդը որքա´ն գիտէ գնահատել իր իրական մեծերը։  Յուզում կար բոլորին մէջ, անոնք կը վերյիշէին իրենց երիտասարդութիւնը եւ անցեալի ազգային հպարտութիւնը, անկասկա՛ծ։

Պերճ ծնած է Գահիրէ եւ 15 տարեկանին տեղափոխուած Հայաստան։  Ուսանած է Երեւանի Պետական համալսարանի բանասիրական բաժինը, ուր յետագային դասաւանդած է ֆրանսերէն լեզու եւ գրականութիւն։ 1986-էն հաստատուած է Նիւ Եորք, ուր Գոլոմպիա համալսարանէն ստացած է գրադարանագիտութեան մագիստրոսի սիտղոս։

Պերճ Թիւրապեան երաժշտութեամբ զբաղուած է փոքր տարիքէն։  Ունի հեղինակային երգեր, ինչպէս նաեւ երգեր հայ բանաստեղծներու խօսքերով` Չարենցէն, Թէքէեանէն …։ Կարեւոր ներդրում ունի որպէս ֆրանսական «շանսոնի» մեկնաբան հայ իրականութեան մէջ` հայերէնի թարգմանելով ու երգելով ֆրանսալեզու վարպետներու երգերը։  Այժմ արտադրութեան մէջ է Պրէլ, Պրասենս, Ֆեռէ` ֆրանսական երգի «Սուրբ երրորդութիւն» ալպոմը։  Համերգներով հանդէս եկած է Հայաստանի, Միացեալ Նահանգներու եւ Գանատայի համայնքներու մէջ, նաեւ` Փարիզ, Պոլիս ու այլուր։

Յայտագրին երկրորդ բաժնի մէջ հանդէս եկաւ շնորհալի երիտասարդ երգչուհի  Արմենիա Սարգիսեանը` Թորոնթոյէն։  Առանձինն ու Պերճին հետ զուգերգով ան երաշխաւորեց, որ հայ բեմը գալիք տարիներուն արդէն ծնունդ տուած է նոր աստղի մը, որ պիտի շարունակէ Պերճին գծած երգարուեստին ոճը  ամենայն հարազատութեամբ։  «Ինչու տխուր է Վենետիկը», «Նա», «Սիրոյ մի կեանք» … վերջապէս «Տարէք ինձ այնտեղ» (emmenez-moi)։

Քսանամեայ սոփրանօ Արմենիան սիրած է երգել 5 տարեկանէն, այնուհետեւ  սորվելով դասական երգ, ճազ, երաժշտական թատրոն եւ ժամանակակից երաժշտութիւն։  Ան արժանացեր է Թորոնթոյի Արքայական երաժշտանոցի մի քանի մրցանակներուն։  Ինչպէս ինք կը խոստովանի, իրեն համար չկայ աւելի մեծ բերկրանք, քան բեմէն երգելը։  Ան մեծ պատիւ համարեց այս առիթը` մասնակցելու մեծն Ազնաւուրին նուիրուած երեկոյին  Թէքէեան Մշակութային Միութեան կազմակերպութեամբ։

Թող մի´շտ ապրի Ազնաւուրը։  Ան չի շտապէր հանգիստի անցնիլ, կը շարունակէ շրջագայիլ աշխարհով մէկ` դահլիճներ լեցնելով։  Երեւանի յոբելինական ելոյթին յայտնեց իր վերջին հրաժեշտի համերգի տարեթիւը. «Այդ պիտի ըլլայ 2024 թուականի Մայիսի 22ը։  Ես կը դառնամ 100 տարեկան։  Դուք ներկայ կ’ըլլաք այդտեղ, յոյսով եմ»։

Թէքէեանը կը խոստանայ դարձեալ հրաւիրել Ազնաւուրի երկրպագուները 2024-ի Մայիսի 22ին։  Անպայմա´ն։

ՅԱԿՈԲ ՎԱՐԴԻՎԱՌԵԱՆ

Նիւ Եորք

LEAVE A REPLY

Please enter your comment!
Please enter your name here