ԿԱՌԱՎԱՐՈՒԹԵԱՆ ՆԻՍՏ ՏԵՂԻ ՊԻՏԻ ՉՈՒՆԵՆԱՅ ԱՅՍ ՇԱԲԱԹ

0
139

Նախագահական ընտրութիւններու թղթածրարը դարձեալ դրուած է   տաք կրակի վրայ: Խորհրդարանի նախագահ Նեպիհ Պըրրի պատրաստակամութիւն յայտնեց քաղաքական բոլոր կողմերուն հետ սրտբացօրէն   քննարկելու հրատապութիւն ներկայացնող այս թղթածրարը: Պըրրի նաեւ նշեց, թէ աշխատավարձերու յաւելման շուրջ լուծումի  նոր տարբերակ մը ներկայացուցած է   Ֆուատ Սինիորային: Վարչապետ Թամամ Սալամ իր այցելուներուն յայտնեց, թէ պիտի մասնակցի նախագահի ընտրութեան նպատակով Չորեքշաբթի օրուան խորհրդարանի նիստին, ինչպէս նաեւ Հինգշաբթի օրուան օրէնսդիր նիստին: Սալամ   նշեց,թէ կառավարութեան նիստ տեղի պիտի չունենայ այս շաբթուան ընթացքին, որովհետեւ   քաղաքական կողմերուն միջեւ անկարելի եղած է գոյացնել համաձայնութիւն: Վարչապետը բարեբախտութիւն յայտնեց, որ   հակակշիռի տակ է երկրին ապահովութիւնը: Վարչապետ Թամամ Սալամ   վարչապետարանին մէջ ընդունեց Իրլանտայի վարչապետ   Ինտա Քենին: Ան նաեւ ընդունեց   կրթութեան նախարար Իլիաս Պուսաապը եւ քննարկեց աշխատավարձերու յաւելման   ինչպէս նաեւ պետական քննութիւններուն իրավիճակը:

Ներքին գործոց նախարար Նիհատ Մաշնուք այցելեց Ռապիյէ եւ հանդիպում մը ունեցաւ Միշէլ Աունի հետ: Հանդիպումէն ետք,   Մաշնուք   յայտարարեց, թէ ոչ մէկ   նամակ փոխանցած էր Աունին , ոչ ալ փոքրանդամ կառավարութիւն մը կազմելու առաջարկ ներկայացուցած էր անոր:  Մաշնուք բաւարարուեցաւ նշելով, թէ շրջանային զարգացումները մեծ ազդեցութիւն պիտի ունենան նախագահական ընտրութիւններուն վրայ:  Ան ըսաւ, թէ պիտի չհանդուրժէ   վարչապետին իրաւասութիւնները սակարկութեան վերածելու փորձերը: Նախարարը նաեւ ըսաւ, թէ վերջ պիտի դրուի Ռումիյէի բանտին մէջ տիրող ապօրինութեան:

Մարոնիներու Պշարա Ռայի գարտինալը զգուշացուց խորհրդարանի նիստերը պոյքոթի ենթարկող երեսփոխանները, յայտնելով, թէ ժողովուրդը պիտի չընդունի զանոնք, որովհետեւ կը խուսափին նախագահ ընտրելու իրենց հիմնական պարտականութենէն: Պքերքէի մօտիկ աղբիւրներ կը յայտնեն, թէ   գարտինալ Ռայի կը փորձէ հանդիպում մը   կազմակերպել Միշէլ Աունի եւ Սամիր Ժաաժայի միջեւ:

Հըզպալլայի   գործադիր խորհուրդի փոխնախագահ շէյխ Նեպիլ Քաուք ըսաւ,թէ նախագահական դիրքի վրայ ստեղծուած թափուրը սպառնալիք մըն է   պետական հաստատութիւններուն, ժողովուրդին շահերուն եւ Լիբանանի կայունութեան: Երեսփոխան Ահմէտ Ֆաթֆաթ ըսաւ, թէ Հըզպալլա եւ Ազգային Ազատ Հոսանքը կը խանգարեն ընտրական   գործընթացը, իսկ վարչապետ Թամամ Սալամ կը փորձէ փրկել կարելին: Ֆաթֆաթ աւելցուց, թէ Սալամ պիտի յաջողի յաղթահարել իր առջեւ ցցուող արգելքները:

Արտաքին գործոց   նախարար   Ժըպրան Պասիլ ըսաւ,թէ կ’աշխատի իսկական գործընկերութիւն ստեղծել Մուսթաքպալ Հոսանքին հետ :

LEAVE A REPLY

Please enter your comment!
Please enter your name here