ՈՒԱՇԻՆԿԹԸՆ ՆՈՐ ՊԱՏԺԱՄԻՋՈՑՆԵՐ ՊԻՏԻ ՀԱՍՏԱՏԷ ՄՈՍԿՈՒԱՅԻ ԴԷՄ

0
152

Ուաշինկթընի մօտ  Ռուսիոյ դեսպան Սերկէյ Քիսլիալք յայտարարեց,թէ Ռուսիան մեկուսացնելու փորձերը դատապարտուած են ձախողութեան: Միացեալ Նահանգներու պետական   քարտուղարի օգնական Վիքթորիա Նուլանտ յայտարարեց, թէ Ուաշինկթըն իր դաշնակիցներուն հետ   կը խորհրդակցի Ռուսիոյ դէմ նոր պատժամիջոցներու   հարցը: Ըստ Նուլանտի, պատժամիջոցները պիտի ընդգրկեն ուժանիւթի, ելեւմտական եւ պաշտպանութեան հատուածները: Նուլանտի համաձայն, Ռուսիա կը սատարէ արեւելեան Ուքրանիոյ անջատողականներուն:

Ռուսիոյ   խորհրդարանի (Տումա) միջազգային յարաբերութիւններու յանձնաժողովի նախագահ Ալեքսէյ Փուշքով առաջարկեց պատժամիջոցներու համակարգ ստեղծել Ուքրանիոյ եւ ուքրանական ղեկավարութեան դէմ: Անոր կարծիքով, Ռուսիոյ պէտք է վերանայի Ուքրանիոյ հանդէպ իր    քաղաքականութեան: Ռուսիա պաշտօնապէս դադրեցուց Ուքրանիոյ կազի մատակարարումը:

Միւս կողմէ, ուժանիւթի հարցերով Եւրոպական   Միութեան յանձնակատար Կիւնթըր Էթինկըր դիտել տուաւ, որ Ուքրանիոյ աջակցելու համար   Եւրոպական Միութեան ծախսերը կրնան կազմել   քանի մը միլիառ   եուրօ եւ   այդ գումարները հնարաւոր է, որ   յատկացուին յառաջիկայ 10-15 տարիներուն ընթացքին:

LEAVE A REPLY

Please enter your comment!
Please enter your name here