ԻՆ՞Չ ՊԻՏԻ ԸԼԼԱՅ ԱՇԽԱՏԱՎԱՐՁԵՐՈՒ ՅԱՒԵԼՄԱՆ ԹՂԹԱԾՐԱՐԻՆ ՃԱԿԱՏԱԳԻՐԸ

0
144

Լիբանանեան խորհրդարանը այսօր պիտի   քննարկէ աշխատավարձերու յաւելման թղթածրարը: Աշխատավարձերու յաւելման թղթածրարին շուրջ փոխհասկացողութեան եզրեր սկսած են յայտնուիլ վերջին քանի մը ժամերուն: Այսուհանդերձ, բազմաթիւ կէտեր կը սպասեն իրենց լուծումին, որպէսզի վերջնականապէս բարձրանայ «Սպիտակ Ծուխ»ը: Առաջին հարցը կը վերաբերի   յաւելումի  միջոցները ապահովելու կէտին: Ցարդ անորոշ կը մնան  յաւելումները հայթայթելու աղբիւրները: Երկրորդը՝ քաղաքական, սոյն թղթածրարը խորհրդարանի նիստին ընթացքին քննարկելու եղանակին շուրջ: Մարտ 14-ի ուժերը կը պահանջեն թղթածրարը քննարկել իբրեւ մէկ ամբողջութիւն, մէկ յօդուածի տակ: Մարտ 8-ի ուժերը կը պահանջեն յօդուած առ յօդուած կատարել քննարկումը:

Մուսթաքպալ Հոսանքի պետ Ֆուատ Սինիորա յայտարարեց,թէ  ճշմարտութեան ժամը կը մօտենայ աշխատավարձերու յաւելումի օրակարգին շուրջ: Սինիորա ըսաւ, թէ խորհրդարանի այսօրուան նիստին ընթացքին պիտի պահանջուի հաւասարակշռուած եւ ուսումնասիրուած լուծում մը: Վարչական բարեկարգութիւններու նախարար Նեպիլ Տը Ֆրէյժ   նոյնպէս հաւաստեց աշխատավարձերու օրակարգին շուրջ յառաջընթացի մը առկայութիւնը: Երեսփոխան   Ֆետի Հըպր դիտել տուաւ,թէ յաւելումներու աղբիւրները որոշուած են, սակայն պետական պիւտճէին մէջ գոյացած բացը անելի կը մատնէ խորհրդարանը եւ կառավարութիւնը: Երեսփոխան Պահիա Հարիրի դիտել տուաւ,թէ քննարկումները տակաւին կը շարունակուին, իսկ նախկին վարչապետ Նեժիպ Միքաթի     ըսաւ, թէ վերջնական համաձայնութիւն մը չէ գոյացած տակաւին:

LEAVE A REPLY

Please enter your comment!
Please enter your name here