ՖԵԼԹՄԱՆ՝ ԼԻԲԱՆԱՆՑԻՆԵՐՈՒՆ ՊԱՏԱՍԽԱՆԱՏՈՒՈՒԹԻՒՆՆ Է ԵՐԿՐԻՆ ԱՊԱՀՈՎՈՒԹԵԱՆ ՊԱՀՊԱՆՈՒՄԸ

0
137

 Իրաքի մէջ ծայրայեղականներու յայտնութիւնը, ընդհանուր մտահոգութիւններ ստեղծած է Մարտ 14-ի եւ 8-ի կարգ մը   դէմքերու մօտ, որոնք լուսարձակէ հեռու կը քննարկեն Լիբանանը ծայրայեղականներու   «ընդլայնում»էն խնայելու միջոցները: Ներքին գործոց նախարար Նիհատ Մաշնուք   իր մտահոգութիւնը յայտնեց, Տաաշի զինեալներ Սուրիոյ ճանապարհով Լիբանան թափանցելու կարելիութեան:

ՄԱԿ-ի ընդհանուր քարտուղարի   օգնական Ճեֆրի Ֆելթման դիտել տուաւ, որ նախագահական դիրքի վրայ ստեղծուած թափուրը լուրջ հետեւանքներ կրնայ ունենալ Լիբանանի վրայ: Սակայն ան շեշտեց, թէ Լիբանանի   ժողովուրդին պատասխանատուութիւնն է երկրին ապահովական կայութեան պահպանումը: Ֆելթման, բացառեց 2008 Մայիսի կրկնութիւնը: Մուսթաքպալ   Հոսանքի աղբիւրներ յայտնեցին, թէ նախագահութեան հասնելու Միշէլ Աունի կարելիութիւնները զերոյէն ալ նուազ են: Մարատա Հոսանքի պետ Սըլէյման Ֆրանճիէ յայտարարեց, թէ նախագահի բացակայութիւնը պիտի չտկարացնէ   քրիստոնեաները: Ան   յուսադրեց քիչ մը եւս սպասել, որպէսզի հզօր նախագահ մը ունենայ երկիրը:

Ընկերվարարական Յառաջդիմական Կուսակցութեան պետ Ուալիտ Ճոմպլաթ ըսաւ, թէ Սամիր Ժաաժա եւ Միշէլ Աուն ազատ են շարունակելու իրենց ընտրապայքարը, սակայն Հանրի Հելու յետս պիտի չկոչէ իր թեկնածութիւնը, ինչպէս ալ ընթանանընտրական զարգացումները:

 Վարչապետ Թամամ Սալամ դատապարտեց երկրին ապահովական կայունութիւնը փորձաքարի ենթարկելու փորձերը եւ ըսաւ, թէ հանդուրժող պիտի չըլլայ նման   արկածախնդրութիւններու հանդէպ:

Միւս կողմէ, Սալամ յայտնեց, թէ պայմանները չեն արտօներ  մինչեւ   շաբաթավերջ գումարելու կառավարութեան նիստ: Անոր կարծիքով, միայն կառավարութեան աշխատանքի եղանակին շուրջ  համաձայնութիւն գոյանալե ետք կրնան  վերսկսիլ նիստերը: Սալամ   նշեց, թէ մօտէն կը հետեւի   կառավարութեան եւ պետութեան հարցերուն: Ան մաղթեց,որ քաղաքական խմբաւորումները կը հրաժարին իրենց նեղ հաշիւներէն եւ   կը մասնակցին նոր նախագահի ընտրութիւններուն: Սալամ ըսաւ, թէ իր գլխաւորած կառավարութիւնը կը սպասէ նոր նախագահի ընտրութեան,որպէսզի լիարժէք կատարէ անոր վրայ    դրուած պարտականութիւնները:

LEAVE A REPLY

Please enter your comment!
Please enter your name here