ՀՀ Սփիւռքի Նախարար Հրանոյշ Յակոբեանի Ողջոյնի Խօսքը Ռումանիոյ Հայաբնակ Կերլա Քաղաքի Եւ Քաղաքին Մէջ Իրականացուող Ս. Գրիգոր Լուսաւորիչի Տօնի Առիթով

0
138

Ռումանիոյ մօտ ՀՀ արտակարգ եւ լիազօր դեսպան յարգարժան պարո՛ն Գասպարեան,

Ռումանահայոց միութեան նախագահ  մեծայարգ պարո՛ն Ոսկանեան,

Մեծայարգ պարո՛ն քաղաքապետ, գերաշնորհ Սրբազա՛ն հայր,

Կերլայի հայ համայնքի ներկայացուցիչնե՛ր,

Սիրելի՛ հայրենակիցներ եւ հիւրեր,

ՀՀ սփիւռքի նախարարութեան անունով կը շնորհաւորեմ ձեզ Կերլա քաղաքի Օրուան եւ Սուրբ Գրիգոր Լուսաւորչին նուիրուած այս գեղեցիկ տօնին առիթով:

Հայ գաղթականներու կողմէ 17-18-րդ դարուն հիմնուած Արմէնոպոլիս քաղաքը, որ յետագային անուանուեցաւ Կերլա, ունի հարուստ պատմութիւն եւ իր մշակութային ժառանգութեամբ մեծ հետք ձգած թէ՛ հայկական սփիւռքի եւ թէ՛ Ռումանիոյ պատմութեան էջերուն:

Աղէտներու ու արհաւիրքներու պարտադրանքով յաճախ հայերու մէկ մասը լքած է իր բնօրրանը եւ հաստատուած այլ վայրերու մէջ,  ընդելուզուած այդ հասարակութիւններուն մէջ, սակայն  օտար ափերու վրայ շարունակած է հայ մշակոյթի պահպանումն ու տարածումը:

 Այս առումով յատկանշական է, որ Ռումանիոյ այս վայրին մէջ հաստատուելէ ետք հայերու առաջնային նախաձեռնութիւններէն մէկը եղաւ քաղաքին մէջ հայկական եկեղեցիներու կառուցումը` որպէս ազգային ինքնութեան պահպանման ու յարատեւման կարեւորագոյն յենասիւն, որոնք նաեւ նոր շունչ հաղորդեցին  նորաստեղծ քաղաքին: Այս ծիրէն ներս պէտք է նշեմ 18-րդ դարուն հայերու կողմէ Կերլայի կեդրոնին մէջ կառուցուած Սուրբ Երրորդութիւն եկեղեցւոյ մասին, որ գեղեցիկ ճարտարապետական կառոյց ըլլալէ զատ, հայկական մշակութային ժառանգութեան հիանալի օրինակ է:

Յարգարժա՛ն պարոն քաղաքապետ,

Կը խնդրեմ` ընդունէք իմ խորին յարգանքն ու երախտագիտութիւնը` հայ համայնքին նկատմամբ Ձեր ունեցած հիանալի վերաբերմունքին համար: Այս ձեռնարկները, յիրաւի, վկայութիւնն են հայ եւ ռումանացի ժողովուրդներու դարաւոր բարեկամութեան, նոյն արժեհամակարգին դաւանելու, ինչպէս նաեւ երկու ժողովուրդներու պատմութիւնն ու մշակոյթը պահպանելու եւ դարերուն փոխանցելու արժէքաւոր գործի:

Շնորհակալութեան իմ խօսքս կ’ուղղեմ մեր դեսպանութեան, ռումանահայոց հոգեւոր թեմին, Ռումանահայոց միութեան ղեկավարութեան եւ հայ համայնքի ներկայացուցիչներուն այս ձեռնարկներու կազմակերպման աջակցելու համար եւ կերլաբնակ բոլոր սիրելի հայրենակիցներուն, որ հանդիսանալով Ռումանիոյ օրինապաշտ քաղաքացիներ` սերունդէ սերունդ, դարեր ի վեր ապրած եւ այժմ ալ կը շարունակեն ապրիլ եւ գործել որպէս հոգով հպարտ հայեր` պահպանելով հայկական ոգին, մշակոյթն ու աւանդոյթները:

Մէկ անգամ եւս կը շնորահաւորեմ բոլորիդ այս պատմական օրուան, հիասքանչ տօնակատարութիւններու առթիւ եւ կը մաղթեմ յաջողութիւններ` յանուն ռումանահայ համայնքի զօրացման եւ մեր երկու ժողովուրդներու բարեկամութեան:

Ջերմ բարեմաղթանքներով`

ՀՐԱՆՈՅՇ ՅԱԿՈԲԵԱՆ

LEAVE A REPLY

Please enter your comment!
Please enter your name here