«Արի Տուն-2014». «Նախագահէն Մինչեւ Հաշուապահ, Կամ… Ի՞նչ Կ’երազեն Արիտունցիները»

0
155

Հետաքրքիր, միաժամանակ տարբեր են «Արի տուն» ծրագիրի մասնակիցները, տարբեր, ինչպէս այն երկիրները, ուր անոնք կ’ապրին: Տարբեր է անգամ այն հայերէնը, որ անոնք կը խօսին կամ ընդամէնը  քանի մը բառ կ’արտաբերեն:

Բայց…, բոլորն ալ ունին երազանքներ, նման ու տարբեր, որոնք թուղթին  յանձնած են թէկուզ անվարժ հայերէնով, երբեմն ալ` օտար լեզուով, բայց տարիքին բնորոշ անմիջականութեամբ: Ծանօթանանք մի քանի հոգիի հետ. «Կ’ուզեմ, որ բոլոր հայերը վերադառնան տուն…»,-կ’երազէ Նայիրա Գամբարեանը, նոյնը կը ցանկայ նաեւ Էլլա Միքայէլեանը. «Կ’ուզեմ, որ Հայաստանի մէջ  խաղաղութիւն ըլլայ, եւ բոլոր հայերը վերադառնան հայրենիք»: Իսկ Մարիամ Փէրիխանեանը՞. «Ես շատ երազանքներ ունիմ, բայց կը մտածեմ, որ իմ ամենակարեւոր երազանքը կը համընկնի բոլոր պանդուխտ հայերու երազանքին: Ատիկա հայրենիք վերադառնալն ու  այնտեղ բնակիլը: Իմ երազանքներէս է նաեւ դպրոցը յաջողութեամբ աւարտելն ու համալսարան ընդունուիլը»:

Այժմ տեսնենք, թէ ինչ կ’երազէ Քրիստինէ Բալայեանը. «Իւրաքանչիւր մարդ ունի իր սեփական եւ նուիրական երազանքը: Ես կը կարծեմ, որ անհնարին ոչինչ չկայ, ամէն ինչի կարելի է հասնիլ: Ես կ’երազեմ թռչիլ օդապարիկով: Եւ կը մտածեմ, որ այն  օր մը անպայման կ’իրականանայ»: Իսկ Անի Նալբանդեանը՞… «Ես ալ բոլորին պէս  կ’երազեմ… Կ’երազեմ, որ ամբողջ աշխարհի մէջ ազատութիւն ըլլայ: Այսինքն` բռնութիւն չըլլայ, մարդիկ ազատ ըլլան: Կ’երազեմ` չարը վերանայ, մարդիկ չար չըլլան, չարախօսութիւն ալ չընեն»: Իսկ Ռիթա Մինասեանը կը կարծէ, որ երազանքներու մասին պէտք չէ բարձրաձայնել. «Ես կ’երազեմ դառնալ հաշուապահ: Կ’ուզեմ, որ հայրիկս ու մայրիկս շատ երկար ապրին: Իսկ մնացածը չեմ կրնար ըսել…»: Իսկ Կարինէ Աւետիսեանը յանուն իր երազանքին պատրաստ է ամէն ինչի. «Իւրաքանչիւր մարդ ունի երազանք: Երազանքը  այնպիսի զգացում է, որուն կը ձգտիս, որ հասնիս: Ես չունիմ երազանք, ունիմ նպատակ, որուն համար պատրաստ եմ ամէն ինչի: Իմ նպատակն է ուսանիլ Երեւանի պետական բժշկական համալսարանը: Կը յուսամ` կը հասնիմ իմ նպատակիս»: Իսկ թէ որոնք էին Կարինէ Չոլոքեանի լուսաւոր երազանքները, այդպէս ալ մեզի համար «երազանք» կը մնան. «Իւրաքանչիւր մարդ մոլորակի վրայ կ’երազէ ինչ-որ  բան մը, ունի երազանքներ: Ոչ միշտ կ’իրականանան, բայց ամէն մարդ կը հաւատայ, որ ատոնք անպայման կ’իրականանան: Իմ երազանքներս ես չեմ ուզեր գրել, բայց կրնամ ըսել, որ անոնք ունին բարի ու լուսաւոր իմաստ»:

Համբարձում Սահակեան. (նկատեցիք` մեր «ցուցակի» միակ տղան): Անոր երազանքն ալ  առանձնայատուկ է: Ծանօթանա՞նք. «Իմ կեանքիս մէջ ես երազող եմ: Շատ ուժեղ են իմ երազանքները: Ես կ’երազեմ դառնալ յայտնի ռոք-երաժիշտ, որովհետեւ քեզի կը ճանչնայ ամբողջ աշխարհը, եւ համերգներու ժամանակ կը հաւաքուին  քանի մը հարիւր հազար մարդ: Ես կ’երազեմ նաեւ դառնալ Ապխազիոյ նախագահ, որ բոլոր մարդիկ սիրեն ինծի»:

Հ.Գ. Արիտունցիներու երազանքներուն ծանօթանալու համար մեզի «օգնեց» Երեւանի Խրիմեան Հայրիկի անուան թիւ 10 հիմնական դպրոցի ուսուցչուհի Ռուզաննա Փափազեանը, որուն շատ  շնորհակալ ենք: Տիկին Ռուզաննան այն ուսուցչուհիներէն է, որոնք կը դասաւանդեն Երեւանի Ստ. Շահումեանի անուան թիւ 1 դպրոցին մէջ «Արի տուն» ծրագիրի մասնակիցներուն համար կազմակերպուած հայոց լեզուի դասընթացներուն: Հերթական դասերէն մէկուն ժամանակ ան յանձնարարած էր արիտունցիներուն թուղթին յանձնել իրենց երազանքները:

Պատրաստեց  Լուսինէ Աբրահամեան

LEAVE A REPLY

Please enter your comment!
Please enter your name here