ԼԱՒՐՈՎ ԺԱՄԱՆԵՑ ԵՐԵՒԱՆ՝ ՌՈՒՍԻԱ ՇԱՀԱԳՐԳՌՈՒԱԾ Է ԼԵՌՆԱՅԻՆ ՂԱՐԱԲԱՂԻ ՀԱԿԱՄԱՐՏՈՒԹԵԱՆ ՇՈՒՏԱՓՈՅԹ ԿԱՐԳԱՒՈՐՄԱՆ

0
189

Ռուսիոյ արտաքին գործոց նախարար Սերկէյ Լաւրով այցելեց Երեւան: Զուարթնոցի միջազգային օդակայանին մէջ ռուս դիւանագէտին ընդունեց արտաքին գործոց նախարար Էտուարտ Նալպանտեանը: Ապա, արտաքին գործոց նախարարութեան շէնքին մէջ հանդիպում մը կայացաւ երկու նախարարներուն միջեւ, որուն աւարտին տեղի ունեցաւ   միացեալ մամլոյ ասուլիս մը: Պաշտօնական Երեւանը   երախտագիտութիւն յայտնեց Ռուսիոյ՝ Լեռնային Ղարաբաղի հակամարտութեան խաղաղ կարգաւորման ուղղուած   միջնորդական ջանքերուն համար: Սոյն յայտարարութիւնը կատարեց Հայաստանի արտաքին գործոց նախարար Էտուարտ Նալպանտեան, իր ռուս պաշտօնակիցին Սերկէյ Լաւրովի հետ համատեղ մամլոյ ասուլիսի ընթացքին: « Մէկ ամիս առաջ նշուեցաւ   հրադադարի   քսանամեակը եւ   մենք շատ լաւ կը յիշենք,որ շնորհիւ Ռուսիոյ քրտնաջան աշխատանքին, յաջողեցաւ հասնիլ Ատրպէյճանի եւ Լեռնային Ղարաբաղի հաշտութիւնը, որուն միացաւ նաեւ Հայաստանը».ըսաւ Նալպանտեան: Լաւրով հաւաստիացուց, թէ նախագահ Վլատիմիր Փութին յանձնառու կը մնայ նախագահ Սերժ Սարգսեանի հետ ձեռք բերուած բոլոր համաձայնութիւններուն: Նախագահ Սարգսեան եւ Սերկէյ Լաւրով հանգամանօրէն քննարկեցին հայ-ռուսական բարձր մակարդակի պայմանաւորուածութիւններու կատարման ընթացքը եւ նախանշեցին երկկողմ եւ բազմակողմ փոխգործակցութեան ամրապնդման ուղղուած յետագայ կատարելիքները:

Հայաստանի արտաքին գործոց նախարարը տեղեկացուց,թէ իր ռուս գործընկերոջ հետ քննարկած է նաեւ միջազգային   օրակարգը, մասնաւորապէս ՝ Ուքրանիոյ եւ Իրաքի իրավիճակը: Ան նշեց, թէ Հայաստան եւ Ռուսիա աշխուժօրէն կը փոխազդեն տարբեր միջազգային կառոյցներու մէջ: Սերտ համագործակցութիւն կը զարգանայ ՀԱՊԿ եւ ԱՊՀ շրջանակներէն ներս: Նալպանտեան յայտնեց, թէ Հայաստանի եւ Ռուսիոյ միջեւ ապրանքաշրջանառութիւնը տասը առ հարիւրի աճ արձանագրած է 2013-ին՝ կազմելով 1.445 միլիոն տոլար: Ռուսական ներդրումները Հայաստանի տնտեսութեան մէջ կազմած են 3.3 միլիառ տոլար: Ներկայիս, Հայաստանի մէջ   ռուսական դրամագլուխով կը գործէ 1300 ձեռնարկութիւն: Մօտաւորապէս 70 ռուսական տարածաշրջաններ գործընկերային յարաբերութիւններ ունին Հայաստանի մարզերուն հետ:

Սերկէյ Լաւրով յայտնեց, թէ Մոսկուա՝ երկկողմ ձեւաչափով, ինչպէս նաեւ իբրեւ ԵԱՀԿ Մինսքի խումբի համանախագահող երկիր,   շահագրգռուած է   Լեռնային Ղարաբաղի խնդրին շուտափոյթ կարգաւորման:« Մենք կ’ելլենք այն բանէն, որ խնդիրներու լուծման հիմք կայ, խնդրի կարգաւորման սկզբունքները արձանագրուած են նախագահներուն յայտարարութեան   մէջ: Ամենագլխաւորը այդ սկզբունքներուն իրականացման չափանիշները համաձայնեցնելն է եւ քայլերուն հետեւիլը»: Անոր խօսքով, Ռուսիա իբրեւ ԵԱՀԿ Մինսքի Խումբի համանախագահող երկիր կը ձգտի, որ շարունակուի ուղիղ երկխօսութիւնը երկու նախագահներուն միջեւ: Լաւրով ըսաւ, թէ Ռուսիա պատրաստ է աջակցելու հայ-թրքական յարաբերութիւններու բնականոնացման: Ան ընդգծեց, թէ հիմնական խօսքը Հայաստանը եւ Թուրքիան պիտի ըսեն այս մասին: Այս խնդիրին անդրադառնալով, Նալպանտեան յիշեցուց, թէ Լարով ներկայ գտնուած է հայ-թրքական արձանագրութիւններու ստորագրութեան եւ աւելցուց, թէ Ռուսիոյ դիրքորոշումը արտացոլացուած է տարբեր յայտարարութիւններու մէջ:

Աւելի ուշ,Հայաստանի   նախագահ Սերժ Սարգսեան ընդունեց պաշտօնական այցելութեամբ Երեւան ժամանած Ռուսիոյ արտաքին գործոց նախարար Սերկէյ Լաւրովը: Ողջունելով հիւրին, նախագահ Սարգսեան վստահութիւն յայտնեց, որ Լաւրովի այցելութիւնը Հայաստան,նախկին այցելութիւններուն նման արդիւնաւէտ քայլ կը դառնայ երկու   պետութիւններուն միջեւ յարաբերութիւններու ամրապնդման ճանապարհին: Նախագահ Սարգսեան եւ Սերկէյ Լաւրով հանգամանօրէն քննարկեցին հայ-ռուսական բարձր մակարդակի պայմանաւորուածութիւններու կատարման ընթացքը եւ նախանշեցին երկկողմ եւ բազմակողմ փոխգործակցութեան ամրապնդման ուղղուած յետագայ կատարելիքները:

LEAVE A REPLY

Please enter your comment!
Please enter your name here