ՀՀ Նախագահ Սերժ Սարգսեան Վրաստան Կատարած Պաշտօնական Այցի Ծիրէն Ներս Այցելեց Թիֆլիսի Սուրբ Էջմիածին Եկեղեցին

0
112

ՀՀ նախագահ Սերժ Սարգսեան եւ անոր ուղեկցող պատուիրակութեան անդամները, Վրաստան կատարած այցի ծիրէն ներս, յունիս 19-ին, այցելեցին Թիֆլիսի Սուրբ Էջմիածին եկեղեցի: Բարձրաստիճան հիւրերուն դիմաւորեցին Վիրահայոց թեմի առաջնորդ Գերաշնորհ Տ. Վազգէն եպիսկոպոս Միրզախանեանը, հոգեւոր դասը, Վրաստանի մէջ ՀՀ դեսպանութեան դիւանագէտներ, վիրահայ համայնքի ներկայացուցիչները:

Հայոց հինաւուրց եկեղեցւոյ մէջ մոմեր վառելէ ետք, ՀՀ նախագահը հոգեւոր դասի ուղեկցութեամբ, ծաղիկներ զետեղեց եկեղեցւոյ բակին մէջ  Հայոց ցեղասպանութեան զոհերու յիշատակին կանգնեցուած խաչքարին:

Նախագահ Սարգսեան այցելեց Թեմի «Հայարտուն» կրթա-մշակութային եւ երիտասարդական կեդրոն, ուր բարի գալուստի ջերմ խօսքերով եւ ՀՀ ու Վրաստանի պետական օրհներգներու կատարմամբ, բարձրաստիճան հիւրերուն դիմաւորեցին Մովսէս Խորենացիի անուան նախակրթարանի սաները: Հայաստանէն ժամանած հիւրերը ունկնդրեցին նաեւ ազգային նուագարաններու` տհոլի եւ տուտուկի դասարաններու սաներու կատարումները:

Կեդրոնի «Ներսէս Շնորհալի» պատանեկան համոյթի կատարմամբ «Երեւան» երգի հնչիւններու ներքոյ պատուիրակութեան անդամներուն Գալուստ Կիւլպէնկեան սրահին մէջ դիմաւորեցին վիրահայ  կառոյցներու ղեկավարները, պաշտօնէութեան եւ հասարակայնութեան ներկայացուցիչները: Նախագահը դիտեց նաեւ  սրահին մէջ կազմակերպուած «Ջաւախք աշխարհն իր եկեղեցիներով» խորագիրով  Արման Թորոսեանի եւ Հրաչեայ Սաֆարեանի անհատական ցուցահանդէսը:

Վիրահայոց թեմի առաջնորդը Հայաստանի նախագահին ներկայացուց թիֆլիսահայութեան արժանաւոր դէմքերուն, կառոյցներու ղեկավարներուն, պատմեց «Հայարտուն» մշակութային օճախի մասին, որու գործունէութիւնը ուղղուած է Վրաստանի մէջ մայրենի լեզուի պահպանման, ազգային մշակոյթի զարգացման:Սրբազան հայրը խօսեցաւ հրատապ խնդիր ներկայացնող Պ.Ադամեանի անուան հայ պետական  թատրոնի վերանորոգութեան, Վրաստանի մէջ եկեղեցական ժառանգութեան պահպանութեան եւ վերականգնման, կրթութեան եւ մշակոյթի բնագաւառի հարցերու շուրջ, կարեւոր համարեց ՀՀ Սփիւռքի, Մշակոյթի, Կրթութեան եւ գիտութեան, Մարմնակրթութեան եւ երիտասարդութեան հարցերու նախարարութիւններու հետ արդիւնաւէտ համագործակցութիւնը, անոնց ծրագիրներուն վիրահայութեան մասնակցութիւնը: Թեմակալ առաջնորդը բարգաւաճում մաղթեց մայր հայրենիքին եւ արեւշատ օրեր ՀՀ նախագահին:

ՀՀ նախագահն իր գոհունակութիւնը արտայայտեց Վիրահայոց թեմի համայնքային գործունէութեան կապակցութեամբ եւ բարեմաղթեց յաջողութիւններ Վրաստանի մէջ հայոց մշակութային արժէքներու պահպանութեան, հայ-վրացական բարեկամութեան խորացման ուղղութեամբ:

LEAVE A REPLY

Please enter your comment!
Please enter your name here