ԱՆԳԼԻԱ – ԳՈՍԹԱ ՌԻՔԱ 0-0: ԱՆԳԼԻԱ ԱՌԱՆՑ ՅԱՂԹԱՆԱԿԻ ԴՈՒՐՍ ՄՆԱՑ ՄՈՆՏԻԱԼԷՆ

0
189

ՄՈՆՏԻԱԼ 2014

Պելօ  Հորիզոնթէի  « Էսթատիօ  Մինէյարօ»  մարզադաշտին մէջ, Անգլիա- Գոսթա Ռիքա  հանդիպումով սկսան   Մոնտիալ  2014-ի   Դ. Խմբակի  երրորդ   հանգրուանի  մրցումները:

Գոսթա Ռիքայի  հաւաքականը արդէն իսկ ապահոված է 1/16-րդ  հանգրուանի ուղեգիրը:  Անգլիոյ  համար այս  հանդիպումը արժանապատուութեան հարց էր: Նախապէս, Մոնտիալի  պատմութեան մէջ Անգլիոյ  հաւաքականը միայն 1950 եւ 1958-ին ձախողած է  խմբային  հանգրուանէն անցնիլ   յաջորդ  հանգրուան: Այս տարուանը դարձաւ երրորդը: Կ’արժէ  նշել, որ Անգլիոյ  հաւաքականը   նոյն՝ «Պելօ Հորիզոնթէ»  մարզադաշտին մէջ կրած է Մոնտիալի պատմութեան ամենացնցիչ  պարտութիւններէն մէկը, երբ 1950-ին, 1-0 արդիւնքով  խոնարհած է Միացեալ  Նահանգներուն առջեւ:  Ուստի  մրցումէն առաջ իսկ Գոսթա Ռիքայի դէմ պարտութեան  ուրուականը կը  հալածէր անգլիացիները: Անգլիոյ  հաւաքականի մարզիչ Ռոյ Հոճսըն կատարած էր ինը փոփոխութիւն:

Հանդիպումը  սկսաւ  Գոսթա Ռիքայի  յարձակումներով: Անգլիոյ  բերդապահը  կատարեց  քանի մը կարեւոր միջամտութիւններ եւ  յաջողեցաւ   մրցումին մէջ պահել  իր հաւաքականը: 27-րդ եւ 34-րդ վայրկեաններուն  Սթարիճ կորսնցուց  ոսկէ առիթներ: Անգլիացիները  չտապաւորեցին: Առաջին կիսախաղը վերջ գտաւ  սպիտակ հաւասարութեամբ:

Երկրորդ  կիսախաղը  առաջինին կրկնութիւնն էր:  Տարածքային  առաւելութիւնը  Գոսթա Ռիքայի կողմն էր: 64-րդ   վայրկեանին, Տանիէլ Սթարիճի  անձնասէր խաղը  անգլիացիները   զրկեց    մրցումին առաջին կոլը նշանակելու ուրախութենէն: Հանդիպումը  վերջ գտաւ  0-0   հաւասարութեամբ:

Գոսթա Ռիքա դաշտ ներկայացաւ հետեւեալ կազմով՝ Նաւաս, Կամպօա, Տուարթէ, Կոնզալէս, Միլլըր, Տիազ, Ռուիզ, Պորկէս(Պարանթէս), Թեժէտա, Պրենէս(Պոլանոս), Գեմպըլ(Ուրենա):

Անգլիա դաշտ ներկայացաւ հետեւեալ կազմով՝  Ֆոսթըր, Ճոնզ, Սմոլինկ, Գէյհիլ, Շօ, Լամփարտ, Ուիլշայր(Ճեռարտ), Միլնըր(Ռունի), Պարքլի, Լալանա(Սթերլինկ), Սթարիճ:

LEAVE A REPLY

Please enter your comment!
Please enter your name here