ՍԻՆԻՈՐԱ՝ ՄԻԱՅՆ ԱԶԳԱՅԻՆ ՄԻԱՍՆԱԿԱՆՈՒԹԵԱՄԲ ԿԱՐԵԼԻ ՊԻՏԻ ԸԼԼԱՅ ՊԱՅՔԱՐԻԼ ԱՀԱԲԵԿՉՈՒԹԵԱՆ ԴԷՄ

0
114

Լիբանան դարձեալ ինկաւ պայթումներու օղակին մէջ, երբ Ուրբաթ օրուան Տահր Ալ Պայտարի պայթումէն ետք, Երկուշաբթի գիշեր( ժամը՝ 23.41) հարաւային արուարձաններու մուտքին գտնուող Շաթիլայի դարձուածքին վրայ, լիբանանեան բանակի անցակէտի մը մօտ վայրի մը մէջ, տեղի ունեցաւ անձնասպանական գործողութիւն մը: Պայթումին հետեւանքով նահատակուեցաւ ընդհանուր ապահովութեան քննիչ՝ Ապտէլ Քարիմ Հատրաժ անունով երիտասարդ մը: Քսան ուրիշներ մարմնական տարբեր   վնասուածքներ ստանալով փոխադրուեցան   հիւանդանոց: Անձնասպանական գործողութիւնը կատարուեցաւ ականուած ինքնաշարժի մը (Մերսետես-300) միջոցաւ: Պայթող ռումբը կը կշռէր անուազն   25 քիլօկրամ: Կառավարութեան մօտ զինուորական ատեանի դատախազ Սաքր Սաքր   յայտնեց, թէ ցարդ կարելի չէ եղած բացայայտել ահաբեկչական գործողութիւնը կատարող անձին ինքնութիւնը: Քննութիւնները աւարտելէ ետք, ապահովութեան մարմիններ երէկ առաւօտեան վերաբացին պայթումին վայրը տանող գլխաւոր ճանապարհները:

Անվտանգութեան կառոյցներ առաւելագոյն հետեւողականութեամբ կը հսկեն   ապահովական կայունութեան Ներքին ապահովութեան ուժեր կը հետապնդեն երկու այլ ահաբեկիչներու հետքերը: Վարչապետ Թամամ Սալամ   դատապարտեց պայթումը, յայտնելով որ Լիբանան պիտի չդառնայ որեւէ պետութեան նամակատունը եւ կը մերժէ դառնալ համայնքային ու յարանուանական բախումներու   թատերաբեմը:Միացեալ Նահանգներ դատապարտեց Թայունէի պայթումը եւ իր զօրակցութիւնը յայտնեց լիբանանեան բանակին եւ ապահովական կառոյցներուն: Մուսթաքպալ Հոսանքի պետ Ֆուատ Սինիորա դատապարտեց պայթումը, աւելցնելով որ ահաբեկչութեան դէմ պայքարը կը սկսի սահմանագիծը ահաբեկչական կազմակերպութիւններուն առջեւ փակելու   քայլէն: « Միայն ազգային միասնականութեամբ կարելի պիտի ըլլայ պայքարիլ ահաբեկչութեան դէմ». շեշտեց Սինիորա:  

Վարչապետ Թամամ Սալամ վարչապետարանին մէջ ընդունեց զբօսաշրջութեան նախարար Միշէլ Ֆարաոնը եւ քննարկեց   երկրին ապահովական իրավիճակը: Սալամ ընդունեց Լիբանանի մօտ ՄԱԿ-ի ընդհանուր քարտուղարի պատուիրակ Տերէք Փլամլին, հարաւի մէջ ՖԻՒՆԻԼ-ի խաղաղապահ ուժերու ընդհանուր հրամանատար զօրավար Փաուլօ Սէրան եւ այլ անձնաւորութիւններ: Փլամլի եւ Սերա  նաեւ այցելեցին խորհրդարանի նախագահ Նեպիհ Պըրրիին: Վերջինս, իր հիւրերուն յայտնեց, թէ Միջին Արեւելքի հակամարտութեան հիմքը պաղեստինեան հարցն է, որ վտանգուած է   վերջին հանգրուանին:

LEAVE A REPLY

Please enter your comment!
Please enter your name here