ՄՈՆՏԻԱԼ 2014- ՀՈԼԱՆՏԱՑԻՆԵՐՈՒ ՈՉ ՏՊԱՒՈՐԻՉ ՅԱՂԹԱՆԱԿԸ

0
182

ՀՈԼԱՆՏԱ – ՄԵՔՍԻՔՕ՝ 2-1

Ֆորթալեզայի « Էսթատիօ Կովերնատոր Գասթելօ» մարզադաշտին մէջ, 58867 մարզասէրներուն ներկայութեան, Կիրակի երեկոյեան ժամը   19.00-ին, Հոլանտայի եւ Մեքսիքոյի   միջեւ տեղի ունեցաւ Մոնտիալ 2014-ի   1/16-րդ   հանգրուանի երրորդ   հանդիպումը: Ռոպին Վան Փըրսի պատիժը ամբողջացնելէ ետք կը վերադառնար Հոլանտայի կազմին, մինչ Տըրք Քոյթ դարձալ կը խաղար   ձախ եզրային պաշտպանի դիրքին վրայ: Մեքսիքոյի կազմէն կը բացակայէր Ժոզէ Վասքուէզը: Մրցումը սկզբունքով պիտի ըլլար հոլանտական յարձակողական   ֆութպոլին եւ մեքսիքական թաքթիքական ֆութպոլին միջեւ պայքար մը: Կ’արժէ նշել որ երկու   հաւաքականներուն միջեւ   վերջին չորս հանդիպումներէն երեքը վերջ գտած են հոլանտացիներուն յաղթանակով, մէկը՝ հաւասարութեամբ: Սակայն, Մեքսիքօ եւ Հոլանտա իրարու դէմ միայն մէկ անգամ հանդիպած են Մոնտիալի պատմութեան մէջ՝ 1998-ի Մոնտիալին: Հանդիպումը վերջ գտաւ՝ 2-2 հաւասարութեամբ: Հոլանտա դաշտ ներկայացաւ Մոնտիալի   գծով, վերջին տասը կատարած մրցումներուն արձանագարած ինը յաղթանակներով: Տըրք Քոյթ դարձաւ Հոլանտայի շապիկը հարիւր անգամ կրող եօթներորդ ֆութպոլիստը:

Մրցումը սկսաւ Մեքսիքոյի խաղային եւ տարածքային առաւելութեամբ: Հոլանտացի կարգ մը ֆութպոլիստներ՝ Ռոպին Վան Փըրսի, Ուեսլի Շնայտըր կարծէք բացակայ էին դաշտէն: Առաջին կիսախաղը վերջ գտաւ 0-0 հաւասարութեամբ:   Ընդմիջումէն ետք, 48-րդ վայրկեանին, Ճիովանի Տոս Սանթոս գեղեցիկ հարուածով մը բացաւ   կոլերու հաշիւը: Նոյնիսկ այս կոլը չսթափեցուց հոլանտացիները: Անոնց խաղը կ’ընթանար միապաղաղ: Մրցումի միայն վերջին տասը վայրկեաններուն հոլանտացիները սկսան մտնել պայքարին մէջ: 89-րդ վայրկեանին, Ուեսլի Շնայտըր գեղեցիկ հարուածով մը   հաւասարեցուց հաշիւը, իսկ մրցումի հաշուած վայրկեաններուն (94), իրաւարարը Հոլանտային շնորհեց վիճելի փենալթի մը: Քլաս Իան  Հանթելար յաջողեցաւ կոլի վերածել փենալթին եւ ձեռք բերել ոչ արժանի յաղթանակ մը:

Մեքսիքոյի բերդապահ Կիլերմօ Օչուա ընտրուեցաւ մրցումին   լաւագոյն ֆութպոլոստը:

Հոլանտա դաշտ ներկայացաւ հետեւեալ կազմով՝ Սիլսէն, Տը Ֆրէյ, Վլաար, Վերհաղ (Տեպայ), Պլինտ, Ռոպէն, Ուինալտոմ, Տը Եոնկ(Ինտի), Շնայտըր, Վան Փըրսի(Հանթելար), Քոյթ:

Մեքսիքօ դաշտ ներկայացաւ հետեւեալ կազմով՝ Օչուա, Մորենօ(Ռեյէս), Կուարտատօ, Ռոտրիկէզ, Ակուիլար, Մարքուէզ, Լայուն, Սալսիտօ, Հերերա, Փերալթա(Հերնանտէզ) Տոս Սանթոս(Աքինօ):

LEAVE A REPLY

Please enter your comment!
Please enter your name here