ՄՈՆՏԻԱԼ 2014- ՊՐԱԶԻԼ, ԳՈԼՈՄՊԻԱ ՀԱՍԱՆ ՔԱՌՈՐԴ ԱՒԱՐՏԱԿԱՆ ՀԱՆԳՐՈՒԱՆ

0
141

ՊՐԱԶԻԼ – ՉԻԼԻ՝ 1- 1 ( 3 – 2 ՓԵՆԱԼԹԻՆԵՐՈՎ )

Պրազիլի   հաւաքականը դարձաւ Մոնտիալ 2014-ի քառորդ աւարտական   հանգրուանին ուղեգիրը ապահովող առաջին   կազմը: Պրազիլ տրամաթիք յաղթանակ մը արձանագրեց հարաւամերիկեան իր մրցակիցին Չիլիի դէմ, երբ մրցումի 90 վայրկեանները եւ յաւելեալ կէս ժամը 1-1 հաւասարութեամբ վերջ գտնելէ ետք, փենալթի հարուածներու   շնորհիւ՝ 3-2 արդիւնքով պարտութեան մատնեց իր մրցակիցը: : 57714 մարզասէրներ, «Էսթատիօ Մինէյրաօ» մարզադաշտին մէջ հետեւեցան Պրազիլի վերջին յաջողութեան:

Պրազիլի հերոսը անկասկած բերդապահ   Խուլիօ Սեզարն էր: Ան յաջողեցաւ որսալ երկու   վճռական փենալթի հարուածներ: Չիլիցիները պարզապէս անբախտ դուրս եկան   հանդիպումէն, երբ մրցումի   վերջին վայրկեաններուն Փինիլայի հուժկու հարուածը բերդին մէջ յայտնուելու փոխարէն ձողին դպչելով վրիպեցաւ թիրախէն:Այլապէս, Պելօ Հորիզոնթէ քաղաքի մարզադաշտին մէջ   համախմբուած պրազիլիացիները պիտի ըլլային շնչասպառ…:

Խուլիօ Սեզար յաջողեցաւ զսպել Մորիսիօ Փինիլայի եւ   Ալեքսիս Սանչէսի փենալթի հարուածները: Վճռական   փենալթին կորսնցուց Կոնզալօ Ժարան: Անոր հարուածը աջ ձողափայտին դպչելով, բերդին մէջ ուղղուելու փոխարէն՝ շեղեցաւ նպատակէն: Տաւիտ Լուիզ եւ Մարչելօ   կոլի վերածեցին իրենց փենալթիները: Ուիլիան եւ Հալք՝ դուրս հարուածեցին: Նէյմար՝ հանդարտօրէն կոլի վերածեց հինգերորդ եւ վերջին փենալթին, Պրազիլին շնորհելով   քառորդ աւարտականի ուղեգիրը:

Ճակատումը սկսաւ երկուստեք յարձակումներով: 18-րդ վայրկեանին, անկիւնային հարուածի մը պահուն, Տաւիտ Լուիզ նշանակեց   մրցումին եւ Պրազիլի առաջին կոլը: 32-րդ վայրկեանին, Ալեքսիս Սանչէս   հաւասարեցուց հաշիւը: Առաջին կիսախաղը վերջ գտաւ՝1-1 հաւասարութեամբ: Երկրորդ կիսախաղը   ընթացաւ առաջինէն աւելի հետաքրքրական:

Պրազիլի   հաւաքականը հոգեբանական առաւելութեամբ ներկայացաւ դաշտ: Պրազիլիացիները երբեք պարտութիւն չէին կրած Չիլիէին իրենց երկրին մէջ, իսկ Մոնտիալի պատմութեան ընթացքին անոնց միջեւ ցարդ երեք հանդիպումները վերջ գտած էին Պրազիլի յաղթանակով: Չիլի, վերջին անգամ՝ 14 տարիներ առաջ պարտութեան մատնած էր Պրազիլը:

Մրցումէն առաջ, Պրազիլի մարզիչ    Լուիզ Ֆիլիփէ Սքոլարի իր տղոց զգուշացուցած էր, թէ սխալները աններելի պիտի ըլլան Չիլիի նման մրցակիցի մը դէմ: Վարկաս եւ Վիտալ մնայուն սպանալիք   մնացին Պրազիլի պաշտպանութեան: Պրազիլի պարագային, Նէյմարէն բացի, առանձնապէս ոչ   մէկը վտանգ կը ներկայացնէր Չիլիի պաշտպանութեան: Պէտք է նաեւ ընդունիլ, որ մրցումին ընթացքին, Չիլի աւելի տարածքային առաւելութիւն կը վայելէր քան Պրազիլը( 52 առ հարիւր ընդդէմ 48): Հակառակ այս   յաղթանակին, Պրազիլի ներկայի կազմը տակաւին շատ հեռու կը մնայ անցեալի փառքի օրերէն: Ճիշդ է, որ անոնք կը վստահին բաւական յուսալի պաշտպանութեան, սակայն յարձակողական գիծին գործողութիւնները սահմափակ կը մնան, յատկապէս, առանց Նէյմարի…:

Պրազիլ դաշտ ներկայացաւ հտեւեալ կազմով՝ Խուլիօ Սեզար, Տանի Ալվէս, Մարչելօ, Լուիզ Կիւսթավօ, Թիակօ Սիլվա, Տաւիտ Լուիզ, Օսքար(Ուիլիան), Ֆերնանտինիօ (Ռամիրէզ),   Ֆրէտ (Ճօ), Նէյմար, Հալք:

Չիլի դաշտ ներկայացաւ հետեւեալ կազմով՝ Պրաւօ, Իսլա, Մենա, Ժառա, Մետէլ (Ռոխաս), Սիլվա, Արանկուիզ, Տիազ, Վիտալ( Փինիլա), Ալեքսիս Սանչէս, Վարկաս (Կութիյէրէզ):

LEAVE A REPLY

Please enter your comment!
Please enter your name here