ԽՈՐՀՐԴԱՐԱՆԸ ՆՈՐ ՆԱԽԱԳԱՀ ԸՆՏՐԵԼՈՒ ՀՐԱՒԻՐՈՒԱԾ Է ՉՈՐԵՔՇԱԲԹԻ ՕՐ

0
140

Սկզբունքով   լիբանանեան խորհրդարանը  Չորեքշաբթի առաւօտեան հրաւիրուած է ընտրելու երկրին նոր նախագահը: Հակառակ   յղուած հրաւէրին,   դէտերու կարծիքով, այսօրուան նիստը պիտի ունենայ   իր նախորդներուն   ճակատագիրը:

Ընտրութիւններու նախօրեակին, Լիբանանեան Ուժեր Կուսակցութեան գործադիր խոհուրդի   պետ Սամիր Ժաաժա բաց նամակ մը գրեց նախորդ նիստերէն բացակայող   երեսփոխաններուն, դիտել տալով որ ապագայ սերունդներուն   անհրաժեշտ է հայրենիք մը ժառանգ   ձգել եւ ոչ՝ անձեր: Պքերքէ անգամ մը եւս յստակացուց իր դիրքը՝ թէ նախագահական   ընտրութիւնները կը մնան առաջնայնութիւն եւ երբեք չի փափաքիր մխրճուիլ   քաղաքական բանավէճերու մէջ:

Միւս կողմէ, գարտինալ Ռայի ցանկութիւն յայտնած է այցելելու ՄԱԿ-ի Ապահովութեան Խորհուրդի մնայուն անդամ պետութիւններուն մայրաքաղաքները, ընտրական գործընթացը քննարկելու նպատակով: Ռիատ պաշտօնապէս Սաատ Հարիրիին փոխանցած է, թէ կը մերժէ Միշէլ Աունը տեսնել Պաապտայի պալատին մէջ: Պքերքէի շրջանակներ կը յայտնեն, թէ Աունի դէմ   վերջին ճակատումը կրնայ հասցնել Լիբանանի նահատակութեան: Երեսփոխան Ամին Ուահպէ ցաւ յայտնեց,որ Միշէլ Աունին չի հետաքրքրեր սահմանադրութիւնը, որովհետեւ ամէն գնով կը փորձէ հասնիլ նախագահութեան: Փարիզի մէջ, Ընկերվարական Յառաջդիմական Կուսակցութեան պետ Ուալիտ Ճոմպլաթ նախագահ Ֆրանսուա Հոլանտի հետ իր հանդիպումին լոյսին տակ յայտարարեց, թէ Ֆրանսա   մօտէն կը հետեւի նախագահական ընտրութիւններու թղթածրարին .« Միասնաբար կը փափաքինք նախագահ մը ընտրել երկրին, սակայն պէտք է սպասել, ըստ երեւոյթին». ըսաւ Ճոմպլաթ: Ան նաեւ տեսակցութիւն մը ունեցաւ նախկին նախագահ Միշէլ Սըլէյմանի հետ:

 Անվտանգութեան մարմիններ կը հաղորդեն, թէ Նափոլիոն պանդոկին մէջ   ձերբակալուած ֆրանսահպատակ ահաբեկիչին հետ հարցաքննութիւնները կը շարունակուին: Լրատուական աղբիւրներ կը հաղորդեն, թէ անձնասպանական գործողութիւն կատարող անորոշ թիւով ահաբեկիչներ մուտք գործած են Լիբանան: Ներքին գործոց նախարար Նիհատ Մաշնուք   դիտել տուաւ, թէ   կացութիւնը բաւական նուրբ է,որուն պատճառով անվտանգութեան կառոյցները աչալրջօրէն կը կատարեն իրենց պարտականութիւնները: Մաշնուք գլխաւորեց անվտանգութեան ընդհանուր խորհուրդի   նիստին:

Մուսթաքպալ Հոսանքի քաղաքական դիւանի անդամ Մուսթաֆա Ալլուշ հաւաստեց, թէ Տաաշի գործունէութեան գոյութիւն չունի Լիբանանի մէջ:

Վարչապետ Թամամ Սալամ հաւաստեց, թէ կառավարութեան մէջ ստեղծուած համախոհական մթնոլորտը իր դրական   անդրադարձը կ’ունենայ երկրին ապահովական կայունութիւնը պահպանելու աշխատանքներուն վրայ: Սալամ նշեց, թէ սուրիական իշխանութիւններուն հետ տակաւին չէ քննարկած   Լիբանան ապաստանած սուրիացի գաղթականներուն պարագան: Սալամ ընդունեց ՄԱԿ-ի ընդհանուր քարտուղարի անձնական պատուիրակ Տերէք Փլամլին եւ քննարկեց ներլիբանանեան բեմին վերջին զարգացումները: Դիւանագէտը ողջունեց լիբանանեան կառավարութեան մէջ տիրող համախոհական մթնոլորտը, հաւաստելով թէ միջազգային ընտանիքը նախանձախնդիր կը մնայ ահաբեկչութեան դէմ լիբանեան կառավարութեան քայլերուն պաշտպանութեան:

LEAVE A REPLY

Please enter your comment!
Please enter your name here