ՆԱԽԱԳԱՀԻ ԸՆՏՐՈՒԹԵԱՆ ՈՒԹԵՐՈՐԴ ՆԻՍՏԸ ՅԵՏԱՁԳՈՒԵՑԱՒ – ՏԱԳՆԱՊԸ ԿԸ ԽՈՐԱՆԱՅ

0
115

Նախագահի ընտրութեան   ութերորդը նիստը ունեցաւ նախորդներուն ճակատագիրը: Սովորականին նման Մարտ 14-ի ուժերը ներկայացնող   երեսփոխանները ներկայացան Խորհրդարան: Մարտ 8-ի երեսփոխանները՝ ոչ: Խորհրդարանի նախագահ Նեպիհ Պըրրի մերժեց նախագահական գործընթացը սառեցնել եւ նախապատուութիւնը տալ խորհրդարանական ընտրութիւններուն:  Պըրրի   նշեց, թէ անհնար է վերադառնալ ազգային երկխօսութեան նիստերուն՝ ապահովական ներկայ պայմաններուն,ինչպէս նաեւ   տիրող քաղաքական անորոշութեան տակ: Ան նաեւ   ընդգծեց, թէ   նախագահը ժողովուրդէն ընտրելու Միշէլ Աունի առաջարկը ապագային կը վերաբերէր եւ ոչ՝ ներկայի: Պըրրի նաեւ մերժեց դարձեալ երկարաձգել գործող   խորհրդարանին ժամկէտը: Վերջինս արդէն, Նոյեմբեր 2014-ին, 17 ամիսով երկարաձգած էր իր պաշտօնավարութեան ժամկէտը: Այս առիթով, Պըրրի տրամադրութիւն յայտնեց խորհրդարանական խմբաւորումներու պետերուն հետ, քննարկելու նախագահական գործընթացը: Վերադառնալով խորհրդարանի նիստին, Պըրրի, մեծամասնութիւն չգոյանալու պատճառով, 23 Յուլիսին յետաձգեց նախագահի   ընտրութեան յաջորդ նիստը: Երեսփոխան Մուհամմէտ Քապպանի նշեց,թէ Աունի առաջարկը գոյութիւն ունեցող օրէնսդրութիւնը քանդելու քայլ մըն է պարզապէս: Երեսփոխան Ահմէտ Ֆաթֆաթ ըսաւ, թէ Աունի առաջարկը լիբանանեան իրականութենէն փախուստ տալու փորձ   մըն է:

Ներքին գործոց նախարար Նիհատ Մաշնուք շեշտեց, թէ անվտանգութեան կառոյցներ հակակշիռի տակ կը պահեն երկրին ապահովական կայունութիւնը: Նախարարը դիտել տուաւ, թէ անվտանգութեան ծառայութիւններ մօտէն կը հետապնդեն կասկածելի ինքնաշարժներ եւ մոթորսիքլէթներ: Մաշնուք յայտնեց, թէ Նափոլիոն եւ Տը Ռոյ պանդոկին մէջ ձերբակալուած կասկածելիները կը պատկանին   միեւնոյն կազմակերպութեան: Թրիփոլիի մէջ եւս կը տիրէ լարուածութեան մթնոլորտ: Վերջին ժամերուն, հիւսիսի մայրաքաղաքի տարբեր վայրերու մէջ բանակը բախումներ կ’ունենայ զինեալ կազմակերպութիւններու հետ: Անծանօթներ ձեռնառումբ մը նետեցին Թրիփոլիի կանաչեղէին շուկային մէջ գտնուող սրճարաններէն   մէկուն վրայ, վիրաւորելով չորս անձեր:

Նշենք, թէ   Լիբանան ժամանած սէուտական անվտանգութեան պատուիրակութիւնը լուսարձակներէ հեռու շփումներ կ’ունենայ լիբանանցի պաշտօնակատարներու հետ: Միւս կողմէ, Ֆրանսա մօտէն կը հետեւի ձերբակալուած ֆրանսահպատակ ահաբեկիչին հարցաքննութիւններուն: Վերջին ժամերուն, անվտանգութեան մարմիններ տեղեկութիւններ քաղած են Ռումիյէի բանտէն փախուստ   կազմակերպելու ծրագիրի մը նախապատրաստութիւններուն մասին: Այս պատճառով, ապահովական խիստ կանխամիջոցներ ձեռնարկուած են Ռումիյէի   բանտին շուրջ:

LEAVE A REPLY

Please enter your comment!
Please enter your name here