Ֆրանսա Վստահութեան Մթնոլորտ Ստեղծելու Կոչ Կ՛ընէ Հայաստանին Եւ Ատրպէյճանին

0
119

ԵՐԵՒԱՆ, «Նիուզ».- Չորեքշաբթի, Յուլիս 2ին, Ֆրանսայի արտաքին գործոց նախարար Լորան Ֆապիւս յայտարարած է, թէ իր երկիրը, իբրեւ ԵԱՀԿ Մինսկի խմբակի համանախագահ՝ գործնականապէս կը մասնակցի Արցախի տագնապի միջնորդական առաքելութեան, հաշտութեան ուղիներ գտնելու նպատակով:
Պատասխանելով Հայաստանի եւ Ատրպէյճանի միջեւ լարուածութեան սրումի վտանգին մասին հարցումի մը, յատկապէս՝ Յունիս 5ին Նախիջեւանի սահմանին վրայ հայ երկու զինուորներու զոհուելէն ետք՝ Ֆրանսայի արտաքին գործոց նախարարը յայտարարած է, որ Փարիզ կողմերուն կոչ կ՛ընէ զերծ մնալու հակասական յայտարարութիւններէ՝ վստահութեան մթնոլորտի հասնելու ճամբան հարթելու համար, եւ կողմերը հրաւիրած է գործնականապէս նպաստելու այդ մթնոլորտի ստեղծման:
Լորան Ֆապիւս նաեւ յիշեցուցած է, որ Հարաւային Կովկաս իր այցելութեան ծիրէն ներս, Ֆրանսայի նախագահ Ֆրանսուա Հոլանտ հանդիպած էր իր հայ եւ ատրպէյճանցի պաշտօնակիցներուն հետ՝ բանակցային գործընթացին մէջ յառաջխաղացք ապահովելու եւ հիմնախնդիրին խաղաղ կարգաւորման նպաստելու համար:
Յիշեցնենք նաեւ, որ Ֆրանսուա Հոլանտ առաջարկած է կազմակերպել Հայաստանի եւ Ատրպէյճանի նախագահներուն միջեւ հանդիպում մը՝ Փարիզի մէջ:

LEAVE A REPLY

Please enter your comment!
Please enter your name here