ԷՐՏՈՂԱՆ ԸՆՏՐՈՒԵՑԱՒ ԹՈՒՐՔԻՈՅ ՆԱԽԱԳԱՀ

0
140

Թուրքիոյ նախագահական ընտրութիւնները վերջ գտան վարչապետ Ռեճէպ Թայիփ Էրտողանի յաղթանակով: Էրտողան, ընտրութեան առաջին իսկ հանգրուանին ապահովեց քուէներու 51.8 առ հարիւրը: Անոր անմիջական մրցակիցները, Էքմելէտտին Իհսանօղլու ապահովեց քուէներու 38.5 առ հարիւրը, մինչ Ժողովրդային Դեմոկրատական   Կուսակցութեան ներկայացուցիչ Սելահէտտին Տեմիրթաշ՝ 9.8 առ հարիւր: Շուրջ   53   միլիոն   թուրքեր մասնակցեցան երկրի նոր նախագահի ընտրութեան(քուէարկողներու 73.13 առ հարիւրը), որ Թուրքիոյ պատմութեան մէջ առաջին անգամ ըլլալով կայացաւ   հանրային   քուէարկութեամբ: Նախապէս, խորհրդարանը կ’ընտրէր երկրի   նոր նախագահը: Ընտրապայքարը տեղի ունեցաւ հիմնական երեք թեկնածուներու՝ վարչապետ Ռեճէպ Թայիփ Էրտողանի, Էքմելէտտին Իհսանօղլուի եւ Սելահէտտին Տեմիրթաշի միջեւ: Ընտրութիւնները վերահսկող մարմինը յայտարարեց, թէ   առաւելագոյն ձայն ապահոված   թեկնածուն, քուէներու յիսուն առ հարիւրի սահմանը չհատելու պարագային, երկրորդ ընտրութիւն տեղի պիտի ունենայ 24 Օգոստոսին: Նոր նախագահը պիտի ընտրուի հինգ տարուան ժամանակամիջոցի մը համար: Գործող նախագահ Ապտալլա Կիւլի պաշտօնավարութեան ժամկէտը կ’աւարտի 28 Օգոստոսին:

Կ’արժէ նշել, որ աւելի քան   հինգ հազար տնային վայրագութեան ենթարկուած կանայք   մերժեցին մասնակցիլ   ընտրութիւններուն:

Էրտողան՝ իբրեւ պատմական օր   գնահատականը տուաւ իր ընտրական յաղթանակին եւ խոստացաւ դառնալ համայն Թուրքիոյ նախագահը:

LEAVE A REPLY

Please enter your comment!
Please enter your name here