ՍԱԼԱՄ՝ ՀԱՄԱՁԱՅՆՈՒԹԵԱՆ ԲԱՑԱԿԱՅՈՒԹԻՒՆԸ ԱՆԴԱՄԱԼՈՒԾՈՒԹԵԱՆ ՊԻՏԻ ՄԱՏՆԷ ՕՐԷՆՍԴԻՐ ԵՒ ԳՈՐԾԱԴԻՐ ԻՇԽԱՆՈՒԹԻՒՆՆԵՐԸ

0
136

 Լիբանանեան կառավարութիւնը այսօր՝ Հինգշաբթի, վարչապետարանին մէջ պիտի գումարէ նիստ մը, վարչապետ Թամամ Սալամի գլխաւորութեամբ եւ քննարկէ Սէուտական Արաբիոյ կողմէ վերջին օժանդակութեան թղթածրարը: Նախնական խօսակցութիւններու համաձայն, յատկացուած մէկ միլիառ տոլարին 600 միլիոնը պիտի փոխանցուի լիբանանեան բանակին, մնացեալը՝անվտանգութեան   կառոյցներուն, գլխաւորաբար   ներքին գործոց նախարարութեան:

Վարչապետ Թամամ Սալամ ընդգծեց, թէ երկիրը հարուածող քաղաքական, ընկերային տագնապներուն խորքը համաձայնութեան բացակայութիւնն է: Ան դիտել տուաւ, թէ միայն համաձայնութեան շնորհիւ կարելի պիտի   ըլլայ լուծել նախագահական ընտրութիւններու տագնապը, ելեկտրականութեան սարակներու հարցը, աշխատավարձերու յաւելման թղթածրարը: Սալամ ընդգծեց, թէ համաձայնութեան բացակայութիւնը անդամալուծութեան պիտի մատնէ   օրէնսդիր եւ գործադիր իշխանութիւնները:

Նախկին վարչապետ Սաատ Հարիրի երէկ առաւօտեան մեկնեցաւ Ճետտա, որպէսզի սէուտցի պատասխանատուներու հետ քննարկէ լիբանանեան բանակին եւ ապահովութեան ուժերուն սէուտական օժանդակութիւնները   փոխանցելու կարելիութիւնները: Ներքին գործոց նախարար Նիհատ Մաշնուք ցաւ յայտնեց, թէ Արաբական Ծոցի կարգ մը պետութիւններ դրժած են   լիբանանեան բանակին օժանդակելու իրենց խոստումը:

Ընկերվար Յառաջդիմական Կուսակցութեան պետ Ուալիտ Ճոմպլաթ յայտարարեց,թէ ժամանակը եկած է իրագործելու Լիբանանին խոստացուած երեք միլիառ տոլարի խոստումը, որովհետեւ, բանակը եւ ապահովական կառոյցները խիստ անհրաժեշտութիւնը ունին այդ   օժանդակութեան: Ճոմպլաթ   նշեց, թէ արգելք մը չի տեսներ խորհրդարանին պաշտօնավարութիւնը երկարաձգելու քայլին դէմ, եթէ անիկա պայմանաւորուած է նոր նախագահի ընտրութեամբ: Ան աւելցուց,թէ համաձայն է քանի մը ամսուան համար արհեստագիտական երկարաձգումի մը: Խորհրդարանի նախագահ Նեպիհ Պըրրի հարց տուաւ՝ ո՞վ կրնայ երաշխաւորել թէ   խորհրդարանին երկարաձգումը պիտի առաջնորդէ նոր նախագահի ընտրութեան: Երեսփոխան Ժան Օղասապեան մերժեց խորհրդարանին պաշտօնավարութեան երկարաձգումը, աւելցնելով, որ խորհրդարանական թափուրը անիշխանականութիւն կրնայ ստեղծել երկրին մէջ: Օղասապեան դիտել տուաւ, թէ առաջնայնութիւնը պիտի ըլլայ նոր նախագահի ընտրութիւնը: Մուսթաքպալ Հոսանքի անդամ երեսփոխանը նաեւ նշեց, թէ Իրաքի շուրջ գոյացած շրջանային համաձայնութիւնը կրնայ եւ կրկնուիլ Լիբանանի մէջ: Մարտ 8-ի աղբիւր մը յայտարարեց, թէ խորհրդարանին երկարաձգումը արդէն իսկ դարձած է իրողութիւն:

ԶՕՐԱՎԱՐ ՔԱՀՈՒԱՃԻ ԱՅՑԵԼԵՑ ԱՐՍԷԼ

Լիբանանեան բանակի ընդհանուր հրամանատար զօրավար Ժան Քահուաճի երէկ առաւօտեան անակնկալ այցելութիւն մը տուաւ Արսէլ: Ապա, ան այցելեց Լապուէի մէջ   տեղակայուած ութերորդ զօրագունդին կեդրոնը:

ԼԻԲԱՆԱՆԵԱՆ ԿԱՐՃ ԼՈՒՐԵՐ

–         Պատանդ վերցուած լիբանանեան բանակի եւ ապահովութեան ուժերու ծառայողները ազատ արձակելու նպատակով, Ճեպհէթ Ալ Նուսրայի   հետ բանակցութիւններ վարող իսլամ կրօնաւորներու խորհուրդի ներկայացուցիչ շէյխ   Սամիհ Ըզէլտտին յայտարարեց, թէ   բանակցութիւններու ընթացքը դրական է: Ան մերժեց պատասխանել նախապայմաններու մասին իրեն ուղղուած հարցումներուն:

–         Սենտիքայական համակարգումի խորհուրդի անդամ Հաննա Ղարիպ դիտել տուաւ, թէ քաղաքական ուժեր կը փորձեն ճեղքեր յառաջացնել   համակարգումի խորհուրդին մէջ: Ան ըսաւ, թէ ուսուցիչները պիտի չսրբագրեն   պետական քննութիւնները, մինչեւ իրենց պահանջներուն որդեգրումը: Կրթական նախարար Իլիաս Պուսաապ յայտարարեց, թէ ժամանակը կը սպառի եւ չի կրնար առկախ   ձգել սրբագրութեան հարցը,որովհետեւ հազարաւոր ուսանողներ կը սպասեն քննութիւններու արդիւնքին:

LEAVE A REPLY

Please enter your comment!
Please enter your name here