Ատրպէյճանի Կողմէ Զինադադարի Խախտման Հարցը՝ ԵԱՀԿի Մէջ

0
150

ԵՐԵՒԱՆ, «Սիվիլնեթ».– Եւրոպայի մէջ անվտանգութեան եւ համագործակցութեան կազմակերպութեան մէջ (ԵԱՀԿ) Հայաստանի առաքելութեան ղեկավար, դեսպան Արման Կիրակոսեան 14 Օգոստոսին, կազմակերպութեան Մնայուն խորհուրդի յատուկ նիստին հանդէս եկած է Ատրպէյճանի կողմէ Լեռնային Ղարաբաղի հետ շփման գիծին վրայ եւ հայ-ատրպէյճանական պետական սահմանի երկայնքով զինադադարի դրութեան խախտումներուն վերաբերող յայտարարութեամբ:
Հայաստանի արտաքին գործոց նախարարութեան մամլոյ ծառայութեան համաձայն՝ դեսպանը խստիւ դատապարտած է Ատրպէյճանի սադրանքները, որոնք պատճառած են զոհեր եւ տարածաշրջանին մէջ լարուածութիւնը սրած են։ Ան նշած է, որ Ատրպէյճան կը շարունակէ խախտել Մայիս 1994ի եւ Փետրուար 1995ի եռակողմ համաձայնագիրները եւ կ՛անտեսէ ԵԱՀԿ Մինսկի խումբի համանախագահներու եւ միջազգային հանրութեան կոչերը՝ զերծ մնալու սադրիչ քայլերէ ու կարգաւորելու հակամարտութիւնը բացառապէս խաղաղ բանակցութիւններու միջոցով:
Արման Կիրակոսեան խոր մտահոգութիւն յայտնած է այն մասին, որ ատրպէյճանցի զինուորականները սկսած են գործածելու ծանր տեսակի զէնք, ինչպէս նաեւ կը շարունակեն գնդակոծել սահմանային գիւղերն ու քաղաքացիները: Ան անընդունելի նկատած է հայկական Չինարի գիւղին մէջ մարդասիրական յանձնառութեամբ գտնուող Կարմիր Խաչի ինքնաշարժի գնդակոծումը:
Հայաստանի դեսպանը դատապարտած է պատահաբար ատրպէյճանական տարածքին մէջ յայտնուած Չինարի գիւղի բնակիչ Կարէն Պետրոսեանի հրապարակային նուաստացումը, խոշտանգումներու ենթարկելը, որոնք պատճառ դարձան անոր մահուան։
Ան ընդգծած է, որ Պաքուն՝ մերժելով միջնորդներուն առաջարկները շփման գիծին վրայ միջադէպերու հետաքննութեան մեքանիզմ ստեղծելու մասին, ինքնաբերաբար կը ստանձնէ զինադադարի խախտումներու եւ մարդկային զոհերու ամբողջ պատասխանատուութիւնը:
Դեսպանը վերահաստատած է Հայաստանի եւ Լեռնային Ղարաբաղի կողմէ միջադէպերու հետաքննութեան մեքանիզմի ստեղծման կարեւորութիւնը ու նշած է, որ Հայաստան Մինսկի խումբի համանախագահ պետութիւններուն հետ անհրաժեշտ բոլոր քայլերուն պիտի ձեռնարկէ՝ սադրանքները կանխարգելելու, իրավիճակի կայունացման եւ բանակցային գործընթացի շարունակութիւնը ապահովելու եւ արցախեան հիմնահարցը բացառապէս խաղաղ, բանակցային ճանապարհով կարգաւորելու նպատակով:
Կիրակոսեան յոյս յայտնած է, որ Ռուսիոյ նախագահին նախաձեռնած Հայաստանի եւ Ատրպէյճանի նախագահներուն Սոչիի հանդիպումին իբրեւ արդիւնք Ատրպէյճան պիտի հրաժարի հայատեաց եւ ռազմատենչ հռետորաբանութենէն, վերջ պիտի տայ սադրանքներուն ու փոխարէնը ջանքեր ի գործ պիտի դնէ՝ հիմնահարցի խաղաղ կարգաւորման ուղղութեամբ:

LEAVE A REPLY

Please enter your comment!
Please enter your name here