ԿԱՌԱՎԱՐՈՒԹԵԱՆ ՆԻՍՏ ԵՐԵՔՇԱԲԹԻ ՅԵՏՄԻՋՕՐԷԻՆ

0
110

Լիբանանեան կառավարութիւնը   ընթացիկ շաբթուան մէջ պիտի գումարէ երկու նիստ: Առաջինը այսօր՝ Երեքշաբթի յետմիջօրէին ,   ուր պիտի քննարկուին քաղաքական, ապահովական եւ ընկերային օրակարգեր: Կառավարութիւնը նաեւ պիտի   քննարկէ խորհրդարանական ընտրութիւններու նախապատրաստութեան ծիրէն ներս   ընտրական խորհուրդները կազմելու   օրակարգը: Երկրորդը՝ Հինգշաբթի առաւօտեան, ուր պիտի քննարկուին  սովորական օրակարգեր:

Վարչապետ Թամամ Սալամ վարչապետարանին մէջ ընդունեց   ուժանիւթի նախարար Արթուր Նազարեանը, ելեկտրական ընկերութեան պատուիրակութեան մը ընկերակցութեամբ: Սալամ նաեւ ընդունեց   Լիբանանի մօտ Միացեալ Նահանգներու դեսպան Տէյվիտ   Հէյլը, Գարլոս Էտտէն եւ այլ անձնաւորութիւններ:

Արսէլի մէջ պատանդ վերցուած լիբանանեան բանակի եւ ապահովութեան ուժերու ծառայողներուն   ճակատագիրին մասին կը հաղորդուին հակասական տեղեկութիւններ: Ահաբեկիչներուն հետ բանակցութիւններ վարող իսլամ կրօնաւորներու պատուրիակութեան անդամ շէյխ Ատնան Իմեմէ   յայտարարեց, թէ պատանդներուն վիճակը   գոհացուցիչ է: Ըստ Իմեմէի, ահաբեկիչները կը պահանջեն, որ իշխանութիւնները ազատ արձակեն կարգ մը բանտարկեալներ, սակայն չեն փոխանցած ենթականերուն անունները: Աւելի ուշ, ծայրայեղականները սպառնացին «ցնցիչ» տեսաերիզ մը   ղրկել լիբանանեան կառավարութեան: Հեռատեսիլի «Էլ.Պի.Սի» կայանը հաղորդեց, թէ   Ճեպհէթ Ալ Նուսրային  երախշխիքներ տրուած են, թէ Արսէլի գաղթակայաններուն շուրջ   հսկողութիւնը պիտի մեղմանայ յառաջիկայ   ժամերուն: Այս հաւաստիքներուն տակ, Ճեպհէթ Ալ Նուսրա ազատ արձակած է ներքին ապահովութեան ուժերու երկու   պատանդներ: Իսլամ կրօնաւորներու խորհուրդը   միաժամանակ ողջունեց բանակցութիւններու գործընթացին այլ կողմերու մասնակցութիւնը:

Բանակը    12 սուրիացիներ ձերբակալեց արեւելեան Արսէլի մէջ: Անոնք    թակարդ մը պատրաստած էին բանակայիններու դէմ:

Խորհրդարանի նախագահ Նեպիհ Պըրրի   յայտարարեց,թէ   կրթական նախարարին   որոշումը   անբաւարար   պիտի մնայ,առանց խորհրդարանին կողմէ յատուկ օրէնքի մը քուէարկութեան: Պըրրի նշեց,թէ խորհրդարանի առաջին իսկ նիստին, դարձեալ օրակարգի վրայ պիտի   դնէ աշխատավարձերու յաւելումներու թղթածրարը:

Կրթական նախարար Իլիաս Պուսաապ   յայտարարեց,թէ նոյնիսկ եթէ   ուսուցիչները   սրբագրեն   պետական   քննութիւնները,   ինք՝ ետդարձ  պիտի չկատարէ    ուսանողներուն վկայագիր յանձնելու որուշումէն: Առ ի յստակացում, կրթական նախարար Իլիաս Պուսաապ   յայտարարեց, թէ լիբանանեան խորհրդարանը պիտի հաստատէ պետական քննութիւններու մասնակից ուսանողութեան վկայագիրները, ինչպէս պատահած էր 1987 եւ 1988 կրթական տարեշրջաններուն:

Քաղաքական գետնի վրայ, Ընկերվար Յառաջդիմական Կուսակցութեան պետ Ուալիտ Ճոմպլաթ այցելեց Պենաաշի եւ հանդիպում մը ունեցաւ երեսփոխան Սըլէյման Ֆրանճիյէի հետ: Նշենք,թէ վերջին օրերուն, Ճոմպլաթ այցելեց Միշէլ Աունին եւ Հըզպալլայի ընդհանուր քարտուղար Հասան Նասրալլային:

LEAVE A REPLY

Please enter your comment!
Please enter your name here