ՎԷՃ՝ ԽՈՐՀՐԴԱՐԱՆԻ ՊԱՇՏՕՆԱՎԱՐՈՒԹԻՒՆԸ ԵՐԿԱՐԱՁԳԵԼՈՒ ԵՒ ԸՆՏՐՈՒԹԵԱՆ ԿՈՂՄՆԱԿԻՑՆԵՐՈՒ ՄԻՋԵՒ

0
115

Խորհրդարանի նախագահ Նեպիհ Պըրրի կրկին շեշտեց, թէ պիտի մերժէ երկարաձգել խորհրդարանին պաշտօնավարութեան   ժամկէտը: Ան ըսաւ, թէ ընտրական խորհուրդներու հրաւէրը ապացոյց է, թէ կը մնար իր   տեսակէտներուն վրայ: Ան դիտել տուաւ, որ   վերջին անգամ խորհրդարանին երկարաձգումը կատարուած էր ընտրական օրինագիծ մը մշակելու պատճառաբանութեամբ, բայց այդ մէկը տեղի չէր ունեցած .«Խորհրդարանական ընտրութիւնները փրկութին մը պիտի ըլլան այն խորհրդարանէն, որ ոչ նիստեր կը գումարէ, ոչ՝ հաշուետուութիւն կը պահանջէ եւ ոչ ալ՝ հսկողութիւն կը բանեցնէ». եզրակացուց Պըրրի: Այս առիթով, ան շեշտեց,թէ աշխատավարձերու յաւելումներու թղթածրարը պիտի ըլլայ   խորհրդարանի   օրէնսդիր նիստին առաջին օրակարգը:

Մուսթաքպալ Հոսանքի անդամ երեսփոխան Ժան Օղասապեան դիտել տուաւ, թէ ընտրական   խորհուրդները աշխատանքի հրաւիրելու կառավարութեան որոշումը իրաւական   քայլ մըն է: Օղասապեան միաժամանակ հարց տոաւ.« կարելիութիւն կա՞յ   կազմակերպելու խորհրդարանական ընտրութիւններ…»: Ան աւելցուց՝ ինչպէ՞ս կարելի պիտի ըլլայ առանց հանրապեութեան նախագահի իրականացնել խորհրդարանական ընտրութիւններ: Օղասապեան նաեւ նշեց, թէ Մուսթաքպալ Հոսանքը կը մերժէ երկարաձգումը:

Երեսփոխան   Խալէտ   Զահրըման   դիտել տուաւ, որ նախագահական ընտրութիւնները կը գտնուին փակուղիի առջեւ, իսկ խորհրդարանի պաշտօնավարութեան երկարաձգումը դարձած է անխուսափելի: Երեսփոխան Սամի Ճեմայէլ սպառնաց հրաժարիլ, եթէ Փաղանգաւոր Կուսակցութիւնը որդեգրէ երկարաձգումի ընտրանքը: Երեսփոխան Նիքոլա Ֆաթուշ յայտարարեց, թէ կառավարութեան կողմէ   ընտրական խորհուրդներուն յղուած հրաւէրը ապօրէն էր, որովհետեւ սահմանադրականօրէն զանոնք աշխատանքի հրաւիրելու ժամկէտը անցած է:

Ապահովական գետնի վրայ,վարչապետ Թամամ Սալամ յայտարարեց,թէ կառավարութիւնը ոչ մէկ դերակատարութիւն ունի  Արսէլի մէջ կորսուած եւ առեւանգուած   զինուորականներու հարցով տեղի ունեցող բանակցութիւններուն մէջ: Ներքին գործոց   նախարարութիւնը նոյնպէս յայտարարեց,թէ հեռու կը մնայ բանակցութիւններէն: Ներքին գործոց նախարար Նիհատ Մաշնուք հերքեց   պատանդները ազատ արձակելու համար, ահաբեկիչներուն կողմէ   ներկայացուած ծանր   պայմաններու մասին տեղեկութիւնները: Լրատուական տեղեկութիւններու համաձայն,ահաբեկիչները, իւրաքանչիւր բանակայինի փոխարէն կը պահանջեն երկու արգելափակեալ ճիհատիստ: Քաթար յայտարարեց, թէ բանակցութիւններ սկսած է վարել զինուորականները ազատ արձակելու նպատակով: Այս ծիրին մէջ, քաթարեան պատուիրակութիւն մը ժամանած է Անգարա: Ահաբեկիչներուն հետ բանակցող իսլամ կրօնաւորներու համախմբումի   ներկայացուցիչ շէյխ Ատնան Իմեմէ յայտարարեց,թէ դրական նախաքայլեր կ’ակնկալէ բանակցութիւններէն:

LEAVE A REPLY

Please enter your comment!
Please enter your name here