ՆԻՀԱՏ ՄԱՇՆՈՒՔ ԿԸ ՀԱՒԱՍՏԷ՝ ԱՐՍԷԼԻ ԹՂԹԱԾՐԱՐԸ ՉԷ ՓԱԿՈՒԱԾ ՏԱԿԱՒԻՆ

0
109

Ներքին գործոց նախարար Նիհատ Մաշնուք յայտարարեց,թէ Արսէլի թղթածրարը չէ փակուած տակաւին: Ան   շեշտեց, թէ լուսարձակներէ հեռու պիտի պահուին առեւանգուած   զինուորները ազատ արձակելու բանակցութիւնները : Մաշնուք՝ իբրեւ   մասնակի դէպք նկատեց Արսէլի մէջ զինեալներու յայտնութիւնը: Պաշտօնական աղբիւրներ հաւաստեցին,   թէ Լիբանան որեւէ առաջարկութիւն չէ ստացած Թուրքիայէն եւ Քաթարէն՝   առեւանգուած բանակայինները ազատ արձակելու ուղղութեամբ: Ծայրայեղականներուն հետ բանակցութիւն վարող կողմերուն վկայութեամբ, ծայրայեղականները կը դժուարացնեն բանակայինները ազատ արձակելու պայմանները: Ականատեսներու վկայութեամբ,շաբաթավերջին Տաաշի եւ Ճեպհէթ Ալ Նուսրայի զինեալներ խուզարկած են Արսելի մէջ կարգ մը բնակարաններ: Անոնք   փնտռած են լիբանանեան բանակին հետ գործակցող անձեր:

Քաղաքական մեկնաբաններու կարծիքով, նախագահը ժողովուրդէն ընտրելու Միշէլ Աունի առաջարկը յեղաշրջում մըն է   Լիբանանի քաղաքական կեանքին դէմ: Ընկերվար   Յառաջդիմական Կուսակցութեան պետ Ուալիտ Ճոմպլաթ քննադատեց   Ազգային Ազատ Հոսանքը եւ Հըզպալլան Տաաշի   նմանեցնելու փորձերը. « Լիբանանցիները մէկ թշնամի ունին՝ Տաաշն է: Պատերազմը անոր դէմ տակաւին սկզբնաւորութեան   հանգրուանին մէջ է».ըսաւ ան: Այս առիթով, Ճոմպլաթ   յայտարարեց, թէ նախագահութիւնը միայն քրիստոնեաներուն չի պատկանիր,այլ՝ համայն լիբանանցիներուն:

Մարոնիներու Պշարա Ռայի գարտինալը մաղթեց, որ   նախագահական ընտրութեան 2 Սեպտեմբերի նիստը ըլլայ արդիւնաւէտ:

Խորհրդարանի նախագահ Նեպիհ Պըրրի յայտարարեց,թէ   նախագահական   ընտրութիւններուն շուրջ մնայուն   խորհրդակցութիւններ կ’ունենայ   Ուալիտ Ճոմպլաթի հետ: Լրատուական աղբիւրներ   հաղորդեցին, թէ  Սաատ Հարիրիի նախընտրութիւնը կ’երթայ բանակի ընդհանուր հրամանատար, զօրավար Ժան Քահուաճիին կամ՝ նախկին նախարար Ժան Օպէյտին: Մուսթաքպալ Հոսանքի անդամ, նախարար Նեպիլ Տը Ֆրէյժ դիտել տուաւ, թէ նախագահի բացակայութեան, Մուսթաքպալ Հոսանքը պիտի պահանջէ երկարաձգել   խորհրդարանին պաշտօնավարութեան ժամկէտը:  Երեսփոխան Ահմէտ Ֆաթֆաթ յայտնեց, թէ   Մուսթաքպալ   Հոսանքին համար առաջնայնութիւնը   նոր   նախագահի ընտրութիւնն է:

LEAVE A REPLY

Please enter your comment!
Please enter your name here