ԱՊԱՀՈՎԱԿԱՆ ՎՏԱՆԳԱՒՈՐ ԶԱՐԳԱՑՈՒՄ ԱՐՍԷԼԻ ՄԷՋ

0
109

Վտանգաւոր   պահեր կ’ապրի   Լիբանանը: Ներքին խառնաշփոթութեան վրայ եկաւ աւելնալու Տաաշի   տեսքով ապահովական սպառնալիք, որ ազգային գիտակցութեան եւ իսկական միասնականութեամբ չդիմագրաւելու պարագային, խնդրոյ առարկայ կրնայ դառնալ   Լիբանանի գոյութիւնը, ուր մնաց՝   համակեցութիւնը եւ համայնքային բազմազանութիւնը:

Երէկուան զարգացումները սկսին կառավարութեան   սովորական նիստով: Նիստը տեղի ունեցած պահուն Արսէլի մէջ նոր բռնկում մը ծագեցաւ բանակին եւ ահաբեկչական   կազմակերպութիւններու հետեւոր զինեալներու միջեւ:

Արդարեւ, լիբանանեան կառավարութիւնը երէկ առաւօտեան վարչապետարանին մէջ, վարչապետ Թամամ Սալամի գլխաւորութեամբ գումարեց նիստ մը: Կառավարութիւնը քնարկեց 62 կէտերէ բաղկացած օրակարգ մը: Նիստի ընթացքին Սալամ շեշտեց   նոր նախագահ ընտրելու անրաժեշտութիւնը,աւելցնելով թէ   ընդունելի չեն օրինական զէնքէն դուրս մնացեալ զէնքերը: Ժողովի ընթացքին, ներքին գործոց նախարար Նիհատ Մաշնուք յայտնեց, թէ առեւանգեալ զինուորականներուն   հարցը կը մնայ հրատապութիւն: Արդարադատութեան նախարար Աշրաֆ Ռիֆի պահանջեց   լուսարձակներէ հեռու հետապնդել առեւանգեալներուն թղթածրարը: Կենսոլորտի նախարար Մուհամմէտ Մաշնուք իր զօրակցութիւնը յայտնեց   լիբանանեան բանակին:

Կառավարութիւնը օրինականացուց այս տարուան պետական քննութիւններուն մասնակից ուսանողներուն յանձնուելիք վկայագիրները: Կրթական նախարար Իլիաս Պուսաապ նիստը աւարտելէ ետք, յայտարարեց, թէ ճամբորդող ուսանողները Շաբաթ օրէն սկսեալ պիտի ստանան իրեն վկայագիրները: Գալով  Արսէլի   հարցին, նախարարը դիտել տուաւ,թէ   կացութիւնը կարծուածէն շատ աւելի լուրջ է եւ ծանր: Պուսաապ աւելցուց,թէ   ներքին գործոց նախարար Նիհատ Մաշնուք   ժողովին ընթացքին յայտնած է, թէ Տաաշ կը գտնուի Լիբանանի հիւսիսային սահմաններուն վրայ եւ անոնց թիւը հազարաւորներէ աւելի է անոնց թիւը:

Իր կարգին, ներքին գործոց նախարար Նիհատ Մաշնուք   յայտարարեց, թէ կառավարութիւնը յառաջիկայ երեք օրերու ընթացքին պիտի գումարէ նիստ եւ քննարկէ Արսէլի մէջ բանակին վիճակը:

Վերադառնալով Արսէլի   զարգացումներուն, յաջորդաբար երկրորդ օրը ըլլալով, լիբանանեան բանակը Ուատի Համիտի մէջ կը կասեցնէ   զինեալներու կողմէ Սուրիոյ սահմանէն Լիբանան թափանցելու փորձեր : Առ ի հակադարձութիւն բանակին քայլերուն, երէկ առաւօտեան զինեալներ   յարձակեցան Արսէլի մէջ տեղակայուած բանակի դիրքերուն վրայ: Լիբանանեան բանակը հակադարձեց զինեալներուն եւ ռմբակոծեց անոնց   վայրերը:

Բանակի հրամանատարութիւնը լոյս ընծայեց հաղորդագրութիւն մը, յայտնելով թէ Հինգշաբթի առաւօտեան ժամը 11-ին, զրահապատուած զինեալներ յարձակում մը գործած են հինգ զինուորներէ բաղկացած  բանակի միաւորի մը վրայ: Այս յարձակումին   լոյսին տակ,բանակը   հակադարձած է զինեալներուն եւ յաջողած է ազատել,օր մը առաջ կորսուած չորս զինուորներ եւ քանդել զինեալներուն սարքերը:  Բախումներու ընթացքին նահատակուած է զինուոր մը: Չորս ուրիշներ ստացած են տարբեր աստիճանի վնասուածք:

Բանակի   ընդհանուր հրամանատար զօրավար Ժան Քահուաճի կառավարութեան նիստին ընթացքին եւ աւելի ուշ,   ուղղակի   հաղորդակցութեամբ վարչապետ Սալամը դրաւ Արսէլի զարգացումներուն մթնոլորտին մէջ:

Թերթը մինչեւ մամուլի յանձնելը, Արսէլի մէջ կը տիրէր լարուած մթնոլորտ:

Հեռու ապահովական մտահոգութիւններէն, ներքին գործոց նախարարութիւնը հրապարակեց 2014-ի խորհրդարանական ընտրութիւններու մասնակցութեան օրինագիծը: Սկզբունքով, Լիբանանի բոլոր շրջաններուն մէջ խորհրդարանական ընտրութիւնները տեղի պիտի ունենան Կիրակի, 16 Նոյեմբեր 2014-ին: Թեկնածութիւններ յայտարարելու պայմանաժամը կը սկսի Հինգշաբթի, 28 Օգոստոս 2014-ին   եւ կ’աւարտի՝ Երեքշաբթի, 16 Սեպտեմբեր 2014-ի գիշերուան ժամը 12-ին:

ԼԻԲԱՆԱՆԵԱՆ ԿԱՐՃ ԼՈՒՐԵՐ

-Առեւանգեալ զինուորականները ազատ արձակելու բանակցութիւններուն մասնակից իսլամ կրօնաւորներու խօսնակ, շէյխ Ատնան Էմեմէ մտահոգութիւն յայտնեց կարգ մը առեւանգողներու սպառնալիքներէն: էմեմէ նշեց, թէ Քաթար եւ Թուրքիա ուղղակի բանակցութիւններ կը վարեն Տաաշի հետ:

-Խորհրդարանի նախագահ Նեպիհ Պըրրի խորհրդարանը նոր նախագահ ընտրելու նիստի հրաւիրեց Երեքշաբթի,   2 Սեպտեմբեր, կէսօրուան ժամը 12-ին:

-Լիբանանի մօտՍուրիոյ դեսպան Ալի Ապտէլ Քարիմ Ալի պատրաստակամութիւն յայտնեց օգնելու լիբանանեան բանակին՝   վերջինս օգնութիւն խնդրելու պարագային:

 

LEAVE A REPLY

Please enter your comment!
Please enter your name here