ՎԱՐՉԱՊԵՏ ՍԱԼԱՄ ԿԸ ԶԳՈՒՇԱՑՆԷ ԵԼԵՒՄՏԱԿԱՆ ՏԱԳՆԱՊԷՆ

0
106

Նախագահական  ընտրութիւններու քաշքշուքին եւ ապահովական սպառնալիքներուն  զուգահեռ,  վարչապետ Թամամ Սալամ   հնչեցուց  ելեւմտական ահազանգ մը՝  մռայլ    տագնապի մը  հետեւանքներէն  զգուշացնելով  լիբանանեան բոլոր  հոսանքները: Լիբանանեան կառավարութիւնը այսօր առաւօտեան   նիստ մը պիտի  գումարէ  վարչապետարանին մէջ, վարչապետ Թամամ Սալամի գլխաւորութեամբ: Սալամ ընդունեց  արեւմտեան Պեքաայի շրջանը ներկայացնող  երեսփոխաններ:

Խորհրդարանի նախագահ Նեպիհ Պըրրի   մեկնաբանելով նախագահական  ընտրութիւններուն  վերաբերեալ Մարտ   14-ի ուժերուն  նոր  նախաձեռնութիւնը,  յայտնեց, թէ  անիկա առանձնապէս   չէր ընդգրկեր որեւէ նորութիւն, որովհետեւ  Սամիր Ժաաժա   արդէն  ներկայացուցած էր նման    նախաձեռնութիւնը մը անցեալին: Հըզպալլայի  աղբիւր  մը   յայտնեց, թէ  նախաձեռնութեան   գլխաւոր  նպատակը  Սամիր Ժաաժայի թեկնածութիւնը պատուաւոր  ձեւով  յետս կոչելու  հնարք մըն է: Երեսփոխան Ահմէտ Ֆաթֆաթ  յայտնեց, թէ  ոեւէ  նորութիւն չկայ  նոր թեկնածութիւններու  վերաբերեալ, իսկ  Մարտ 14-ի ուժերուն ներկայացուցած  նախագիծը ուղղուած է բոլորին եւ  յառաջիկայ  ժամերը պիտի  որոշեն անոր ճակատագիրը: Այս ծիրին մէջ, Փաղանգաւոր Կուսակցութիւնը  կը շարունակէ  շփումներ ունենալ տարբեր   խմբաւորումներուն հետ, որպէսզի    մեծամասնութիւն գոյացնէ Ամին Ճեմայէլի անուան շուրջ: Ճեմայէլ  յայտարարեց, թէ    թեկնածութիւնը  ի զօրու կը մնայ    նախագահական  ընտրութիւններուն եւ պահանջեց նախագահական ընտրութիւններէն ետք կայացնել խորհրդարանի ընտրութիւնները: Մուսթաքպալ Հոսանքի պետ Ֆուատ Սինիորա  հերքեց   նախընտրութիւն  դնել  Ժան Քահուաճիի եւ Ժան Օպէյտի  թեկնածութիւններուն  միջեւ եւ ընդհանրապէս  սակարկութեան մէջ մտնել, թեկնածուներու անուան շուրջ:

Առեւանգուած զինուորականները ազատ արձակելու  բանակցութիւններուն  մասնակցող  շէյխ  Մուսթաֆա  Հըժէյրի  յայտարարեց, թէ Ճեպհէթ Ալ Նուսրա, իւրաքանչիւր  զինուորական ազատ արձակելու փոխարէն, իշխանութիւններէն կը պահանջէ   տասը բանտարկեալ ազատ արձակել եւ   հրապարակային ներողամտութիւն մը կը  պահանջէ մարոնիներու Պշարա Ռայի գարտինալէն: Ճեպհէթ Ալ Նուսրա  աւելի  բարձրացնելով սպառնական  իր ոճը, դիտել տուած է, թէ  քաղաքական կարգ մը կողմեր խաղաղ աւարտ  չեն  փափաքիր  առեւանգուած  զինուորականներուն  հարցով, այլ ՝  կը փափաքին, որ անոնք ունենան  տասնապետ Ալի  Սէյիտի  ճակատագիրը…:Երէկ առաւօտեան, դատապարտումի եւ ցասումի   հոծ ալիքի տակ   տեղի ունեցաւ  լիբանանեան բանակի նահատակ Ալի Սէյիտի   յուղարկաւորութիւնը:

LEAVE A REPLY

Please enter your comment!
Please enter your name here