ԼԻԲԱՆԱՆԵԱՆ ԲԱՆԱԿԻՆ ՕԺԱՆԴԱԿՈՒԹԻՒՆՆԵՐԸ ԿՐՆԱՆ ՈՒՇԱՆԱԼ

0
134

Վարչապետ Թամամ Սալամ   շեշտեց, թէ առեւանգուած զինուորականներուն հարցը իբրեւ առաջնայնութիւն կը   ներկայանայ իր գլխաւորած կառավարութեան համար եւ   միայն միասնականութեամբ կարելի պիտի   ըլլայ լուծումի տարազ մը գտնել սոյն   տագնապին: Սալամ անընդունելի նկատեց զինուորականներուն հարցով իր հասցէին կատարոււող քննադատութիւնները: Նշենք, թէ Մարտ 8-ի ուժերը վերջին շրջանին կը քննադատեն   զինուորականները ազատ արձակելու ուղղութեամբ Սալամի քայլերը: Ներքին գործոց նախարար Նիհատ Մաշնուք   յայտարարեց, թէ Արսէլը անհրաժեշտ է ազատագրել բոլոր կապանքներէն եւ դնել   բանակին ու անվտանգութեան ուժերու վերահսկողութեան տակ: Լրատուական աղբիւրներու համաձայն, ահաբեկիչները խոստացած են յետ այսու դադրեցնել մահապատիժները:

Վարչապետ Սալամ, վարչապետարանին մէջ ընդունեց լիբանանեան տնտեսական խորհուրդները ներկայացնող պատուիրակութիւն մը, Ռաֆիք Զանթունի գլխաւորութեամբ: Հանդիպումէն ետք, Զանթուն նշեց,թէ առաջնայնութիւնը անհրաժեշտ է տալ նոր նախագահի ընտրութեան:

Ճեպհէթ Ալ Նուսրայի հետ զինուորականները ազատ արձակելու բանակցութիւնները վարող շէյխ Մուսթաֆա Հըժէյրի յայտարարեց, թէ ահաբեկիչներու հետ բանակցութիւններու դուռը   բաց կը մնայ տակաւին: Ճեպհէթ Ալ Նուսրա նոր տեսաերիզ մը սփռեց երէկ, որուն մէջ Նուսրա՝  լիբանանեան բանակի սիւննի ծառայողները կը զգուշացնէ՝ իրենց դէմ զէնք բարձրացնելու հետեւանքներէն.« Ձեր վրայ պիտի վերագրուի Հըզպալլայի ոճիրներուն հանդէպ ձեր լռութեան պատասխանատուութիւնը». կը զգուշացնէ տեսաերիզը:

Այլ   գետնի վրայ, Փարիզի մէջ Սէուտական Արաբիոյ գահաժառանգ եւ պաշտպանութեան նախարար Սալման Պըն Ապտէլ Ազիզի եւ անոր ֆրանսացի պաշտօնակիցին Իվ Լոտրիանի միջեւ հանդիպումէն ետք յայտարարուեցաւ,թէ Սէուտական Արաբիոյ հովանաւորութեամբ լիբանանեան բանակը զինելու որոշումին գործադրութիւնը ժամանակաւորապէս յետաձգուած է: Լիբանանի մօտ Միացեալ Նահանգներու դեսպան Տէյվիտ Հէյլ   հանդիպում մը ունեցաւ արտաքին գործոց նախարար Ժըպրան Պասիլի հետ եւ   յուշագիր մը փոխանցեց   բանակը զինելու առնչութեամբ:

Լիբանանեան բանակը զինելու օրակարգը տաք կրակի վրայ պիտի դրուի յառաջիկայ օրերուն, երբ Իրանի փոխարտաքին գործոց նախարար Հիւսէյն Ամիր Ապտէլ Հիան ժամանէ Լիբանան: Կ’արժէ նշել, որ Իրանի պաշտպանութեան նախարարութիւնը Թեհրան այցելութեան պաշտօնական հրաւէր մը   փոխանցած է   պաշտպանութեան նախարար Սամիր Մուքպէլին: Իրան բազմիցս՝ առանց որեւէ նախապայմանի զէնք հայթայթելու տրամադրութիւն յայտնած է լիբանանեան բանակին: Պաշտպանութեան նախարարը, Լիբանանի մօտ Ռուսիոյ դեսպան Ալեքսանտր Զասփիքինի հետ քննարկեց   երկու երկիրներուն միջեւ զինուորական համագործակցութեան կարելիութիւնները:

LEAVE A REPLY

Please enter your comment!
Please enter your name here