ՆԱԹՕ ԿԸ ՍՊԱՍԷ ՄԻՆՍՔԻ ԲԱՆԱԿՑՈՒԹԻՒՆՆԵՐՈՒՆ ԱՐԴԻՒՆՔԻՆ

0
125

Ուէյլզի մէջ (Կալես)   տեղի ունեցող ՆԱԹՕ-ի գագաթաժողովին մասնակից պետութիւնները   քննադատեցին Տաաշի կողմէ կատարուող ոճիրները եւ վայրագութիւնները:«Ռոյթըրզ» հաղորդեց, թէ Միացեալ Նահանգներ յայտարարած է Տաաշը չէզոքացնելու   միջազգային ճակատի մը ստեղծումը: Այսուհանդերձ, Միացեալ Նահանգներու պետական քարտուղար Ճոն Քերրի բացառեց ցամաքային արշաւ մը Տաաշի դէմ, զայն նկատելով կարմիր գիծ:

Գագաթաժողովին մասնակիցները քննարկեցին Ուքրանիոյ հակամարտութիւնը: Նախագահ Փիոթր Փորոշենքօ լաւատեսութիւն յայտնեց Մինսքի մէջ Ուքրանիոյ հակամարտութեան կողմերուն միջեւ նախատեսուած հանդիպումին արդիւնքէն: ՆԱԹՕ-ի գագաթաժողովին ընթացքին խօսք առնելով, Փորոշենքօ ըսաւ, թէ նախագահ Վլատիմիր Փութին անձամբ իրեն հաւաստիացուցած էր խաղաղութեան համաձայնութիւն կնքելու Ռուսիոյ ցանկութեան մասին, աւելցնելով թէ Ուքրանիոյ անջատողականները նոյնպէս պատրաստ են   բանակցութիւններուն: Բրիտանիոյ վարչապետ Տէյվիտ Գամերոն   ըսաւ, թէ Եւրոպական Միութիւնը պատրաստ է վերանայելու Ռուսիոյ դէմ պատժամիջոցներուն՝   կողմերուն միջեւ խաղաղութեան համաձայնութիւն կնքուելու պարագային: Սակայն արտաքին գործոց նախարար Ֆիլիփ Հեմոնտ աւելցուց,թէ   Եւրոպական Միութիւնը վճռական է նոր պատժամիջոցներ   հաստատելու Ռուսիոյ դէմ: Հեմոնտ ըսաւ, թէ   վերապահութեամբ կը մօտենայ Փութինի խօսքերուն:

Այսուհանդերձ, ՆԱԹՕ-ի ընդհանուր քարտուղար Անտերս Ֆոկ Ռասմուսեն յայտարարեց, թէ Ռուսիա ցարդ ոչ մէկ քայլի դիմած է խաղաղութեան ուղղութեամբ: Ան նաեւ չբացառեց Հիւսիսատլանտեան Դաշինքը ընդլայնելու կարելիութիւնները:

Աւստրալիա խոստացաւ տաք հագուստներով եւ կօշիկներով, ինչպէս նաեւ ներքնազգեստներով օգնել ուքրանական բանակին:

Ուքրանական   բանակի խօսնակ մը հաղորդեց-, թէ հակամարտութիւնը սկսելէ ի վեր, առնուազն երկու հազար ռուս զինուոր մահացած է Ուքրանիոյ տարբեր շրջաններուն մէջ:

Ուէյլզի մէջ տեղի ունեցող գագաթաժողովին ծիրէն ներս, Հայաստանի արտաքին գործոց նախարար Էտուարտ Նալպանտեան հանդիպում մը ունեցաւ իր յոյն պաշտօնակիցին Էվանկելոս Վենեզիլոսի հետ եւ քննարկեց Յունաստանի նախագահի՝ Հայաստան կատարելիք այցելութեան   նախապատրաստութիւնները,ինչպէս նաեւ տարածաշրջանային եւ միջազգային շարք մը հարցեր, որոնց մէջ Լեռնային Ղարաբաղի   հակամարտութեան կարգաւորման գործընթացը:

LEAVE A REPLY

Please enter your comment!
Please enter your name here