Պուայէ Ուրացման Դէմ Նոր Օրինագիծ Կը Ներկայացնէ

0
154

ՓԱՐԻԶ.- «Նուվել տ՛Արմէնի» կը հաղորդէ, որ Ֆրանսայի խորհրդարանի անդամ Վալերի Պուայէ 20րդ դարու ցեղասպանութիւններու եւ մարդկութեան դէմ յանցագործութիւններու ուրացումը քրէականացնող նոր օրինագիծ մը ներկայացուցած է։
Ըստ Պուայէի՝ այն ժամանակ, երբ Ֆրանսան կը պատրաստուի դիմաւորելու Հայկական Ցեղասպանութեան հարիւրամեակը, Ֆրանսայի մէջ տակաւին ոչ մէկ օրէնք պատիժ կը սահմանէ ցեղասպանութիւնները եւ մարդկութեան դէմ յանցագործութիւնները ուրացողներուն դէմ։ Միակ բացառութիւնն է Հրէական Ողջակիզումը։
Երեսփոխանը նշած է, որ երբ Ֆրանսա պաշտօնապէս կը ճանչնայ երկու ցեղասպանութիւնները՝ Ողջակիզումն ու Հայկական Ցեղասպանութիւնը, անարդար է միայն Ողջակիզումի հերքողներ պատժելու կեցուածքը։
Ըստ Պուայէի՝ բոլոր ցեղասպանութիւններու եւ մարդկութեան դէմ յանցագործութիւններու մերժումը պատժելու կարելիութիւնը կ՛արձագանգէ Իրաքի մէջ քրիստոնեաներու հետապնդումներու հարցին։
«Անհրաժեշտ է որդեգրել օրէնք մը, որ պիտի առաջարկէ ժխտման նոր դասակարգում։ Ես աշխատած եմ այլընտրանքային եւ նորարարական տարբերակի վրայ, որ քրէական իրաւունքի մասնագէտներու հետ իմ ունեցած երկար մտորումներուս արդիւնքն է։ Ահա՛ թէ ինչու ես կ՛առաջարկեմ, որ հերքումը օրէնքին մէջ այլեւս չնկատուի միայն խօսքի ազատութեան չարաշահում, այլ՝ մարդկութեան դէմ յանցագործութիւն։ Ասիկա երկու առաւելութիւն ունի. դուրս գալ խօսքի ազատութեան առնչութեամբ Սահմանադրական դատարանին ձեւաւորած կարծիքի ազատ արտայայտութեան իրաւական փակուղիէն եւ պաշտպանել բոլոր ցեղասպանութիւններուն յիշատակը», ըսած է երեսփոխանը։

LEAVE A REPLY

Please enter your comment!
Please enter your name here