ԱՌԵՒԱՆԳՈՒԱԾ ԶԻՆՈՒՈՐԱԿԱՆՆԵՐՈՒՆ ԹՂԹԱԾՐԱՐԸ ՓՈԽԱՆՑՈՒԱԾ Է ՔԱԹԱՐԻՆ

0
98

Նախարարական աղբիւրներկը հաւաստեն, թէ Քաթար մխրճուած է առեւանգուած զինուորականները ազատ արձակելու բանակցութիւններուն մէջ: Աղբիւրները միաժամանակ կը նշեն, թէ Թուրքիա   մերժած է միջնորդական բանակցութիւններուն մասնակցելու լիբանանեան կառավարութեան խնդրանքին: Վարչապետ Սալամ, Կիրակի յետմիջօրէին, Մըսայթպէյի իր բնակարանին մէջ նիստ մը գումարեց՝ առեւանգուած զինուորականները ազատ արձակելու բանակցութիւններուն հետ շփուող նախարարական   խմբաւորումին մասնակցութեամբ: Արդարադատութեան նախարար Աշրաֆ Ռիֆի յայտնեց, թէ կառավարութիւնը նախանձախնդիր կը մնայ առեւանգուած զինուորականները ազատ արձակելու իր յանձնառութեան, իսկ Թրիփոլիի մէջ համակեցութիւնը խանգարելու փորձերը դատապարտուած են ձախողութեան: Ներքին գործոց նախարար Նիհատ Մաշնուք   հերքեց այն տեղեկութիւնները, թէ կառավարութեան կարգ մը անդամներ արգիլած են Արսէլի մէջ լիբանանեան բանակին ծրագրած գործողութիւնները: Մաշնուք նշեց, թէ   վարչապետ Թամամ Սալամ   հաղորդակցութեան մէջ մտած է կարգ մը պետութիւններու հետ,որոնց մէջ Քաթարը՝ առեւանգուած զինուորականները ազատ արձակելու նպատակով, ոմանք վերապահութիւն յայտնած են, ուրիշներ՝ ընդառաջած: Նախարարը հաւաստեց, թէ պիտի չարտօնուի, որ   Տաաշ ընդարձակէ իր գործողութիւններուն ծիրը:  

Վարչապետ Սալամ   իր այցելուներուն յայտնեց, թէ մէկէ աւելի ընտրանքներ գոյութիւն ունին առեւանգուած զինուորականները ազատ արձակելու   ուղղութեամբ: Սալամ, վարչապետարանին մէջ   ընդունեց Լիբանանի մօտ Շուէտի դեսպան Նիքլաս Քիպոնը:

Պետական երեսփոխան Ժան Օղասապեան դիտել տուաւ, թէ զինուորականներուն հարցը ծայր աստիճան զգայուն ըլլալով, անհրաժեշտ է լուսարձակներէն հեռու   հետապնդել անոր լուծումը:

Շէյխ Մուհամմէտ Եազպէք զգուշացուց՝ թէ պիտի ձախողի համայնքային խռովութիւններ ստեղծելու   Տաաշի եւ անոր ետին կեցող ուժերուն   փորձերը:

Հիւսիսային Լիբանանի   տարբեր շրջաններու մէջ   զայրոյթի եւ   դատապարտումի մթնոլորտ կը տիրէ՝ լիբանանեան բանակի երկրորդ զինուոր մը՝ Տաաշի կողմէ    մահապատիժի ենթարկուելու պատճառով: «Անատոլ» լրատուական գործակալութիւնը հաղորդեց, թէ   Տաաշ   մահապատիժի ենթարկած է լիբանանեան բանակի   ութերորդ զօրագունդի ծառայող Ապպաս Մատլաժը: Վերջինիս սպանութիւնը զայրոյթ եւ ընդվզում յառաջացուց   հիւսիսային Լիբանանի եւ Պեքաայի կարգ մը շրջաններու մէջ:

Լիբանանեան բանակը շարունակեց   Արսէլի եւ Թրիփոլիի մէջ իր խուզարկութիւնները եւ կատարեց կարգ մը ձերբակալութիւններ:

LEAVE A REPLY

Please enter your comment!
Please enter your name here