ՕՊԱՄԱ ՊԱՏՐԱՍՏԱԿԱՄՈՒԹԻՒՆ ՅԱՅՏՆԵՑ ՀԱՐՈՒԱԾԵԼՈՒ ՍՈՒՐԻՈՅ ՄԷՋ ՏԱԱՇԻ ԴԻՐՔԵՐԸ

0
116

Սպիտակ  Տան մէջ  արտասանած  իր  խօսքին մէջ, նախագահ  Պարաք  Օպամա յայտարարեց, թէ   Ուաշինկթըն մտադրած  է  ընդլայնելու Տաշի դէմ  օդային գործողութիւնները  եւ պատրաստ է  օգնութեան ձեռք մեկնելու Իրաքի եւ Սուրիոյ   իր դաշնակիցներուն: Օպամա ըսաւ, թէ յառաջիկայ  ժամերուն  475  ռազմական խորհրդատուներ պիտի մեկնին   Իրաք:  Ան  ընդգծեց, թէ Սուրիոյ տագնապը  կարելի պիտի  ըլլայ լուծել ընդդիմութիւնը  զինելով եւ մարզելով: Օպամա  զգուշացուց՝ Տաաշի  վտանգը  չսանձելու պարագային, անիկա սպառնալիք պիտի դառնայ  Միացեալ  Նահանգներուն եւ  համայն   Եւրոպային:

Մոսկուա  դիտել տուաւ,  թէ առանց  Սուրիոյ  կառավարութեան  հաւանութեան, Տաաշի  դիրքերը  հարուածելու  նախագահ Պարաք Օպամայի  որոշումը, կրնայ  խանգարել ահաբեկչութեան  դէմ  պայքարը: Սուրիոյ ընդդիմութիւնը  ողջունեց  Տաաշի  դիրքերը  ռմբակոծելու նախագահ Պարաք Օպամայի ծրագիրը:  Իսկ Սէուտական Արաբիա  պատրաստակամութիւն յայտնեց  իր  հողերուն վրայ մարզել Սուրիոյ  ընդդիմութիւնը:

Միացեալ Նահագներու  պաշտպանութեան նախարար Չաք Հէյկըլ յայտարարեց, թէ  բանակը   պատրաստ է  գործադրելու Օպամայի   հրահանգները:

Ֆրանսայի արտաքին գործոց նախարար Լորան Ֆապիւս յայտարարեց, թէ  իր երկիրը  նոյնպէս պատրաստ է  օդային հարուածներ հասցնելու Տաաշին:

Թեհրան ցաւ յայտնեց, որ ահաբեկչութեան դէմ պայքար  յայտարարող կարգ մը պետութիւններ միաժամանակ  զէնք  կը հայթայթեն  ահաբեկիչներուն:

Միացեալ Նահանգներու պետական քարտուղար Ճոն Քերրի  Ճետայի մէջ գլխաւորեց  շրջանային պետութիւններու մասնակցութեամբ  անվտանգութեան եւ ապահովութեան  խորհրդաժողովին: Լիբանանի արտաքին գործոց նախարար Ժըպրան  Պասիլ մեկնեցաւ Ճետա՝ մասնակցելու սոյն  խորհրդաժողովին:

LEAVE A REPLY

Please enter your comment!
Please enter your name here