Մայք Սարեան Կը Ստանձնէ Հայ Դատի Ձեռնարկի Հովանաւորութիւնը

0
176

ԿԼԵՆՏԷՅԼ.- Արեւմտեան Ամերիկայի Հայ Դատի յանձնախումբի տարեկան ձեռնարկի հովանաւորութիւնը առատաձեռնօրէն որոշած է ստանձնել «Փրայմ Հելեք Սըրվիսըզ» ընկերութեան նախագահ Մայք Սարեանը։
Անցեալ տարուան ձեռնարկի յաջողութենէն խանդավառուած՝ Սարեան դիմած էր Արեւմտեան Ամերիկայի Հայ Դատի յանձնախումբի խորհրդակցական մարմինի անդամ Յարութ Սասունեանին՝ առաջարկելով իր աջակցութիւնը, միաժամանակ դրուատելով այն աշխատանքը, որ սահմանափակ նիւթական կարելիութիւններով կը տարուի Արեւմտեան Ամերիկայի Հայ Դատի յանձնախումբին կողմէ։
Մայք Սարեան աւելի քան 25 տարիներու վարչական փորձառութիւն ունի առողջապահութեան մարզէն ներս։ Անոր ընկերութիւնը սպասարկութիւններ կը մատուցէ աւելի քան 30 հիւանդանոցներու, որոնց մէկ մասը կը պատկանի ընկերութեան։ Անոր հովանիին տակ կը գործեն աւելի քան 30,000 պաշտօնեաներ։ Նաեւ, կամաւոր սպասարկութիւններ կը տրամադրէ Քալիֆորնիոյ տարածքին առողջապահութեան մարզին մէջ գործող կազմակերպութեանց միջոցաւ, ինչպէս նաեւ կ՛օժանդակէ հայկական բարեսիրական կազմակերպութեան։ Միայն անցեալ տարի, ան 2 միլիոն տոլար արժող բժշկական սարքաւորումներու նուիրատուութիւնը ապահոված է Հայաստանի հիւանդանոցներուն համար։
«Հայկական Հարցի արդարութեան կը հաւատամ եւ համոզուած եմ, որ պիտի յաջողինք մեր պայքարին մէջ», կ՛ըսէ Սարեան, որ նիւթական աջակցութեան կողքին այլ աջակցութիւն եւս կ՛ապահովէ։
Կիրակի, Նոյեմբեր 2ին, Պեվըրլի Հիլզ քաղաքի «Պեվըրլի Հիլթըն» պանդոկին մէջ կայանալիք ձեռնարկը առիթ մըն է քննելու Հայ Դատի վերջին մէկ տարուան գործունէութիւնը ու պատուելու Հայ Դատին ի նպաստ գործունէութիւն ծաւալած գործիչներ, մտաւորականներ, արուեստագէտներ ու քաղաքական անձնաւորութիւններ:
Տոմսեր ապահովելու համար, այցելել www.ancawr.org/gala կայքէջը կամ դիմել (818) 533-8587 թիւին, իսկ հովանաւորութեան կարելիութեանց ծանօթանալու համար, այցելել www.ancawr.org/gala/sponsorship կայքէջը կամ դիմել (818) 500-1919 թիւին։
Տեղեկութիւններ տրամադրելի են նաեւ Արեւմտեան Ամերիկայի Հայ Դատի յանձնախումբի «Ֆէյսպուք»ի կայքէջէն կամ ancawr.org կայքէն։

LEAVE A REPLY

Please enter your comment!
Please enter your name here