ԻՐԱՔԻ ԿԱՅՈՒՆՈՒԹԵԱՆ ԵՒ ԱՆՎՏԱՆԳՈՒԹԵԱՆ ՅԱՏԿԱՑՈՒԱԾ ՓԱՐԻԶԻ ԽՈՐՀՐԴԱԺՈՂՈՎԸ ՉԿՐՑԱՒ ԴՈՒՐՍ ԳԱԼ ՅՍՏԱԿ ՈՐՈՇՈՒՄՆԵՐՈՎ

0
154

Ֆրանսայի մայրաքաղաք  Փարիզի մէջ, Երկուշաբթի  առաւօտեան,  նախագահ  Ֆրանսուա Հոլանտի գլխաւորութեամբ,  Միացեալ Նահանգներու պետական քարտուղար Ճոն Քերրիի  եւ   աւելի քան քառասուն պետութիւններու  ներկայացուցիչներու մասնակցութեամբ  տեղի ունեցաւ  Իրաքի  կայունութեան եւ անվտանգութեան   յատկացուած  միջազգային խորհրդաժողովին բացումը: Խորհրդաժողովի  ընթացքին յստակ պատասխաններ չտրուեցան  այսպէս  կոչուած իսլամական պետութեան դէմ կազմուած միջազգային ճակատին Իրանի եւ Սուրիոյ մասնակցութեան: Խորհրդաժողովը  նաեւ պատասխան չտուաւ  իսլամական պետութեան դէմ քայլերը ՄԱԿ-ի միջոցաւ համադրելու Ռուսիոյ առաջարկին:  Կարգ մը  պետութիւններ մինչեւ իսկ  քննադատեցին Ուաշինկթընը՝ արաբական աշխարհի  «ետին»  պայքար մղելու  դիտաւորութեան   համար:

Խորհրդաժողովի   ընթացքին արտասանած իր խօսքին  մէջ, նախագահ  Ֆրանսուա Հոլանտ  յիշատակեց նաեւ  Լիբանանի գերիշխանութիւնը, ամբողջականութիւնը պահպանելու, բանակին  զօրակցելու եւ զինելու անհրաժեշտութիւնը:

Իրաքի նախագահ ֆուատ Մաասում անմիջական միջամտութիւն պահանջեց  Տաաշի  դէմ, նշելով թէ  Տաաշ  կը ներկայանայ  դարու ամենավտանգաւոր մարտահրաւէրը: Ան  նաեւ  յայտնեց, թէ Տաաշի  ահաբեկչութիւնները պիտի տարածուին այլ երկիրներ:

Մինչ  Միջազգային ընտանիքը,  Միացեալ  Նահանգներու հովանաւորութեամբ,  իսլամական պետութեան վրայ  յարձակումի  ճակատը  ընդլայնելու  բանակցութիւններ կը վարէ Միջին Արեւելքի իր դաշնակիցներուն  հետ,ծայրայեղականները    մահապատիժի  ենթարկեցին բրիտանացի  պատանդ Տէյվիտ Հէյնզը՝ 44 տարեկան:  ՄԱԿ,  Միացեալ Նահանգներ, Ֆրանսա, Բրիտանիա, Գերմանիա  դատապարտեցին   բրիտանացի պատանդին սպանութիւնը եւ խոստացան  պատժել   յանցագործները: Աւստրալիա խոստացաւ  վեց հարիւր  զինուոր  եւ կործանիչներ ուղարկել Իրաք՝  իսլամական  պետութեան դիրքերը  ռմբակոծելու նպատակով:

Ուաշինկթընի մէջ ամերիկացի ծերակուտական, Ծերակոյտի հետախուզական  յանձնախումբի  նախկին  պետ    Պոպ Կրահամ,  քննադատեց  Միացեալ Նահանգներու  միջինարեւելեան քաղաքականութիւնը:  Կրահամ դիտել տուաւ, որ  11 Սեպտեմբերի  դէպքերուն  մէջ Սէուտական Արաբիոյ  դերակատարութիւնը անտեսելու Ուաշինկթընի  շահադիտութիւնը  նպաստած էր այսպէս կոչուած   իսլամական պետութեան կազմաւորումին.« Սէուտական Արաբիոյ  կողմէ, Սուրիոյ եւ Իրաքի  սիւննի  ծայրայեղականներուն զօրակցելու  քաղաքականութիւնը, մեծապէս նպաստեց  իսլամական պետութեան կազմաւորման». յայտարարեց  Կրահամ:

LEAVE A REPLY

Please enter your comment!
Please enter your name here