ՔԱԹԱՐ ԿԸ ԽՈՍՏԱՆԱՅ ՕԺԱՆԴԱԿԵԼ ԼԻԲԱՆԱՆՑԻ ԶԻՆՈՒՈՐԱԿԱՆՆԵՐԸ ԱԶԱՏ ԱՐՁԱԿԵԼՈՒ ՃԻԳԵՐՈՒՆ

0
113

Ինչպէս   նախատեսուած էր,  վարչապետ  Թամամ Սալամ, կառավարական, ապահովական  բարձրաստիճան  պատուիրակութեան մը  ընկերակցութեամբ Կիրակի առաւօտեան   ժամանեց Քաթար եւ երեկոյեան վերադարձաւ Պէյրութ:  Սալամի գլխաւորած պատուիրակութեան մաս կը կազմէին նախարարներ  Նիհատ Մաշնուքը,  Ղազի Զըայթէրը, Սըժաան  Ղազին,  Ռոնի Արէյժին, ընդհանուր անվտանգութեան  ընդհանուր տնօրէն, հազարապետ Ապպաս Իպրահիմը եւ այլ անձնաւորութիւններ:  Պաշտօնական   ընդունելութենէն անմիջապէս ետք, Սալամ հանդիպում մը ունեցաւ Քաթարի Թամիմ Պըն Համատ  իշխանին հետ  եւ  քննարկեց առեւանգուած զինուորականները ազատ արձակելու  կարելիութիւնները:  Իշխան Թամիմ պատրաստակամութիւն  յայտնեց հետապնդելու առեւանգուած զինուորականներուն  թղթածրարը: Ան  ըսաւ, թէ Քաթար  երբեք պիտի  չզլանայ ազատ արձակելու  լիբանանցի առեւանգեալները:Սալամ յայտարարեց, թէ Իպրահիմի պիտի մնայ Քաթար՝ տեղւոյն վրայ   հետապնդելու զինուորականներուն թղթածրարը:Այս առիթով, վարչապետը  դիտել տուաւ, թէ    Լիբանան  գրեթէ բոլոր մարզերու մէջ կը  կարօտի   օժանդակութեան:

Վարչապետ  Թամամ Սալամ յայտարարեց, թէ Քաթար  նախանձախնդիր  կը մնայ  առեւանգուած զինուորականները ազատ արձակելու իր յանձնառութեան  վրայ: Ներքին գործոց  նախարար Նիհատ Մաշնուք  յայտարարեց, թէ վարչապետ Սալամ  հաղորդակցութեան մէջ մտած է Անգարայի հետ, սակայն մինչեւ այս պահը,   ոչ մէկ յառաջընթաց արձանագրուած է բանակցութիւններուն ուղղութեամբ:  Ընդհանուր անվտանգութեան ընդհանուր տնօրէն, հազարապետ Ապպաս Իպրահիմ   նշեց, թէ  Քաթար  մինորդի  դեր ստանձնած է Տաաշի եւ Ճեպհէթ Ալ Նուսրայի  հետ: Իպրահիմ ընդգծեց, թէ առեւանգողները բաւական տհաճ  պայմաններ կը ներկայացնեն զինուորականները ազատ արձակելու համար: Այսուհանդերձ, Իպրահիմի նկատել տուաւ  առեւանգեալներու  հարցով  որոշակի  յառաջընթացի մը  գոյութիւնը:

Սալամ, վարչապետարանին մէջ ընդունեց ՄԱԿ-ի կից բարգաւաճման ծրագիրներու  գործադիր տնօրէն Հելէն  Գլարքը եւ  քննարկեց Լիբանանի  վերաբերեալ ՄԱԿ-ի բարգաւաճման ծրագիրներուն գործադրութիւնը:   Գլարք   նշեց, թէ   լիբանանեան կառավարութեան եւ ՄԱԿ-ի բարգաւաճման  ծրագիրները կը ներկայացնեն մէկ ամբողջութիւն:

Ապահովական աղբիւրներ հաղորդեցին, թէ Դանիայէն  նոր վերադարձած պաղեստինցի  գործարար մը առեւանգուած է  Պեքաայի մէջ: Մուհամմէտ  Խալէտ, 59  տարեկան, առեւանգուած է իր  բնակարանին առջեւ  զբօսնելու ընթացքին:

LEAVE A REPLY

Please enter your comment!
Please enter your name here