Թուրքիա Գործակցած Է «Ճապհաթ Նուսրա»ի Հետ. Ռիքարտոնէ

0
145

ԼՈՆՏՈՆ, «Թելեկրաֆ».- Թուրքիոյ մօտ Միացեալ Նահանգներու նախկին դեսպան Ֆրենսիս Ռիքարտոնէ յայտարարած է, թէ հակառակ Ուաշիկթընի ցուցմունքներուն, Թուրքիա ուղղակի օժանդակութիւն տրամադրած է եւ գործակցած Սուրիոյ մէջ «Քայիտա»ի մասնաճիւղը հանդիսացող «Ճապհաթ Նուսրա» կազմակերպութեան հետ։
Ռիքարտոնէ, որ Յունիսին հեռացած էր Թուրքիոյ մօտ Միացեալ Նահանգներու դեսպանի պաշտօնէն, աւելցուցած է, թէ քանի մը առիթներով փորձ եղած է տարհամոզելու Անգարան, սակայն՝ ի զուր։ «Վերջաւորութեան, համաձայնեցանք չհամաձայնիլ», աւելցուցած է նախկին դեսպանը։
Միւս կողմէ, Միացեալ Նահանգներու արտաքին գործոց նախարար Ճան Քերի յայտարարեց, որ կարգ մը երկիրներ առաջարկած են «Իսլամական պետութեան» դէմ պայքարելու համար ցամաքային ուժեր ուղարկել, սակայն իր երկիրը ներկայիս այդ մասին չի մտածեր:
Սպիտակ տունը յայտարարեց, որ Քոնկրեսին մէջ «մեծ յառաջդիմութիւն արձանագրած են» Միացեալ Նահանգներու նախագահ Պարաք Օպամայի՝ սուրիական չափաւորական ընդդիմութիւնը մարզելու առաջարկին շուրջ քննարկումները։
Իր կարգին, Թուրքիոյ նախագահ Ռեչեփ Թայիփ Էրտողան ըսաւ, որ իր երկիրը ահաբեկչական ծանօթ կազմակերպութիւններու դէմ կը պայքարի, «եւ կը գիտակցինք, որ շրջանին մէջ բազմաթիւ ահաբեկչական կազմակերպութիւններ գոյութիւն ունին»: Ան մամլոյ ասուլիսի մը ընթացքին նշեց, որ թրքական իշխանութիւնները կը պահպանեն անոնց դէմ իրենց կեցուածքը եւ պիտի շարունակեն պահպանել այդ կեցուածքը, ինչ կը վերաբերի օտար զինեալներու հարցին կամ Թուրքիոյ մէջ ահաբեկչական կազմակերպութեանց անդամներուն, եւ «ազգային ու միջազգային մակարդակի վրայ այս ծիրին մէջ մեր վճռակամութիւնն ու մեր դաշնակիցներուն նկատմամբ զօրակցութիւնը պիտի շարունակուին», հակառակ այն իրողութեան, որ Անգարա մերժած էր Ուաշինկթընի գլխաւորած նման դաշինքի մը հետ գործակցելու առաջարկը:
Թուրքիոյ մէջ լաւատեղեակ աղբիւրներ «Հայաթ» օրաթերթին յայտնեցին, որ Էրտողան խոստացած է Թուրքիա-Սուրիա սահմանին վրայ ապահովութիւնը ամրապնդել՝ յաւելեալ զինեալներու Սուրիա մուտք գործելը արգիլելու համար:
Մինչ այդ, իրանեան պաշտօնական աղբիւր մը «Մայատին»ին յայտնած է, որ Ուաշինկթըն մեծ ջանքեր թափած է Թեհրանը համոզելու՝ «Իսլամական պետութեան» դէմ իրեն հետ գործակցելու, եւ թէ այս տագնապին սկիզբէն ի վեր ամերիկեան վարչակարգը տարբեր միջոցներով կը ջանայ կապ հաստատել Թեհրանի հետ, սակայն Թեհրանի կողմէ մերժողական պատասխանը Ուաշինկթընը մղած է յայտնելու, որ պայմանները նպաստաւոր չեն Իրանը ահաբեկչութեան դէմ պայքարի դաշինքին մաս կազմելու հրաւիրելու:
Նաեւ, ամերիկեան լրատուամիջոցներ կը հաղորդեն, որ Միացեալ Նահանգներու նախագահ Պարաք Օպամա քննադատած է «Իսլամական պետութեան» կողմէ բրիտանացի Տէյվիտ Հէյնզի գլխատումը: «Պիտի աշխատինք Բրիտանիոյ, շրջանին ու ամբողջ աշխարհին մէջ միջազգային լայն դաշինքին հետ միասին, որպէսզի պատասխանատուութեան ենթարկենք անոնք, որոնք մեղաւոր են այդ սարսափելի գործողութեան համար, եւ որպէսզի վերացնենք այդ սպառնալիքը մեր երկիրներուն, շրջանին եւ ամբողջ աշխարհի ժողովուրդներուն համար», կ՛ըսուի Օպամայի յայտարարութեան մէջ:
Ան նշած է, որ Միացեալ Նահանգներ Բրիտանիոյ կողքին է եւ կը կիսէ անոր վիշտը:
Բրիտանիոյ վարչապետ Տէյվիտ Քեմրըն Հէյնզի գլխատումը դատապարտած է եւ անոր հարազատներուն խոստացած է ընել ամէն ինչ, որպէսզի մարդասպանները յայտնուին դատարանին առջեւ:
Նշենք, որ բրիտանացին գլխատուած էր իբրեւ պատասխան խմբաւորումին դէմ պայքարի միջազգային դաշինքին մաս կազմելու Բրիտանիոյ քայլին:

LEAVE A REPLY

Please enter your comment!
Please enter your name here