Ատրպէյճանական Ուժերու Ներթափանցումները Կասեցնող Նոր Համակարգ Ստեղծուած Է

0
124

ԵՐԵՒԱՆ, «Երկիր».- Սեպտեմբեր 16ին Հայաստանի պաշտպանութեան նախարար Սէյրան Օհանեան հանդիպած է Երեւանի պետական համալսարանի դասախօսական կազմին եւ ուսանողներու հետ:
Իր ելոյթին մէջ Օհանեանը ընդ-գծած է բանակ-համալսարան համագործակցութեան կարեւորութիւնը՝ արատաւոր երեւոյթներու, փողոցային բարքերու դէմ պայքարի, ինչպէս նաեւ երիտասարդութեան հայրենասիրական դաստիարակութիւնը ամրապնդելու գործին մէջ:
Հանդիպման ընթացքին պաշտպանական գերատեսչութեան ղեկավարը դասախօսներուն եւ ուսանողներուն ներկայացուցած է հայկական զինեալ ուժերու ընդհանուր վիճակը, իրականացուող բարեփոխումները, խօսած է ազգային բանակի ներկայ ձեռքբերումներու ու առաջիկայ ընելիքներու, առկայ խնդիրներու ու մարտահրաւէրներու, անոնց լուծման ուղղութեամբ իրականացուող ծրագիրերներու, ինչպէս նաեւ կրթութեան ոլորտէն ներս բարձրագոյն ուսումնական հաստատութիւններու հետ համագործակցութեան հեռանկարներու շուրջ:
«Հայաստանը տարիներ առաջ կարողացաւ պատուով յանձնել իրեն առաջադրուած քննութիւնը՝ ԼՂում յաղթանակով դուրս գալով պարտադրուած պատերազմից: Այն յաղթանակները, որոնք մենք տարել ենք Արցախեան գոյամարտի ժամանակ, անկասկած, այսօր բազմապատկում ենք, որի վառ ապացոյցներից մէկը յուլիս-օգոստոսեան վերջին դէպքերն էին», յայտնած է Սէյրան Օհանեան:
Նախարարը հաւաստիացուցած է, որ հայկական զինուժը լուրջ ուշադրութիւն կը դարձնէ սահմաններու պաշտպանութեան խն-դիրին: Այս գծով ստեղծուած է համապատասխան պաշտպանական միջավայր եւ հակառակորդի ներթափանցման փորձերը կասեցնելու համակարգ՝ թէ Հայաստանի եւ թէ Արցախի մէջ:
Անդրադառնալով թուրք-ատրպեճանական զինավարժութիւններուն, Օհանեան յայտնած է, որ անոնք ոչ մէկ ձեւով կը սպառնան Հայաստանին:
«Այդ ռազմական զինավարժութիւնները պլանային են, մենք հետեւում ենք դրանց», ընդգծած է պաշտպանութեան նախարարը:
Հաւաքական անվտանգութեան անդամ պետութիւններու կազմակերպութեան (ՀԱՊԿ) անդամ ըլլալով՝ Հայաստան, ինչպէս բազմակողմ, այնպէս ալ երկկողմ ձեւաչափերով կը համագործակցի նաեւ Հիւսիսատլանտեան դաշինքի (ՆԱԹՕ) մասնակից երկիրներու հետ, յայտարարեց պաշտպանութեան նախարարը՝ անդրադառնալով Հայաստանի վրայ ուքրանական իրադարձութիւններուն եւ Արեւմուտքի ու Ռուսիոյ լարուածութեան հնարաւոր ազդեցութեան:
Նախարարի խօսքով՝ Հայաստանի ռազմական ու ռազմաքաղաքական ղեկավարութիւնը հաւասարակշռուած քաղաքականութիւն կը վարէ:
Խօսելով պաշտպանական միջոցներուն մասին, նախարարը յայտարարած է, որ հայկական բանակը հեռահար եւ գերճշգրիտ միջոցներ ունի, ինչպէս նաեւ ունի պայմանաւորուածութիւններ այդ միջոցներու քանակը Հայաստանի Հանրապետութեան տարածքին աւելցնելու: Սպառազինութիւններու եւ ռազմական սարքերու զարգացման պետական ծրագիր կայ եւ այդ ծրագիրին շուրջ այդ զարգացումը պարբերաբար կ՛իրականացուի, յայտարարած է նախարարը:

LEAVE A REPLY

Please enter your comment!
Please enter your name here