ԼԻԲԱՆԱՆԵԱՆ ԿԱՐՃ ԼՈՒՐԵՐ

0
115

–         Պաշտօնական տուեալներով 514   քաղաքացիներ իրենց թեկնածութիւնը առաջադրած են խորհրդարանի յառաջիկայ ընտրութիւններուն, որոնց մէջ՝   իգական սեռի 35 ներկայացուցիչ: Ներքին գործոց նախարար Նիհատ Մաշնուք յայտնեց, թէ ընտրութիւնները կատարուելու պարագային, տեղի պիտի ունենան 1960-ի օրինագիծին հիման վրայ: Նախարարը միաժամանակ ցաւ յայտնեց ընտրութիւններու  վերահսկող յանձնախումբի կազմութեան ուշացումէն: Ըստ նախարարին, ընտրութիւնները պիտի կայանան 16 Նոյեմբեր 2014-ին:

–         Լիբանանեան «Ալ Սաֆիր» օրաթերթը հետաքրքրական ուսումնասիրութիւն մը կատարած է գործող խորհրդարանին վերաբերեալ: Ներկայ խորհրդարանի անդամները իրենց պաշտօնավարութեան չորս տարիներուն,ապա՝   երկարաձգումի ժամանակաշրջանին, սովորական քաղաքացիներու գրպանին արժած են   266 միլիոն տոլարի գումար մը, այլ խօսքով օրական՝ 139 հազար տոլար: Անցնող հինգ տարիներուն եւ երեք ամիսներուն ընթացքին, խորհրդարանը գումարած է 16 օրէնսդիր նիստ, վաւերացնելով 218 օրինագիծ. Միջին հաշուով իւրաքանչիւր օրինագիծը արժած է մէկ միլիոն եւ երկու հարիւր հազար տոլարի գումար մը: Այս բոլորէն ետք, «Ալ Սաֆիր» հասկնալի կը գտնէ խորհրդարանի պաշտօնավարութեան ժամկէտը   երկարաձգելու երեփոխաններու մեծամասնութեան ցանկութիւնը…:

–         Ուաշինկթընի մօտ Միացեալ Նահանգներու նախկին դեսպան Ապտալլա Պու Հապիպ յայտնեց, թէ Տաաշի դէմ պատերազմը պիտի սկսի Իրաքէն եւ աւարտի Սուրիոյ մէջ, Սէուտական Արաբիոյ եւ Միացեալ Նահանգներու հովանաւորութեան տակ:

–         Փոփոխութիւն եւ Բարեկարգում խորհրդարանական խմբաւորումի պետ Միշէլ Աուն այցելութիւն մը տուաւ Ընկերվար Յառաջդիմական Կուսակցութեան պետ Ուալիտ Ճոմպլաթին: Հանդիպումէն ետք, Աուն դիտել տուաւ, թէ քաղաքական պայմաններու ստիպողութեան տակ   տեղի ունեցած էր սոյն հանդիպումը: Աուն   յայտնեց, թէ կը մերժէ խորհրդարանի պաշտօնավարութեան երկարաձգումը: Ճոմպլաթ երկրորդեց Աունի կեցուածքը, աւելցնելով, թէ   նախագահական ընտրութիւններու գործընթացը   քննարկութեան նիւթ չէր դարձած անոնց միջեւ:

–         Տնտեսութեան նախարար Ալէն Հաքիմ, Լիբանանի մօտ Հայաստանի արտակարգ եւ լիազօր դեսպան Աշոտ Քոչարեանի հետ քննարկեց երկու երկիրներուն միջեւ տնտեսական եւ առետրական համագործակցութիւնը զարգացնելու կարելիութիւնները:

LEAVE A REPLY

Please enter your comment!
Please enter your name here