Համահայկական Եկեղեցական Հինգերորդ Ժողովը Կը Սկսի Սեպտեմբեր 18ին

0
112

ԷՋՄԻԱԾԻՆ.- Հինգշաբթի, Սեպտեմբեր 18ին, Մայր աթոռ Ս. Էջմիածինի մէջ, նախագահութեամբ Գարեգին Բ. կաթողիկոսին, իր եռօրեայ աշխատանքը պիտի սկսի Եկեղեցական-ներկայացուցչական հինգերորդ ժողովը, որուն պիտի մասնակցին շուրջ 160 պատգամաւորներ՝ Հայ եկեղեցւոյ նուիրապետական աթոռներէ, հայրապետական պատուիրակութիւններէ, աշխարհասփիւռ թեմերէ, ինչպէս նաեւ Գերագոյն հոգեւոր խորհուրդի անդամները:
Նշենք, որ Սեպտեմբեր 16-17ին, Էջմիածինի մէջ, նախագահութեամբ Գարեգին Բ. կաթողիկոսին, տեղի ունեցաւ Գերագոյն հոգեւոր խորհուրդի (ԳՀԽ) ժողովը՝ ընդլայնուած կազմով: Ներկայ էին Գերմանիոյ Հայոց թեմի առաջնորդ Գարեգին արք. Բեքչեան, Հնդկաստանի եւ Ծայրագոյն Արեւելքի հայրապետական պատուիրակ, Աւստրալիոյ եւ Նիւ Զելանտայի Հայոց թեմի առաջնորդ Հայկազուն եպս. Նաջարեան եւ Մեծն Բրիտանիոյ Հայոց թեմի առաջնորդ Վահան եպս. Յովհաննիսեան:
Օրակարգին մէջ ընդգրկուած էին Սեպտեմբեր 18-20ի Եկեղեցական-ներկայացուցչական ժողովին, 2015ի Սեպտեմբեր 27ի Միւռոնօրհնութեան արարողութեան, Հայոց Ցեղասպանութեան 100ամեակի միջոցառումներու կազմակերպման, ինչպէս նաեւ թեմական կանոնադրութեանց առնչուող հարցեր:
Եկեղեցական-ներկայացուցչական ժողովի նախապատրաստութեան մասին զեկոյց ներկայացուց Նաթան արք. Յովհաննիսեան։ Ժողովականները քննարկեցին նաեւ ժողովի կանոնադրութեան նախագիծը, զոր ներկայացուց ժողովի կանոնադրութեան մշակման յանձնախումբի նախագահ, Տաւուշի թեմի առաջնորդ Եզնիկ արք. Պետրոսեանը:
ԳՀԽ անդամները լսեցին նաեւ Թեմական կանոնադրութիւններու յանձնախումբի ատենապետ, Շիրակի թեմի առաջնորդ Միքայէլ եպս. Աջապահեանի զեկոյցը, իսկ 2009ի թեմական ուղենշային կանոնադրութեան մէջ փոփոխութիւններ կատարելու մասին յանձնախումբին առաջարկները ԳՀԽ անդամներուն ներկայացուց յանձնախումբի անդամ, Մայր աթոռի դիւանապետ Արշակ եպս. Խաչատրեանը:
ԳՀԽ, ի գիտութիւն ընդունեց նաեւ Արշակ եպս. Խաչատրեանի զեկոյցը՝ Միւռոնօրհնութեան արարողութեան նախապատրաստական աշխատանքներուն մասին:
Մայր աթոռին կողմէ հայաշատ կեդրոններու մէջ կազմակերպուող Ցեղասպանութեան 100ամեակի միջոցառումներուն մասին զեկոյցով հանդէս եկաւ կազմակերպիչ յանձնախումբի ատենապետ, ԱՄՆ Հայոց Արեւմտեան թեմի առաջնորդ Յովնան արք. Տէրտէրեանը:
Զեկոյցի քննարկման ընթացքին անդրադարձ կատարուեցաւ նաեւ Հայ եկեղեցւոյ աշխարհասփիւռ թեմերուն կողմէ ծրագրուող յիշատակի միջոցառումներուն եւ շեշտուեցաւ կարեւորութիւնը քոյր եկեղեցիներու հոգեւոր պետերու, միջեկեղեցական կազմակերպութիւններու, ինչպէս նաեւ այլ կրօններու ներկայացուցիչներու մասնակցութեան՝ 2015ի միջոցառումներուն:
ԳՀԽ անդամները լսեցին նաեւ Հայաստանի Աստուածաշնչային ընկերութեան գլխաւոր քարտուղար Եզնիկ արք. Պետրոսեանի զեկոյցը՝ Աստուածաշունչի «Ս. Էջմիածին» թարգմանութեան սրբագրութեան վերաբերեալ:

LEAVE A REPLY

Please enter your comment!
Please enter your name here