ՆԵՐԿԱՅԱՑՈՒՑԻՉՆԵՐՈՒ ՏՈՒՆԸ ՀԱՒԱՆՈՒԹԻՒՆ ՏՈՒԱՒ ԶԻՆԵԼՈՒ ՍՈՒՐԻՈՅ ԸՆԴԴԻՄՈՒԹԻՒՆԸ

0
178

Միացեալ Նահանգներու Գոնկրէսը՝ 273 կողմ  եւ  156՝ դէմ  ձայներով,  հաւանութիւն տուաւ՝ Սուրիոյ  ընդդիմութիւնը զինելու եւ մարզելու նախագահ Պարաք Օպամայի առաջադրած  ծրագիրին, այն պայմանով որ  վերջինս դէմ  պիտի դնէ Տաաշին: Օպամակ’ակնկալէ, որ  Սուրիոյ ընդդիմութիւնը եւ Իրաքի  բանակը  պիտի ըլլան Տաաշի դէմ յառաջամարտիկները: Միացեալ Նահանգներու  պետական գանձի  նախարար Ճաք Լօ  միջազգային ընտանիքէն  պահանջեց կասեցնել  Տաաշին հասնող բոլոր մատակարարումները: Գոնկրէսը   հինգ հարիւր միլիոն տոլար արժողութեամբ  վարկ մը քուէարկեց   Սուրիոյ ընդդիմութիւնը զինելու  նպատակով: Այսուհանդերձ, Գոնկրէսի անդամներուն մեծամասնութեան մօտ  թերահաւատութիւն կը տիրէ Սուրիոյ ընդդիմութեան կարողականութեան եւ ստանձնելիք  յանձնառութեան շուրջ:

Պի.Պի.Սի. հաղորդեց, թէ Տաաշ՝ մարդկային  վահաններ կ’օգտագործէ  Տէր Զորի եւ Ռաքայի մէջ,  բանակին դէմ  բախումներուն ընթացքին: Ականատեսներու վկայութեամբ,  Հալէպի եւ անոր շուրջ  օդային տարածութիւններուն մէջ նկատուած են Տաաշի դիրքերը  հետապնդող  հետախուզական օդանաւներ:  Բրիտանիոյ  պետական նախարար Թոպայաս  Իլվուտ՝  նախագահ  Պաշշար  Ասատին վերագրեց Տաաշի իշխանութիւնը  ընդլայնելու պատասխանատուութիւնը:

«Հաարէց» օրաթերթը իր երէկուան համարին մէջ գրած էր, թէ Տաաշ  ոչինչով կը  սպառնայ Իսրայէլին:

Ռազմական գետնի վրայ, բանակը կասեցուց Տարաայի շրջանէն Դամասկոս թափանցելու փորձ մը:

LEAVE A REPLY

Please enter your comment!
Please enter your name here