Հռոմի Պապը Ընդունած Է 2015ին Հայաստան Այցելելու Հրաւէրը

0
144

ՎԱՏԻԿԱՆ, «Նիուզ».- Պաշտօնական այցով Վատիկան գտնուող Հայաստանի նախագահ Սերժ Սարգսեան Ուրբաթ, 19 Սեպտեմբերին առանձին հանդիպում մը ունեցաւ Հռոմի պապ Ֆրանսիսի հետ:
Սոյն հանդիպման մասին նախագահի մամլոյ ծառայութիւնը հրապարակած է հետեւեալ տեղեկագրութիւնը.
«Հանրապետութեան ղեկավարը եւ նորին սրբութիւնը գոհունակութեամբ են խօսել Հայաստանի եւ Վատիկանի միջեւ բարձր մակարդակի յարաբերութիւնների մասին՝ ընդգծելով, որ ամուր հիմքեր ունեցող այդ յարաբերութիւնները սերում են քրիստոնէական նոյն արժեհամակարգից եւ գաղափարախօսութիւնից: Զրուցակիցները կարեւորել են վերջին տարիներին յաճախակի դարձած բարձրաստիճան փոխայցելութիւններն ու շփումները, որոնք վկայում են երկկողմ յարաբերութիւնները մշտապէս ուշադրութեան կենտրոնում պահելու փոխադարձ պատրաստակամութեան մասին: Սերժ Սարգսեանը եւ նորին սրբութիւնը մտքեր են փոխանակել Մայր աթոռ Սուրբ Էջմիածնի եւ Կաթոլիկ եկեղեցու միջեւ հաստատուած սերտ համագործակցութեան մասին: Հանդիպման ընթացքում նախագահը սրբազան քահանայապետին պաշտօնապէս հրաւիրել է 2015թ. այցելել Հայաստան: Սրբազան քահանայապետը սիրով ընդունել է հրաւէրը, վստահեցնելով, որ իր սրտի ցանկութիւնն է գալ Հայաստան:
Այնուհետեւ նախագահ Սերժ Սարգսեանը հանդիպել է սուրբ աթոռի պետքարտուղար Կարդինալ Պիետրօ Պարոլինի հետ: Զրուցակիցները քննարկել են հայ-վատիկանեան յարաբերութիւնների ներկան եւ զարգացման հեռանկարը: Կողմերը գոհունակութեամբ են արձանագրել, որ վերջին ժամանակահատուածում այդ յարաբերութիւնները զարգանում են բարձր տեմպերով (կշռոյթով-Խմբ.) եւ գործակցութեան ամենատարբեր հարթութիւններում:
Հանդիպման ընթացքում քն-նարկուել են Մերձաւոր Արեւելքում քրիստոնիաներին եւ քրիստոնէական ժառանգութեանն առնչուող արդի հիմնախնդիրները: Նախագահ Սերժ Սարգսեանը ներկայացրել է Հայաստանի պատրաստակամութիւնը մասնակցելու այս ուղղութեամբ իրականացուող աշխատանքներին:
Անդրադարձ է եղել նաեւ ԼՂ հիմնախնդրի խաղաղ կարգաւորմանն առնչուող հարցերին: Նախագահ Սերժ Սարգսեանը շնորհակալութիւն է յայտնել կարդինալ Պիետրօ Պարոլինին Լեռնային Ղարաբաղի հիմնախնդրում սուրբ աթոռի հաւասարակշռուած դիրքորոշման համար:

LEAVE A REPLY

Please enter your comment!
Please enter your name here