ՎԱՐՉԱՊԵՏ ՍԱԼԱՄ՝ ԱՀԱԲԵԿՉՈՒԹԻՒՆԸ ՉԻ ՃԱՆՉՆԱՐ ԵՐԱՇԽԻՔՆԵՐ

0
109

Վարչապետ ԹամամՍալամ  երէկ ուշ  գիշեր ժամանեց Նիւ Եորք:  Սալամ պիտի  մասնակցի  ՄԱԿ-ի Ապահովութեան Խորհուրդի  ընդհանուր նիստերուն, ինչպէս  նաեւ՝ Լիբանանի  զօրակցութեան համար, Հինգշաբթի օր   նախատեսուած  միջազգային խորհրդաժողովին:  Սալամ,  ՄԱԿ-ի ընդհանուր նիստերուն  ընթացքին  պիտի արտասանէ Լիբանանի  խօսքը: Նախքան   Նիւ Եորք  մեկնիլը, Սալամ,վարչապետարանին մէջ քաղաքական իրավիճակը քննարկեց փոխվարչապետ եւ  պաշտպանութեան նախարար Սամիր Մուքպէլի,  ներքին գործոց նախարար  Նիհատ  Մաշնուքի եւ  առողջապահութեան նախարար  Ուայէլ Ապու Ֆաուրի հետ:  Սալամ  յայտնեց, թէ առեւանգուած զինուորականններուն  հարցը բաւական բարդ է, սակայն կառավարութիւնը  ոչ մէկ   ճիգ պիտի  խնայէ զանոնք ազատ արձակելու համար:   Սալամ   նաեւ ըսաւ, թէ   երաշխիքներ  չի կրնար  տալ առեւանգեալներու ընտանիքներուն, որովհետեւ  ահաբեկչութիւնը  չի ճանչնար երաշխիքներ:

Շաբաթ   երեկոյեան,  Խարիպէյի եւ Համի միջեւ  գտնուող Հըզպալլայի պատկանող  անցարգելի  մը առեւ ականուած  ինքնաշարժի միջոցով  անձնասպանական  գործողութենէն ետք,  պարզ դարձաւ որ  Լիբանան  վերածուած  է  ահաբեկչական  օղակի մը   կեդրոնը: ՎարչապետՍալամ,   շաբաթավերջին ունեցած  շփումներէն  ետք, այն  համոզումը արտայայտեց,թէ  ծայրայեղականները   մահապատիժի պիտի ենթարկեն առեւանգուած զինուորականները,  հետեւաբար, կը մնայ ուժի մէջ դնել ռազմական  ընտրանքը:

Լիբանանեան բանակի հրամանատարութիւնը յայտարարեց, թէ յետ այսու  պատրաստ պիտի չըլլայ  հանդուրժելու  իր հաստատութեան դէմ արիւնահոսութիւնը: Լիբանանեան բանակը   ռմբակոծեց  Արսէլի   լեռնային շրջաններուն մէջ Տաաշի  եւ   Ճեպհէթ Ալ Նուսրայի  դիրքերը, կարգ մը շրջաններու մէջ արձանագրելով  յառաջխաղաց: Բանակի աղբիւր մը հաղորդեց, թէ  Տաաշ պիտի  չյաջողի իր   կամքը պարտադրել  լիբանանեան իրականութեան  վրայ: Բանակին  ռմբակոծոմերուն հետեւանքով  սպաննուեցան    տասնեակաւոր   ծայրայեղականներ:

Երեսփոխան  Ժան  Օղասապեան պահանջեց փակել  Սուրիոյ հետ  Լիբանանի սահմանագիծը եւ բանակի  միաւորներ տեղակայել ռազմավարական դիրքերուն վրայ:  Օղասապեան  յայտնեց, թէ  Մարտ  8-ի ուժերը կը խանգարեն  նախագահական  ընտրութիւնները եւ կը պնդեն  Միշէլ Աունը ընտրել   երկիրի նախագահ: Երեսփոխան  Աթէֆ Մաժտալանի  դիտել տուաւ, որ անհրաժեշտ է ամէն տեսակի  իրաւասութիւն տալ կառավարութեան,  ներառեալ՝փոխանակումներու   լիազօրութիւն:Երեսփոխան Ղազի Արիտի  պահանջեց   բոլոր  ճիգերը  գործի լծել   զինուորականները ազատ արձակելու  համար,  մաղթելով որ Լիբանանը խնայուի  նոր Նահր Պերիտի մը  աղէտէն: Արիտի ցաւ յայտնեց, որ ազգային միասնականութեան  բացակայութիւնը ծանր հետեւանքներ  կ’ունենայ երկրին  դիմագրաւած  դժուարութիւններուն վրայ: «Հըզպալլա  միայնակ չի կրեր  այսօրուան կացութեան պատասխանատուութիւնը,  ուրիշներ  եւս  մտան Սուրիա».դիտել տուաւ Արիտի:  « Ալ Մուսթաքպալ» օրաթերթը իր տեղեկութիւնները հաւաստի աղբիւրներէ  քաղելով կը գրէ, թէ  առեւանգուած զինուորականները կը գտնուին  լիբանանեան  հողերու  վրայ: Հաղորդակցութեան նախարար Պութրոս Հարպ   շեշտեց, թէ միայն  միջազգային  ընտանիքին վստահելով  կարելի պիտի չըլլայ  պաշտպանել Լիբանանը:

Խորհրդարանի նախագահ Նեպիհ Պըրրի իր այցելուներուն յայտնեց,թէ օրէնսդիր նիստ  գումարելու մթնոլորտը դրական  է:  Պըրրի նշեց, թէ վարչապետ Թամամ Սալամի Նիւ Եորքէն   վերադարձէն անմիջապէս ետք,   օրէնսդիր  նիստի պիտի հրաւիրէ խորհրդարանը: Պըրրի  նշեց, թէ ելեւմտական հարցերու նախարար  Ալի Հասան Խալիլ եւ   երեսփոխան Ժորժ Ատուան խորհրդակցական հանդիպումներ պիտի ունենան, կարգ մը առկախ  հարցեր լուծելու նպատակով:  Պըրրը նշեց, թէ  օրէնսդիր  նիստին  ամենակարեւոր  օրակարգը պիտի  ըլլայ աշխատավարձերու  յաւելումները: Նշենք, թէ  խորհրդարանի դիւանը  նիստ մը պիտի գումարէ  Չորեքշաբթի կամ Հինգշաբթի առաւօտեան:

ԼԻԲԱՆԱՆԵԱՆ ԿԱՐՃ ԼՈՒՐԵՐ

– Ելեկտրական ընկերութեան սարակները դարձեալ փակեցին կարգ մը շրջաններու մէջ  գործող հաստատութեան  կեդրոնները: Անոնք կը պահանջեն  վերանայիլ  իրենց աշխատանքի պայմաններուն եւ աշխատավարձերուն:

LEAVE A REPLY

Please enter your comment!
Please enter your name here