ՆԱԽԱԳԱՀԻ ԸՆՏՐՈՒԹԻՒՆԸ ՅԵՏԱՁԳՈՒԵՑԱՒ 9 -Ը ՀՈԿՏԵՄԲԵՐԻՆ

0
118

Նախագահական ընտրութիւններու 13-րդ նիստը ունեցաւ իր նախորդներուն ճակատագիրը: Արդարեւ,  նախատեսուած ժամուն, խորհրդարանին  մէջ   հաւաքուած   երեսփոխաններուն  թիւը կը հաշուէր 55:  Խորհդարանի  նախագահ Նեպիհ Պըրրի՝ 9   Հոկտեմբերին  յետաձգեց  նախագահի ընտրութեան յաջորդ   նիստը: Խորհրդարանական աղբիւներու կարծիքով,  Պըրրի  օրէնսդիր նիստի պիտի  հրաւիրէ խորհրդարանը  յառաջիկայ   շաբթուան ընթացքին:

Նիւ Եորքի   մէջ, վարչապետ Թամամ Սալամ  հանդիպումներու  շարք մը պիտի  ունենայ Եգիպտոսի նախագահ Ապտէլ  Ֆաթահ Սիսիի, Իրաքի նախգահ  Ֆուատ  Մաասումի, Յորդանանի թագաւոր Ապտալլա  Բ. թագաւորին,  ՄԱԿ-ի ընդհանուր քարտուղար  Պան Քի Մունի, Արաբական Լիկայի   ընդհանուր քարտուղար Նեպիլ Արապիի,Բրիտանիոյ վարչապետ  Տէյվիտ Գամերոնի, Համաշխարհային Դրամատան   ընդհանուր տնօրէն   Ճիմ  Եոնկի եւ այլ  անձնաւորութիւններու հետ: Սալամ ներկայ գտնուեցաւ, ՄԱԿ-ի ընդհանուր նիստերու մասնակիցներուն  ի պատիւ, նախագահ Պարաք Օպամայի կազմակերպած ընդունելութեան: Սալամ՝ Ուրբաթ օր, ՄԱԿ-ի ամպիոնէն  պիտի արտասանէ Լիբանանի խօսքը:

ՄԱԿ-ի ընդհանուր քարտուղարի անձնական ներկայացուցիչ Տերէք Փլամլի    ընդգծեց, թէ  լիբանանցիներուն համար առաջնայնութիւնը պարտի դառնալ  նախագահի մը ընտրութիւնը:  Փլամլի ըսաւ, թէ  Լիբանան պարտաւոր է  ունենալու նախագահ, վարչապետ ,  խորհրդարանի նախագահ, որպէսզի հեզասահօրէն  գործեն անոր սահմանադրական   հաստատութիւնները: Արեւմտեան դիւանագէտներու կարծիքով,   նախագահական  ընտրութիւններու  գործընթացը կրնայ   յետաձգուիլ, մինչեւ Տաաշի  սպառնալիքին  մեղմացումը:

Լիբանանեան բանակը դարձեալ ահաբեկչական գործողութեան մը  թիրախ  դարձաւ հիւսիսային Լիբանանի մէջ: Արդարեւ,  անծանօթներ  անակնկալօրէն կրակ բացին Պատաուի  մէջ  գտնուող բանակի զօրանոցին վրայ,որուն   հետեւանքով  նահատակուեցաւ զինուոր մը: Երկու վիրաւորներ փոխադրուեցան  հիւանդանոց:  Առ   ի յստակացում  լրատուական  կարգ մը  աղբիւրներու  հակաքարոզչութեան,  լիբանանեան բանակը  հաաւաստեց, թէ Արսէլ քաղաքը  ենթակայ  չէ պաշարումի,  այլ՝ Արսէլի  լեռնային  շրջանները,  ուր  բոյն դրած են   ահաբեկիչները: Ահաբեկչական՝ Քեթէյիպ   Ապտալլա Ազամ  կազմակերպութեան ղեկավար  Սարաժ Էլտտին   Զըրէյղաթ սպառնաց  Իրաքի  օրինակով,   քանի մը օրերու  ընթացքին Պէյրութ խուժել: Արսէլի    քաղաքապետ  Ալի  Հըժէյրի, յառաջիկայ օրերուն  ընթացքին դրական   զարգացումներ խոստացաւ առեւանգեալներու ընտանիքներուն: դիւանագիտական աղբիւրներու կարծիքով, Թուրքիա    չի  փափաքիր  որեւէ միջամտութիւն ունենալ առեւանգեալ զինուորականները ազատ արձակելու բանակցութիւններուն մէջ:

Խորհրդարանի նախագահ Նեպիհ Պըրրի յայտնեց, թէ Սէուտական Արաբիա մտադրած է   վերջ դնել Տաաշի երեւոյթին: Պըրրի  դիտել տուաւ, որ  Միացեալ Նահանգեր մտադրած է  երեք   մասերու բաժնել Իրաքը. քրտական պետութիւն՝  հիւսիսը,  շիիթական պետութիւն՝ հարաւը եւ սիւննիական  պետութիւն մը՝ կեդրոնական շրջանին մէջ: Ներքին գործոց նախարար Նիհատ  Մաշնուք  դիտել տուաւ, թէ  մութ ուժեր կը  փորձեն  շիի-սիւնի  միջհամայնքային   բախումներ հրահրել Լիբանանի մէջ:

LEAVE A REPLY

Please enter your comment!
Please enter your name here