ԱՄԵՐԻԿԵԱՆ ՕԴԱՐՇԱՒՆԵՐԸ ԿԸ ՇԱՐՈՒՆԱԿՈՒԻՆ ՍՈՒՐԻՈՅ ՄԷՋ ՏԱԱՇԻ ԴԻՐՔԵՐՈՒՆ ՎՐԱՅ

0
126

Միացեալ Նահանգներու գլխաւորած  ճակատը  նոր  օդարշաւներ  կատարեց  Հալէպի   մօտակայ  շրջաններու  մէջ  գտնուող Տաաշի դիրքերուն վրայ: Ականատեսներ կը  յայտնեն,թէ Թուրքիոյ օդային տարածութիւնն ալ  օգտագործուած  է օդարշաւներուն ընթացքին: Թուրք  պաշտօնակատարներ  հերքեցին այս տեղեկութիւնը:

Նիւ Եորքի մէջ, ահաբեկչութեան դէմ  պայքարին յատկացուած   միջազգային խորհրդաժողովին   ընթացքին խօսք առնելով,    Սէուտական Արաբիոյ արտաքին գործոց նախարար  իշխան Սէուտ  Ֆայսալ  յայտարարեց, թէ իր երկիրը կը մերժէ  յատկապէս իսլամը արատաւորող  ահաբեկչութիւնը:  Ֆայսալ   դիտել տուաւ, թէ  Սուրիոյ  հողերուն  մէջ կը գործեն  իսլամական աշխարհին սպառնացող ահաբեկչական  կազմակերպութիւններ: Ան վերահաստատեց  իսլամական պետութեան դէմ պայքարող Միացեալ Նահանգներու  գլխաւորած  զինակցութեան իր երկրին զօրակցութիւնը: Ֆայսալ  նաեւ  հաւաստեց  Սուրիոյ  վրայ  օդարշաւներուն Սէուտական Արաբիոյ մասնակցութիւնը:

Բրիտանիոյ վարչապետ Տէյվիտ Գամերոն  յայտարարեց, թէ   Բրիտանիա չի կրնար ծեռնածալ  դիտել իսլամական պետութեան դէմ պայքարը: Գամերոն կ’ակնկալէ, որ խորհրդարանը կանաչ լոյս տայ, որպէսզի բրիտանական  օդռւժը մասնակցի իսլամական պետութեան  դէմ օդարշաւներուն:

Սուրիոյ տեղեկատուութեան նախարար Օմրան Զողպի   յայտնեց, թէ  իշխանութիւնները  նախապէս   տեղեակ պահուած էին  ամերիկեան օդարշաւներէն:  Նախարարը  դիտել տուաւ  որ   իսլամական պետութեան  վրայ ամերիկեան օդարշաւները   կարելի չէ ընդունիլ իբրեւ  Սուրիոյ  գերիշխանութեան  ոտնակոխում, որովհետեւ անիկա կու գար  ՄԱԿ-ի Ապահովութեան Խորհուրդին  հաւանութեամբ:

Սուրիոյ մօտ ՄԱԿ-ի  պատուիրակ  Սթեֆան Տը  Միսթուրա  յայտնեց, թէ  միայն ռազմական գործողութիւններ բաւարար  պիտի չըլլան չէզոքացնելու իսլամական պետութիւնը, անհրաժեշտ է   քաղաքական գործընթաց մը  սկսիլ  Սուրիոյ  քաղաքական   ուժերուն միջեւ: Միւս կողմէ, Եւրոպական  Միութիւնը  215 միլիոն եուրոյի   բարձրացուց  Սուրիոյ համար մարդասիրական  օժանդակութիւններուն առաստաղը:

Սուրիական «Ալ Ուաթան» օրաթերթը  կը գրէ, թէ  բանակը  պիտի  օգտուի իսլամական պետութեան դիրքերուն վրայ ամերիկեան  օդարշաւներէն:

LEAVE A REPLY

Please enter your comment!
Please enter your name here