ՍԱԼԱՄ՝ ԼԻԲԱՆԱՆ ԻՆՔՆԱՊԱՇՏՊԱՆՈՒԹԵԱՆ ՃԱՆԱՊԱՐՀՈՎ ԿԸ ՄԱՍՆԱԿՑԻ ԱՀԱԲԵԿՉՈՒԹԵԱՆ ԴԷՄ ՊԱՅՔԱՐԻՆ

0
135

ՄԱԿ-ի 69-րդ ընդհանուր նիստերուն մասնակից վարչապետ Թամամ Սալամ,  Նիւ Եորքի մէջ յայտարարեց, թէ  Լիբանան յանձնառու կը մնայ ահաբեկչութեան դէմ  պայքարելու ՄԱԿ-ի Ապահովութեան Խորհուրդի որոշումներուն: Ան ըսաւ, թէ Լիբանան՝ ինքնապաշտպանութեան ճանապարհով կը պայքարի  ահաբեկչութեան դէմ եւ կը  փորձէ առաւելագոյն  չափով հեռու մնալ  շրջանային հակամարտութիւններէն: Ան նշեց, թէ  Լիբանան  մաս կը կազմէ ահաբեկչութեան դէմ  պայքարող  միջազգային  ճակատին: Սալամ   նշեց,թէ  Լիբանանի կացութիւնը  ծանր է, լուծումի համար անհրաժեշտ են  մասնայատուկ քայլեր:   Սալամ յայտնեց, թէ   քաղաքական   հոսանքներուն  վրայ կը մնայ  հանրապետութեան նախագահ  ընտրելու պատասխանատուութիւնը: Սալամ   նաեւ յայտնեց, թէ բանակը  պատրաստ է  ընդունելու  ամերիկեան, ռուսական եւ այլ  պետութիւններու  օժանդակութիւնները:

Թրիփոլին ներկայացնող կարգ մը դէմքեր դիտել կու տան, թէ ապահովական անիշխանականութիւնը  սարսափի նոր   մթնոլորտ մը ստեղծած է քաղաքին մէջ: Բանակին   դէմ լարուածութիւնը կ’արձանագրէ  մագլցում:Կրակոցները աւելի յաճախակի կը դառնան  բաանկին դէմ:   Նախկին վարչապետ Նեճիպ  Միքաթի եւ  նախկին  նախարար  Մուհամմէտ Սաֆատի կ’աշխատին   սիւննի համայնքի  ղեկավարները  հանդիպումի մը հրաւիրել, քննարկելու  քաղաքին կացութիւնը եւ  մեղմացնելու  տիրող լարուածութիւնը:

Իր կարգին, լիբանանեան բանակը խիստ հսկողութիւն  կը բանեցնէ  Արսէլի մէջ գտնուող սուրիական գաղթակայաններուն վրայ եւ կը շարունակէ  խուզարկութիւնները:  Բանակը   կտրականապէս հերքեց Արսէլը   պաշարած ըլլալու մասին տեղեկութիւնները: Կ’արժէ նշել, որ լիբանանեան կարգ մը  քաղաքներու մէջ  սկսած են յայտնուիլ Տաաշին զօրակցող  կարգախօսներ:Բանակը   քանի մը անգամ կասեցուց Արսէլը շրջապատող  լեռներէն  զինեալներու թափանցումը   քաղաքային  շրջաններ: Զինեալները, Արսէլը  շրջապատող  շրջաններէն կրակ տեղացուցին բանակին վրայ:

Ճեպհէթ Ալ Նուսրայի աղբիւր մը յայտարարեց, թէ Արսէլի  վերջին դէպքերուն  պատճառով, առեւանգուած զինուորականները ազատ արձակելու բանակցութիւնները խզուած են:  Ան աւելցուց, թէ  զինուորականները մահապատիժի ենթարկելու որոշում չկայ  տակաւին, սակայն անոնք արդէն իսկ հագած են մահուան զգեստ…: Թուրքիա անգամ մը եւս մերժեց որեւէ  ձեւով միջամտել բանակցութիւններուն:

Առեւանգուած զինուորականներուն հարազատները  տակաւին  փակ  կը պահեն Տահր Ալ Պայտարի  ճանապարհը:

Խորհրդարանի նախագահ Նեպիհ Պըրրի մերժեց  օրէնսդիր  նիստի  հրաւիրել խորհրդարանը, առանց  իրազէկ դառնալու աշխատավարձերու  յաւելումներուն  վերաբերեալ  առնուած որոշումին  մանրամասնութիւններուն: Ներկայիս  կ’առաջարկուի  մէկ  առ հարիւրի յաւելում մը յաւելեալ տուրքերու արժէքին  վրայ, միաժամանակ՝  երկու տարուան պայմանաժամ, յաւելումները ամբողջացնելու նպատակով: Փաղանգաւոր  Կուսակցութիւնը անմիջապէս հակազդեց Պըրրիին  յայտնելով, թէ նախագահի ընտրութենէն պիտի բացակայի մնացեալ նիստերէն:

ԼԻԲԱՆԱՆԵԱՆ ԿԱՐՃ ԼՈՒՐԵՐ

-Ելեկտրականութեան ընկերութեան տնօրէնութիւնը կառավարութենէն  պահանջեց կեդրոնական  շէնքին մէջ գտնուող կարեւոր   սարքերը ապահով  վայր մը փոխադրել, որովհետեւ սարակները  կը   շարունակեն պատանդ  պահել կեդրոնական շէնքը:

LEAVE A REPLY

Please enter your comment!
Please enter your name here