Ընդդիմութիւն՝ ԵԽԽՎի Մէջ Արցախի Վերաբերեալ Զեկոյց Պատրաստելու Առաջարկին

0
123

ԵՐԵՒԱՆ, «Փանորամա».- Սեպտեմբեր 29ին, Եւրոխորհուրդի Խորհրդարանական վեհաժողովին ընթացքին, Հոլանտան ներկայացնող պատգամաւոր Թինի Քոքս ներկայացուցած է վեհաժողովի բիւրոյի որոշումները: Բիւրոյի որոշումներուն մէջ ներառուած էր Սեպտեմբեր 2ին, Փարիզի մէջ տրուած որոշումը, որ Լեռնային Ղարաբաղի հակամարտութեան վերաբերեալ ատրպէյճանական 2 բանաձեւերու նախագիծերը կը յղէ ԵԽԽՎ Քաղաքական հարցերու յանձնաժողովին, որպէսզի այդ գծով զեկոյց մը պատրաստէ: Զեկոյցին վերնագիրն է՝ «Լեռնային Ղարաբաղի եւ Ատրպէյճանի միւս բռնագրաւեալ տարածքներուն մէջ բռնութիւններու աճ»:
Սակայն, բիւրոյի որոշումին անհամաձայնութիւն յայտնած է հայկական պատուիրակութեան ղեկավար Հերմինէ Նաղդալեանը, որ բողոքարկած է բիւրոյի որոշումը եւ առաջարկած է հարցը ուղարկել Դէտերու յանձնախումբին՝ առ ի գիտութիւն: Սակայն այդ առաջարկը մերժուած է 41 կողմ, 74 դէմ ձայներով:
Իր ելոյթին մէջ Նաղդալեան ըսած է, որ Հայաստան միջազգային կառոյցներուն կոչ կ՛ընէ զգուշաւորութիւն ցուցաբերելու Լեռնային Ղարաբաղի հակամարտութեան հետ կապուած հարցերուն, քանի որ հակամարտութեան կարգաւորման հարցին մէջ հիմնարար է ԵԱՀԿ Մինսկի խմբակի գործունէութիւնը, որ պէտք է գտնէ կարգաւորման խաղաղ տարբերակը:
«Սա միակ միջազգային կառոյցն է, որն ունի լիազօրութիւն ԼՂ հակամարտութեան կարգաւորման համար, եւ որին աջակցում են միջազգային կառոյցները, ԵՄն եւ մեր կազմակերպութիւնը: Մենք կոչ ենք անում վեհաժողովին՝ խուսափել այնպիսի քայլերից, որոնք կարող են բացասական ազդեցութիւն ունենալ ԼՂ հակամարտութեան խաղաղ կարգաւորման վրայ», ըսած է Հերմինէ Նաղդալեանը՝ ուշադրութիւն հրաւիրելով փաստաթուղթի անուան վրայ, ուր կողմնորոշում բացայայտ է ի վնաս առարկայականութեան:
«Իրավիճակն այնքան փխրուն է, որ ցանկացած քայլ կարող է լարուածութիւն առաջացնել սահմանին: Մենք հաւատացած ենք, որ այս վեհաժողովը պէտք է քայլեր ձեռնարկի հայ եւ ադրբեջանցի պատուիրակների միջեւ վստահութեան հաստատման համար: ԵԽԽՎն պէտք է իր առաջնային նպատակը կատարի՝ մարդու իրաւունքների եւ հիմնարար ազատութիւնների պաշտպանութիւնը», աւելցուցած է ՀՀ պատուիրակութեան ղեկավարը:
Յիշեցնենք, որ հայկական պատուիրակութեան անդամ, ԲՀԿ խմբակցութեան պատգամաւոր Նաիրա Զոհրաբեան օրին անընդունելի համարած էր Ատրպէյճանի ներկայացուցած նախաձեռնութիւնը՝ ազդարարելով, որ նման քայլեր վնաս կը հասցնեն բանակցութեանց եւ աւելիով կը սրեն կողմերուն միջեւ առկայ անվստահութիւնը:

LEAVE A REPLY

Please enter your comment!
Please enter your name here