ԽՈՐՀՐԴԱՐԱՆԸ ԱՅՍՕՐ ՊԻՏԻ ՎԱՒԵՐԱՑՆԷ ԱՇԽԱՏԱՎԱՐՁԵՐՈՒ ՅԱՒԵԼՈՒՄՆԵՐՈՒ ՕՐԻՆԱԳԻԾԸ

0
119

 

Սկզբունքով,   Չորեքշաբթի առաւօտեան, լիբանանեան խորհրդարանը պիտի  գումարէ  օդէնսդիր  նիստ եւ    վաւերացնէ  աշխատավարձերու  յաւելումներու օրինագիծը: Սենտիքայական  համակարգումի խորհուրդի անդամ  Հաննա Ղարիպ  դիտել տուաւ, թէ  հսկայական   տարբերութիւններ գոյութիւն ունին պահանջուած   եւ առաջադրուած յաւելումներուն միջեւ:

Միւս կողմէ, կառավարական աղբիւրներ կը  հաղորդեն, թէ  նախարարաց խորհուրդի  վաղուան  նիստը   բաւական  ճակատագրական  պիտի  ըլլայ առեւանգեալ զինուորականներուն  թղթածրարին   համար: Կառավարութիւնը  շատ հաւանաբար  յստակ  որոշում մը  ընդունի առեւանգող կողմերուն հետ  բանակցելու  ուղղութեամբ: Վարչապետ  Թամամ Սալամ կ’ակնկալէ, որ  կառավարութիւնը  միասնական կեցուած  որդեգրէ   բանակցութիւններ վարելու որոշումին առնչութեամբ: Լաւատեղեակ  աղբիւրներու համաձայն, Սալամ  կը  վայելէ  քաղաքական  ուժերու  մեծամասնութեան աջակցութիւնը:  Կ’ըսուի, թէ Քաթար  լուրջ  քայլերու սկսած է  դիմել առեւանգեալներուն հարցով, իսկ  Թուրքիա խոստացած է կարելին  ընել զանոնք ազատ արձակելու ուղղութեամբ:Սակայն, Սէուտական Արաբիոյ մէջ լոյս  տեսնող «Ռիատ»   օրաթերթը կը գրէ, թէ  առ այսօր, քաթարեան  միջնորդութեան մասին տեղեկութիւնները, երեւակայութիւններ են  պարզապէս…:

Սէուտական  «Օքազ» օրաթերթը կը գրէ, թէ այսպէս կոչուած Սուրիոյ ազատ բանակը մտած է  առեւանգուած զինուորականները ազատ արձակելու  գիծին  մէջ:Ներքին գործոց նախարար   Նիհատ  Մաշնուք յայտարարեց, թէ զինուորականները ազատ արձակելու  համաձայնութեան  նախապատրաստութիւններ տեղի կ’ունենան:

Առեւանգուած  զինուորականներուն     ընտանեկան պարագաները,  բարեկամները կը  շարունակեն  փակ  պահել Տահր Ալ Պայտարի ճանապարհը: Երէկ  կէսօրին, Ապահովութեան  ուժերու եւ  առեւանգուած զինուորներու  հարազատներուն  միջեւ բախում  մը տեղի ունեցաւ Մասնաայի  ճանապարհին  վրայ:Սակայն  Մաժտ Ալ Անճարի  քաղաքապետարանի նախագահը հերքեց նման   միջադէպի մը իրողութիւնը,   աւելցնելով որ  ճանապարհները կը մնան բաց:

Վարչապետ Թամամ Սալամ վարչապետարանին մէջ ընդունեց Իրանի ազգային անվտանգութեան գերագոյն խորհուրդի  նախագահ   Ալի  Շամխանին եւ քննարկեց  շրջանային    բեմի զարգացումները: Հանդիպումը աւարտելէ ետք,Շամխանի յայտարարեց, թէ Իրան  որոշած է ռազմական օժանդակութիւն  տրամադրել   լիբանանեան բանակին: Իրանցի  դիւանագէտը նաեւ այցելեց Հըզպալլայի ընդհանուր քարտուղար Հասան Նասրալլային  եւ  խորհրդարանի նախագահ  Նեպիհ Պըրրիին:

Խորհրդարանի նախագահ Նեպիհ Պըրրի  դիտել տուաւ, որ նախագահական  ընտրութիւնները ներկայ  ոճով խանգարելու  ընթացքը շարունակուելու պարագային, երկու  նախագահ պիտի   ընտրուի՝ մէկի   փոխարէն:  Պըրրի՝ Այն Էլ Թինէի մէջ ընդունեց Լիբանանի մօտ Միացեալ Նահանգներու դեսպան Տէյվիտ Հէյլը:

LEAVE A REPLY

Please enter your comment!
Please enter your name here