Հայաստան Տնտեսական Առումով Դժուար Հանգրուանի Դէմ Յանդիման Է

0
123

ԵՐԵՒԱՆ, «Մեդիամաքս».– Արժոյթի միջազգային հիմնադրամի (ԱՄՀ) հայաստանեան առաքելութեան ղեկավար Մարք Հորթընը 30 Սեպտեմբերին յայտնած է, որ տարածաշրջանի զարգացումներու, պատժամիջոցներու եւ աշխարհաքաղաքական դժուարութիւններու իբրեւ հետեւանք Հայաստան դժուարին հանգրուանի դէմ յանդիման է։
Ան նշած է, որ այդ առնչութեամբ կարգ մը ոլորտներու մէջ կը նախատեսուին զգուշաւոր մօտեցում, իսկ կառուցուածքային բարեփոխումներու առումով՝ վճռականութիւն:
«Սպասուող իրավիճակին մէջ, իշխանութիւններու հսկողութեան ներքեւ գտնուող հարցերուն մէջ պէտք է վճռական գործողութիւններ կատարել», յայտնած է ան։
ԱՄՀ հայաստանեան առաքելութեան ղեկավարը նկատել տուած է, որ այս տարի Հայաստանի մէջ նախատեսուածէն ցած պիտի ըլլայ տնտեսական աճի ցուցանիշը՝ 2.5 տոկոս, ինչ որ կը բացատրուի ներքին եւ արտաքին գործօններով:
«Ասիկա պայմանաւորուած է Ուքրանիոյ տնտեսական իրավիճակով եւ Ռուսիոյ նկատմամբ կիրարկուող պատժամիջոցներով, որոնք կ՛ազդեն Հայաստանէն արտածման գործընթացին եւ Ռուսիայէն Հայաստան կատարուող դրամական փոխանցումներու ցուցանիշներուն վրայ», ըսած է ան՝ դիտել տալով, որ ստեղծուած անորոշութիւնը կ՛ազդէ նաեւ երկրին մէջ ներդրումներու եւ վստահութեան մակարդակին վրայ:
Անդրադառնալով ներքին իրավիճակին՝ Մարք Հորթըն ըսած է, որ Հայաստանի կառավարութիւնը կը շարունակէ թերակատարել պետական պիւտճէով նախատեսուած ծախսերը, ինչ որ բացասական ազդեցութիւն կ՛ունենայ մեծ դրամագլուխով ծրագիրներուն վրայ՝ միաժամանակ նպաստելով տնտեսական աճի դանդաղեցման: Ինչ կը վերաբերի պիւտճէական բացին՝ բանախօսը նշած է, որ ներկայ դրութեամբ կ՛ակնկալուի, որ անիկա կազմէ ՀՆԱի մօտ 1.5 տոկոսը, իսկ պիւտճէին մէջ որպէս թիրախային ցուցանիշ սահմանուած է 2.3 տոկոս:
Խօսելով ԱՄՀի կողմէ Հայաստանի մէջ իրականացուող «Երկարաձգուած ֆինանսաւորման» ծրագիրի առաջին հանգրուանի արդիւնքներուն եւ եզրակացութիւններուն մասին՝ ան նշած է, որ մասնաւոր հատուածի գրեթէ բոլոր ոլորտներուն մէջ դրական ազդանշաններ նկատելի են:
«Մասնաւորապէս, Բաց երկինքի քաղաքականութեան իբրեւ արդիւնք զգալիօրէն կը նուազին օդանաւային տոմսերուն գիներն ու կ՛աւելնայ թռիչքներու քանակը, ինչ որ դրական ազդեցութիւն կ՛ունենայ զբօսաշրջութեան վրայ: Բարենպաստ զարգացումներ կան նաեւ գիւղատնտեսութեան ոլորտին մէջ», յայտնած է Մարք Հորթոն:
ԱՄՀ ներկայացուցիչը ծրագիրի առաջին հանգրուանի արդիւնքը ընդհանուր առմամբ գոհացուցիչ նկատած է՝ նշելով, որ բանակցութիւնները աւարտին պիտի հասնին մօտ տասը օրէն, Ուաշինկթընի մէջ կայանալիք տարեկան ժողովի ծիրին մէջ։ Իբրեւ արդիւնք՝ Դեկտեմբերին կ՛ակնկալուի ծրագիրով նախատեսուած ֆինանսաւորման երկրորդ մասը՝ 17 միլիոն տոլար:

LEAVE A REPLY

Please enter your comment!
Please enter your name here