ԶԻՆՈՒՈՐԱԿԱՆՆԵՐԸ ԱԶԱՏ ԱՐՁԱԿԵԼՈՒ ՃԻԳԵՐԸ ՆՈՐ ԹԱՓ ԿԸ ՍՏԱՆԱՆ

0
115

Լիբանանեան կառավարութիւնը, երէկ առաւօտեան,  վարչապետարանին մէջ, վարչապետ Թամամ Սալամի  գլխաւորութեամբ  գումարեց  նիստ  մը: Կառավարութիւնը  քննարկեց  57 կէտերէ  բաղկացած  օրակարգ մը: Օրակարգի  վրայ  դրուած էին ապահովակն, քաղաքական,  ընկերային եւ տնտեսական հարցեր, ինչպէս նաեւ  սուրիացի  գաղթականներուն,  առեւանգուած զինուորներուն թղթածրարները: Ներքին գործոց  նախարար Նիհատ Մաշնուք  յայտնեց, թէ  ծրագրած է   նոր կարգադրութիւններ կատարել  Արսէլի   գաղթակայաններուն վերաբերեալ: ան  ընդգծեց,  թէ Հըզպալլա ամբողջական  հասկացողութիւն կը ցուցաբերէ Արսէլի կացութեան առնչութեամբ:

Ընկերային հարցերու  նախարար  Ռաշիտ  Տըրպաս   նշեց, թէ  Մաշնուքի  տնօրինած  կարգադրութիւնները  չեն կարօտիր  կառավարութեան հաւանութեան: Նիստի   ընթացքին,  առեւանգեալ   զինուորներու հարազատները  նստացոյց մը  կատարեցին վարչապետարանին առջեւ:  Առողջապահութեան նախարար Ուայէլ  Ապու Ֆաուր միացաւ նստացոյցին եւ իր զօրակցութիւնը յայտնեց անոնց   պահանջներուն: Ան  ըսաւ, թէ  ազատ արձակելու բանակցութիւնները հատած են  բաւական կարեւոր  ճանապարհ: Լրատուական կարգ մը աղբիւրներ կը հաղորդեն, թէ քանի մը զինուորներ ազատ պիտի արձակուին Ատհայի  տօնական օրերու նախօրեակին:

Միւս կողմէ,   շրջանային  դէտեր կը  հաւաստնեն, թէ նախագահ Պարաք Օպամա նախանձախնդիր կը մնայ  պահպանելու  Լիբանանի  ապահովական կայունութիւնը:

Խորհրդարանի նախագահ Նեպիհ Պըրրիի կարծիքով երկիրը  կը գտնուի ապահովական,  տնտեսական եւ  քաղաքական լուրջ  տագնապներու առջեւ: Ան  պահանջեց  ի գին  ամէն զոհողութեան  զօրավիգ  կենալ բանակին:  Պըրրիէն անկախ,  քաղաքական   խմբաւորումներու միջեւ  բանակցութիւններ տեղի կ’ունենան խորհրդարանին երկարաձգումը  հաստատելու ուղղութեամբ:  Մուսթաքպալ Հոսանքը,  Հըզպալլա,  Ընկերվար Յառաջդիմական Կուսակցութիւնը աւելի   իրապաշտ  կեցուածք  կը ցուցաբերեն  երկարաձգումի իրողութեան  շուրջ, քան ուրիշներ:  Ազգային Ազատ Հոսանքի պետ  Միշէլ Աուն,  երկարաձգումի դէմ իր  վերապահութիւնները յայտնելով հանդերձ, խոստացած է   չխանգարել  անոր ընթացքին:

Առեւանգուած զինուորականներուն հարցով,    Քաթար եւ Թուրքիա  կը  փորձեն փոխզիջողական  համաձայնութիւն  մը  գոյացնել  կառավարութեան եւ  ծայրայեղականներուն միջեւ:  Լիբանանեան բանակի աղբիւր  մը   հաղորդեց, թէ Արսէլի   միջադէպերուն հետեւանքով   ձերբակալեալներուն թիւը  հինգ հարիւրի  բարձրացաւ:

LEAVE A REPLY

Please enter your comment!
Please enter your name here