Պոլսոյ Հայերը Ստացած Են Շիշլիի Հայկական Գերեզմանատան Սեփականութեան Իրաւունքը

0
139

Պոլսոյ Շիշլի թաղամասին մէջ 700 մլն թրքական լիրա (շուրջ 286 մլն ԱՄՆ տոլար) արժողութեամբ պատմական հայկական գերեզմանատան տարածքի սեփականութեան իրաւունքը 80 տարի անց վերադարձուած է Պէյօղլուի Սուրբ Երրորդութիւն հայկական եկեղեցւոյ հիմնադրամին:

Այս մասին կը հաղորդէ «Արմէնփրէս»­ը, ըստ թրքական «Վաթան» պարբերականին: Հայկական պատմական գերեզմանատունը կը զբաղեցնէ 41 հազար 950 քառակուսի մեթր տարածք: Սուրբ Երրորդութիւն հայկական եկեղեցւոյ հիմնադրամը Շիշլիի հայկական Գրեգորեան գերեզմանատան տարածքի վերադարձին համար Հիմնադրամներու գլխաւոր վարչութեան դիմած էր դեռեւս 2011 թուականին: Հայկական հիմնադրամի ներկայացուցիչ Սիմոն Չէքեմ նշած է, որ կայացուած որոշումը իրենց շատ ուրախացուցած է:

Թէպէտ անցեալին գերեզմանատան սեփականութեան փաստաթուղթերը չեն եղած հայերուն մօտ, սակայն մինչ օրս հէնց այստեղ  թաղուած են հայկական համայնքի ներկայացուցիչներ: Թուրքիոյ հիմնադրամներու գլխաւոր վարչութիւնը 2012 թուականին Շիշլիի` 40 հազար 500 քառակուսի մեթր տարածք զբաղեցնող հայ կաթոլիկներու գերեզմանատունը վերադարձուցած էր Սուրբ Յակոբ հիւանդանոցի հիմնադրամին, իսկ 42 հազար քառակուսի մեթր զբաղեցնող մէկ այլ տարածք, որուն մէջ  եղած է նաեւ Զէյթինպուրնուի մարզադաշտը, վերադարձուած էր Սուրբ Փրկիչ հայկական հիւանդանոցի հիմնադրամին:

 

LEAVE A REPLY

Please enter your comment!
Please enter your name here